1 Jan 4 - Kazambale lé Sebe Sauunu 1979

Kazambale Léli valé Kristmazan léli

¹ Ka lé ka sɔ an lɛ, té ka bli é vo léli faa lɛ lo, naa, ’ka lélinu gi dan, yeean é ke Kazambale zé nya, a dɔɔle we gi, naa, viébalelayemunu kiɛre bɔra tɛrɛ la.

² Kalé Kazambale Léli dɔɔmawe lé ke ’ko: léli faa lé wo ke a fena léé, Jézu da blami nya, wa Kazambale zé nya.

³ Léli faa lé wo ke a fena léé, Jézu ’ka da lɛ blami nya lo, wo ’ka Kazambale zé nya lo, wa Kristmazan zé nya. Ka a ’ma léé, é dan da lɛ, yé é a sin tɛrɛ la.

⁴ ’Kaa, anlé né kiénénu, ka a Kazambale zé nya. Yee lé é ke ka gi é a plɛplɛ é mini yee lé é ke tɛrɛ la, a ta, bɛwemalé ka viebalelayemunu kele.

⁵ Wa tɛrɛlamunu nya, amalé woo we fé tɛrɛla wefebɛ nya, ’té tɛrɛlamunu woo tɔné dɔa wo lɛ.

⁶ Kaa a Kazambale zé nya. Mian é Kazambale dɔɔ éé tɔné dɔa kaa lɛ. Mi lé é ’ka Kazambale zé nya lo, é ’ka é tɔné dɔa kaa lɛ lo. ’Bɛ nya lé kaa wezen léli dɔɔ, yé kaa vié léli dɔɔ.

Kazambale a sɔlɛle nya

⁷ Ka lé ka sɔ an lɛ, kaa sɔ kaa ke lɛ ma, naa, Kazambale va lé sɔlɛle éé sié, yé miomian munu sɔ a lɛ, ’bɛzan a Kazambale lé né nya yé ’bɛzan Kazambale dɔɔ.

⁸ Kazambale a sɔlɛle nya, bɛwemalé mi lé munu ’ka sɔa a lɛ lo, ’bɛzan ’ka Kazambale dɔɔa lo.

⁹ Fɛan zo lé kaa sɔ Kazambale lɛ, é a nagɔɔn ’ko zo: Kazambale é Be wɔlɛ do kpen pa zia tɛrɛ la, kaa bélile a ma we gi.

¹⁰ Sɔlɛle ’ko, é ’ka kɛlɛ lɛ léé, Kazambale ɛ sɔ kaa lɛ, ’bɛ lé lo, naa, kaa ɛ sɔ Kazambale lɛ, yé é Be pa zia kaalé wenyané ’yibofɛ nya.

¹¹ Ka lé ka sɔ an lɛ, dé kaa sɔ Kazambale lɛ ’ko zo, é a lé kaa sɔ kaa ke lɛ é ziin.

¹² Mi do kpen ’ka tan Kazambale ye lɛ monomono lo. Dé kaa sɔ kaa ke lɛ, Kazambale a kaa gi, ’té alé sɔlɛle boen a kaa gi.

¹³ A Léli nɔle kaa lɛ lé we ma lé kaa a gi dɔɔ léé, kaa a a gi, yé é a kaa gi.

¹⁴ Ti é Be pa zia tɛrɛlamunu siéwegizan nya, yé ko ’bɛ ye ’té ko ana we fé.

¹⁵ Dé mian é a fe léé, Jézu a Kazambale Be nya, ’té Kazambale a ’bɛzan gi, yé ’bɛzan a Kazambale gi.

¹⁶ Yé kaa va sɔlɛle a Kazambale gi fɛan zo, kaa a dɔɔ, yé kaa bli a ’bɛ lɛ. Kazambale a sɔlɛle nya, yé mian munu éé sɔa a lɛ, é a Kazambale gi yé Kazambale a ’bɛzan gi.

¹⁷ Fɛan zo lé Jézu ke, a zo lé kaa ke é ziin tɛrɛ la. We ’ko ma lé sɔlɛle boen ke kaa gi, kaa bli ta dɔle plɛplɛ webleyi nya we gi.

¹⁸ Kana ’ka sɔlɛle gi lo, naa, sɔlɛle boen éé kana sié mi gi. Dé i a kanana, ’té é a i gi léé, wo dan we lɛdɔ lɛ ’é gi; mian éé kanaan, sɔlɛle boen ’ka ’bɛzan gi lo.

¹⁹ Kaa sɔ Kazambale lɛ é vinin, amalé sɔlɛle a kaa gi.

²⁰ Dé mi do a fe léé, Kazambale sɔ ’é lɛ, yé a bwe za a a gi, ’té ’bɛzan a viéwona. A bwe lé éé ’bɛ yé, dé ’bɛ ’ka sɔa a lɛ lo, Kazambale lé é ’ka ’bɛ yé lo, ’té ’bɛ éé sɔa a lɛ kaa?

²¹ Kaa bélidɔwe ’ko ye Jézu va, léé, mian Kazambale sɔ a lɛ, a bwe ’é sɔ a lɛ ma.