1 Jan 1 - Kazambale lé Sebe Sauunu 1979

Mibélidére

¹ Yee lé é ke ana a pélisia bléyi va fɔɔ kyɔ, yé ko a ’ma, yé ko a ye ko yuɛ nya, yé ko a nagini, yé ko bɛ mane a ma, yee ɛ lé we lé ko ke a fena. Mibélidére lé;

² wo yee bélile nagɔɔn ko lɛ, yé ko a ye yé ko kɛlɛ a nayezannu nya, yé yee bélile lé a glɛ ’ka lo, é a Ti va yé é a nagɔɔn ko lɛ, yé yee lé ko ke a fena ka lɛ.

³ Yee lé ko a ye yé ko a ’ma, ko a yee ɛ fena ka lɛ, kaa kɛlɛle do we ma. Naa, ko a é kɛlɛle do kaa Ti valé é Be Jézu Kristnu nya.

⁴ Yé ko a we ’konu gyɛna kaa gi nanale tegele we ma.

Kazambale a san nya

⁵ We lé ko a ’ma a ta, yé ko ke a fena ka lɛ ’ko, yee lé é ke léé, Kazambale a san nya, yé gunuti do kpen ’ka a va lo.

⁶ Dé kaa fe léé, kaa a wo nya mi do, yé ’té kaa tawoo gunuti va, ’té vié lé kaa ke a wona, ’té kaa ’ka we kɛlɛna webozen yɛrama lo.

⁷ Naa, dé kaa tawoo san va, bélé fɛan zo lé yeebozen ke san va, a zo, ’té kaa a mi do nya, ’té a Be Jézu nyɛ éé wenyané faa sié kaa lee, ’té éé kaa kɛla tata.

⁸ Dé kaa fe léé, kaalé wenyané ’ka lo, ’té kaa a dabli kɛlɛna kaabozen lɛ, ’té webozen ’ka kaa gi lo.

⁹ Dé kaa kaalé wenyanénu fe, Bale a yarapawelazan nya yé é a tegele yé é kaa ma we voo yé éé weple faa sié kaa lee, yé é kaa kɛla tata.

¹⁰ Dé kaa fe léé, kaa ’ka wenyané kɛlɛ lɛ lo, ’té kaa a Bale kɛlɛna viézan nya, ’té a dére ’ka kaa gi lo.