1 Jan 2 - Kazambale lé Sebe Sauunu 1979

Krist a ko ta weblezan nya

¹ Anlé né kiénénu, maa a we ’konu gyɛna ka lɛ, té ka wenyané kɛlɛ lo we ma. Yé dé mianzan wenyané kɛlɛ, kaa ta weblezan a kaa Ti sɔnɔ mi, yee lé é ke mi tegele Jézu Krist nya.

² Yeebozen kɛlɛ kaalé wenyané ’yibofɛ nya, kaa saa zé wenyané kaan lo, tɛrɛ faa la munu koo é ziin.

³ Dé ko Jézu lé bélidɔwenu kɛla, ’bɛna lé ko gi dɔɔ léé, ko Jézu dɔɔ.

⁴ Mian éé a fé léé: Maa Jézu dɔɔ, yé é ’ka alé bélidɔwenu kɛla lo, ’bɛzan a viéwona yé webozen ’ka ’bɛzan gi lo.

⁵ Naa, mian éé tawoo Jézu dére ta, Kazambale lé sɔlɛle boen a ’bɛzan gi weboen nya. Ka a Jézu gi weboen nyaa? A tɔmase lé ke ’ko:

⁶ Mian é léé, ’é a Jézu gi, é a lé ’bɛzan ’é tawo é ziin bélé fɛan zo lé Jézu tawo, a zo.

Bélidɔwe dɛrɛ

⁷ ’Kaa lé ka sɔ an lɛ, maa ’ka bélidɔwe dɛrɛ gyɛna ka lɛ lo. Bélidɔwe kyɛn lé ka a ’ma a pélisia bléyi va, yee lé. Bélidɔwe kyɛn ’ko, yee lé é ke dére lé ka a ’ma bɛ, a nya.

⁸ Naa, duowo, bélidɔwe dɛrɛ lé maa a gyɛna ka lɛ. We ’ko na a é gɔɔnle Jézu lé tawobɛ gi, yé a na a é gɔɔnle é ziin kazé tawobɛ gi, naa, gunutinu a giéna yé san bozen da é kwakwa.

⁹ Mian é léé, ’é a san va, ’té a bwe za a a gi, é a tan gunutinu va.

¹⁰ Mian a bwe é sɔa a lɛ, é a san va, yé we do kpen ’ka a gi a saanwe nya lo.

¹¹ Naa, mian a bwe za ke a gi, é a gunutinu va, yé é a tawona gunutinu va yé gunutinu a yuɛ ’wii, amalé é ’ka é gona dɔɔa lo.

¹² Anlé né kiénénu, Bale ka ma we vo Jézu tɔ lé we ma, amalé maa a sɛbɛ ’ko gyɛna ka lɛ.

¹³ Né tinu, mi lé é ke ana tɛrɛ bɔrayi nya, ka a dɔɔ, amalé maa a sɛbɛ ’ko gyɛna ka lɛ. ’Kaa pɛniɛnu, ka Satan kele, amalé maa a sɛbɛ ’ko gyɛna ka lɛ. Anlé né kiénénu, ka Ti dɔɔ, amalé maa sɛbɛ gyɛ ka lɛ.

¹⁴ Né tinu, mi lé é ke ana tɛrɛ bɔrayi nya, ka a dɔɔ, amalé maa sɛbɛ gyɛ ka lɛ. ’Kaa pɛniɛnu, ka a plɛplɛ yé Kazambale dére a ka gi, yé ka Satan kele, amalé maa sɛbɛ gyɛ ka lɛ.

¹⁵ Té tɛrɛlawe valé tɛrɛlafɛnu é sɔ ka lɛ lo. Dé tɛrɛlawe sɔ mianzan lɛ, ’té Ti lɔrɔ ’ka ’bɛzan ma lo.

¹⁶ We faa lé é ke tɛrɛ la, mi dɔbɛ kyɛn lé sɔlɛwe koo, yuɛbɔle fɛ ma koo, bo kɛlɛle blɛn koo, wo ’ka sié Ti va lo. Woo sié tɛrɛlawe va.

¹⁷ Tɛrɛlawe éé giéan, é valé ’é sɔlɛwenu nya é ziin. Naa, mian éé Kazambale lé blibɔmawe kɛla, éé voo ana lɛɛfaama.

Kristmazan

¹⁸ Né kiénénu, bléyi voéla lé é ke ’ko. Ka a ’ma léé, Kristmazan é dan da lɛ, yé sin, Kristmazannu kiɛre ana. Amalé ko a gi dɔɔ léé, bléyi voéla bɔ.

¹⁹ Wo si kaa méléna, naa, wo ’ka kaazé nya lo. Dé é vo léé, kaazé lé é ke wo nya, ’té wo vo kaa va kɔɔn. We ’ko kɛlɛle ma lé munu faa a gi dɔɔ léé, wo faa ’ka kaazé nya lo.

²⁰ Yé ka zin ye mi sauun Jézu va, yé ka faa we dɔɔ.

²¹ É ’ka kɛlɛ lɛ léé, ka ’ka webozen dɔɔa lo, bɛwemalé an sɛbɛ gyɛ ka lɛ lo. Naa, ka webozen dɔɔ, ’bɛzama, yé vié do kpen ’ka sié webozen va lo.

²² Viézan lé é ke de nyaa? É ’ka mian é léé, Jézu ’ka Krist nya lo, yee ɛ nya loo? Yé mi lé, é léé, Kazambale ’ka Jézu Ti nya lo, yé Jézu ’ka Kazambale Be nya lo, yee ɛ ke Kristmazan nya.

²³ Dé mian éé a fé léé, Jézu ’ka Bale Be nya lo, ’té Bale ’ka ’bɛzan Ti nya lo; mi lé é a fe léé, Jézu a Bale Be nya, ’té Bale a ’bɛzan Ti nya é ziin.

²⁴ We lé ka a ’ma a pélisia bléyi va, ’é vo ka gi ma. Yé we lé ka a ’ma a pélisia bléyi va, dé é vo ka gi, ’té ka dan vo lɛ Be valé Ti gi é ziin.

²⁵ We lé Jézu a ma blivolɛdére fe kaa lɛ, yee lé é ke ’ko: kaa dan vo lɛ é yuɛma lɛɛfaama, a glɛ ’ka lo.

²⁶ Maa we ’konu gyɛ ka lɛ ka ’wuo?-?sɛrɛzannu lé we ma.

²⁷ Krist é Léli zén ka ta; dé a Léli nyana ka gi, ka mawe ’ka a gi léé, mi é we paa ka gi lo. Naa, we faa lé a Léli ke a paana ka gi bɛ, é a webozen nya yé é ka vié nya lo, bɛwemalé ’ka vo Jézu gi, a Léli we paa ka gi fɛan zo, a zo.

²⁸ Sin, né kiénénu, ’ka vo Jézu gi, yé dé é bɔra kaa yuɛ va yé kaa bli ta dɔ plɛplɛ, yé dé a dabléyi bɔ yé yara ’ka kaa gya yé é kaa si ’é ma baa lo.

²⁹ Dé ka a gi dɔɔ léé, Kazambale a tegele, ka a gi dɔɔ é ziin léé, mian éé we tegele kɛla, é a Kazambale lé né nya.