1 Jan 5 - Kazambale lé Sebe Sauunu 1979

Blipale éé tɛrɛlawe keleé yifaama

¹ Mi faa lé wo bli ke a lɛ léé, Jézu a Krist nya, wa Kazambale lé nénu nya, yé dé mi yaati sɔ miomian lɛ, ’té a giné éé sɔa a lɛ é ziin.

² Dé Kazambale sɔ kaa lɛ, ’té kaa alé bélidɔwenu kɛla, ’bɛna lé kaa a gi dɔɔa léé, Kazambale lé nénu sɔ kaa lɛ.

³ Kazambale va sɔlɛle ɛ ke alé bélidɔwe kɛlɛle nya, yé alé bélidɔwe kɛlɛle ’ka tɔntɔn lo;

⁴ munu faa lé wo ke Kazambale lé nénu nya, woo tɛrɛlawenu keleé yifaama, bɛwemalé Kazambale lé bélidɔwenu kɛlɛle ’ka wo ma tɔntɔn lo. Fɛ lé éé tɛrɛlawe keleé yé a ’wuo éé voo a lɛ, yee lé ke kaa blivole Jézu lɛ nya.

⁵ Mi lé éé tɛrɛlawe keleé yé a ’wuo é vo a lɛ, dé é ’ka mi lé a bli ke a lɛ léé, Jézu a Kazambale Be nya, azan nya lo, ’té ’bɛzan lé é ke de nyaa?

Kazambale wenayedére fe é Be ma

⁶ Jézu Krist ’ko, yee ɛ da ’yi valé nyɛ nya. ’Yi saa kaan lo, naa, ’yi valé nyɛ lé. Kazambale Léli a webozen nya, amalé a Léli ɛ a ma we fé.

⁷ Mi yaa a mawe fé la gi: Ti koo, Dére koo, Léli Sauun koo, woo lé, yé woo mi yaa ’ko wa do.

⁸ Yé a yaa a mawe fé tɛrɛ la é ziin: Kazambale Léli koo, ’yi koo, nyɛ koo, woo lé, yé wo dére a do.

⁹ Dé kaa munu lé wenayedére ’ma, Kazambale lé wenayedére a blɛn é mini wozé ta; Kazambale lé wenayedére lé é a fe é Be Jézu ma, yee lé.

¹⁰ Mian é bli vo Kazambale Be lɛ, yee wenayedére ’ko a ’bɛzan gi. Yé mian é ’ka é bli voo Kazambale lɛ lo, é a Bale kɛlɛna viézan nya. É ’ka é bli vo lɛ Kazambale lé wenayedére lé é a fe é Be ma bɛ, a lɛ lo, azama.

¹¹ Yé yee wenayedére lé ke ’ko: vole é yuɛma lé a glɛ ’ka lo, Kazambale a nɔ kaa lɛ, yé yee vole é yuɛma ɛ ke a Be gi.

¹² Mian Be ke azé nya, é béli. Yé mian Kazambale Be ’ka azé nya lo, é ’ka é bélile lo.

Vole é yuɛma dɔɔle

¹³ ’Kaa lé ka bli vo Kazambale Be tɔ lɛ, maa we ’konu gyɛ ka lɛ kalé a gi dɔɔle we gi léé, vole é yuɛma lé a glɛ ’ka lo, é a kazé nya.

¹⁴ Dé ko fɛ do laa Kazambale lee alé blibɔmawe yɛrama, é ’é tɔné dɔa ko lɛ, amalé ko ’ka goo Bale ’lɛ bli fié nya lo.

¹⁵ Yé dé ko a gi dɔɔ léé, fɛ lé ko laan, Kazambale é ’é tɔné dɔa ko lɛ a ma, ’té ko a gi dɔɔ léé, fɛ lé ko a laa a lee, é a kozé nya.

¹⁶ Wenyané lé ’bɛ ’ka mi no ga lɛ lo, dé mian é bwe ye a kɛlɛna, ’é bazoro, yé Kazambale é dan a béli lɛ. Wenyané lé ’bɛ ’ka mi no ga lɛ lo, munu lé wo ke ’bɛ kɛlɛna, ’bɛnu é dan béli lɛ. Wenyané do ana, ’bɛ éé mi no ga lɛ. Maa ’ka a fena léé, ka bazoro ’bɛ wenyané ma lo.

¹⁷ Weple faa a wenyané nya, naa, wenyané ke ana, ’bɛnu ’ka mi no ga lɛ lo.

¹⁸ Kaa gi dɔɔ léé, Kazambale lé né do kpen ’ka wenyané kɛla lo. Naa, Kazambale Be éé yuɛ paan wo va, yé Satan ’ka manean wo ma lo.

¹⁹ Kaa a gi dɔɔ léé, kaa a Kazambale zé nya, yé tɛrɛlamunu faa a Satan lé plɛplɛ wuo.

²⁰ Kaa a gi dɔɔ é ziin léé, Kazambale Be da yé é kaa bɔn‐in kini kaa ma, Bale lé ke webozen nya, a dɔɔle we gi; yé kaa a Kazambale Be Jézu Krist gi, bɛwemalé kaa a Kazambale bozen gi. Jézu ɛ ke Bale bozen nya, é valé vole é yuɛma lé a glɛ ’ka lo, a nya.

²¹ Anlé né kiénénu, ’ka yuɛ pa kabozen va miyilinu lé we ma.