1 Jan 3 - Kazambale lé Sebe Sauunu 1979

Kazambale lé nénu

¹ Ka gini do. Kaa Ti bli bɔ kaa ma fɛan zo, yee lé é ke ’ko: é kaa laa Kazambale lé nénu, yé kaa a ’bɛ nya. Yé tɛrɛlamunu ’ka Jézu dɔɔ lɛ lo, bɛwemalé wo ’ka kaa dɔɔa lo.

² Ka lé ka sɔ an lɛ, kaa a lao Kazambale lé nénu nya. Kaa dan kinin lɛ fɛan nya, wo ’ka tan ’bɛ gɔɔn lɛ kaa lɛ lo. Naa, kaa gi dɔɔ léé, dé wo ’bɛ gɔɔn kaa lɛ bléyian va, kaa dan kɛlɛ lɛ bélé Jézu bozen zo; fɛan zo lé Jézu ke, a zo duo lé kaa dan a ye lɛ, azama.

³ Yé dé miomian a bli ke Jézu dale lɛ, ’bɛzan é ébozen kɛla sauun, bélé fɛan zo lé Jézu ke sauun, a zo.

⁴ Dé miomian éé wenyané kɛla, ’té é a bélidɔwe sɛrɛna, yé wenyané lé é ke bélidɔwe sɛrɛle nya.

⁵ Naa, ka a gi dɔɔ léé, Jézu da wenyané sile munu lee we gi, yé wenyané do ’ka yeebozen gi lo.

⁶ Dé miomian é ke Jézu gi, é ’ka wenyané kɛla lo. Dé miomian éé wenyané kɛla, ’té ’bɛzan ’ka Jézu ye lɛ lo, yé ’té ’bɛ ’ka a dɔɔ lɛ lo.

⁷ Né kiénénu, té mi do é dabli kɛlɛ ka lɛ lo ma. Mian é ke we tegele kɛlɛna, ’bɛzan a tegele, bélé fɛan zo lé Jézu ke tegele, a zo.

⁸ Yonufaatagɔné wenyané kɛlɛle sia a pélisia bléyi va fɔɔ kyɔ, amalé mian éé wenyané kɛla ’bɛzan a yonufaatagɔné zé nya. Kazambale Be da yonufaatagɔné lé nyanama sɛrɛle we ma.

⁹ Dé miomian é ke Kazambale lé né nya, Kazambale bli a ’bɛzan gi, amalé ’bɛzan ’ka wenyané kɛla lo. É a Kazambale lé né nya, ’bɛzamalé é ’ka bɔa wenyané kɛlɛle lɛ lo.

¹⁰ We ’ko ma lé woo Kazambale lé nénu dɔɔan yé woo yo lé nénu dɔɔan. Dé miomian é ’ka we tegele kɛla lo, ’té é ’ka Kazambale zé nya lo, yé mianzan bwe ’ka sɔ lɛ ’é lɛ lo, ’bɛzan ’ka Kazambale zé nya lo é ziin.

’Ka sɔ ka ke lɛ

¹¹ Wean wa fe ka lɛ yé ka a ’ma a pélisia bléyi va fɔɔ kyɔ, yee lé é ke ’ko: é a lé kaa sɔ kaa ke lɛ.

¹² Kain lé é ke Satan zé nya yé é é zuané gyɛ, té kaa kɛlɛ bélé yee zo lo. Mɛwemalé é a gyɛɛ? Abozen kɛlɛwenu a é naané, yé a zuané zé a tegele, bɛwemalé é a gyɛ.

¹³ An zuanénu, dé ka za a tɛrɛlamunu gi, té ka gi é vuru ’bɛ ma lo.

¹⁴ Bwenu sɔ kaa lɛ, bɛwemalé kaa a gi dɔɔ léé, kaa si gale va yé kaa go vole é yuɛma va. Mian sɔlɛle ’ka a gi lo, ’bɛzan a ga wuo.

¹⁵ Dé mianzan bwe za ke é gi, ’té ’bɛzan a migyɛzan nya. Yé ka a gi dɔɔ léé, vole é yuɛma lé a glɛ ’ka lo, é ’ka migyɛzan do kpen zé nya lo.

¹⁶ Ko sɔlɛle dɔɔ wean ma, yee lé é ke ’ko: Jézu ga kaalé we gi, yé kaa é ziin, é a lé kaa ga kaa bwenu lé we gi.

¹⁷ Dé tɛrɛlafɛnu a mi do lee, yé é a ye léé, é bwe mawe a fɛ do gi yé é bli lɛ tan a ma, Kazambale va sɔlɛle a ’bɛzan gi kaa?

¹⁸ Né kiénénu, té kaa mi lɔrɔ pa dérenu valé kaa nɛnɛ saa nya lo, naa, kaa mi lɔrɔ pa webozen valé we kɛlɛle nya ma.

Ko bli ta dɔ plɛplɛ Kazambale yara

¹⁹ ’Bɛna lé kaa dan a gi dɔɔ lɛ léé, kaa a webozen va, ’té kana ’ka dan kɛlɛ lɛ kaa gi dɔle Jézu ’lɛ we ma lo.

²⁰ Naa, dé kaa bli kaa gyɛ we nya, Kazambale a blɛn é mini kaa bli ta, yé é we faa dɔɔ.

²¹ Ka lé ka sɔ an lɛ, dé kaa bli ’ka kaa gya we nya lo, ’té kaa bli ta a é dɔle plɛplɛ Kazambale yara.

²² Dé kaa fɛofɛan laa Bale lee, kaa a yé a va, kaa a alé bélidɔwenu kɛlɛna, é valé a sɔlɛwenu nya, azama.

²³ Alé bélidɔwe lé é ke ’ko: kaa bli vo a Be Jézu Krist tɔ lɛ ma, yé kaa sɔ kaa ke lɛ, bélidɔwe lé Jézu a nɔ kaa lɛ, a yɛrama.

²⁴ Mian éé alé bélidɔwenu kɛla, ’bɛzan a Kazambale gi, yé Kazambale a ’bɛzan gi. A léli lé é a nɔ kaa lɛ, a nya lé kaa gi dɔɔ léé, é a kaa gi.