1 Tɛsalɔnik munu 5 - Kazambale lé Sebe Sauunu 1979

Bo ma’lɛrɛle Jézu dale we ma

¹ Bwenu, é ’ka lé maa bléyinu valé yinu lé we gyɛ ka lɛ lo.

² Kabozen a gi dɔɔ é zima léé, Mizan dayi é dan bɔ lɛ bélé kyeenwozan zo é béli.

³ Dé munu a fena léé, ’wa drɔɔ, we do ’ka ’wo ma lo, kele tɔɔn yé mi?-?gyɛwe é bɔra wo ma fiaa, bélé fɛan zo lé nyanéblele tɔntɔn éé bɔraan bɔnzan ma fiaa a zo, yé wo ’ka bɔa sole lɛ a gi lo.

⁴ Naa, bwenu, ka ’ka gunutinu va yé ’bɛ yi ’ko é bɔ ka ma fiaa bélé kyeenwozan dale zo lo.

⁵ Ka faa va a é kinile; yé ka a é ziin yiéyi munu nya. Kaa ’ka béli valé gunu vamunu nya lo.

⁶ Bɛwemalé, té kaa yi gyɛ bélé mi pɔnénu zo lo; kaa vo é yuɛma yé kaa kaabo kun.

⁷ Yigyɛzannu éé yi gya é béli; yé nwɛgyɛzannu éé nwɛ minian é béli.

⁸ Naa, kaa lé kaa ke yiéyi munu nya, kaa kaabo kun ma; blipale valé sɔlɛle ’é kɛlɛ kaa golɛtayɔɔfɛ nya; yé bli kɛlɛle sile we gi lɛ ’é kɛlɛ kaalé kanakoro nya ma.

⁹ Naa, Kazambale ’ka kaa kɛlɛ lɛ léé, é bli é fli kaa ma lo; naa, é kaa kɛlɛ léé, Jézu Krist ’é kaa béli.

¹⁰ É ga kaalé we ma, léé, dé kaa a é yuɛmaoo, dé kaa a yiɛnaoo, kaa béli a va.

¹¹ Bɛwemalé, ’ka we pla ka ke lɛ, yé ’ka ka ke dɔ gligli, bélé fɛan zo lé ka ke a kɛlɛna, a zo.

We nyaala valé weale

¹² Bwenu, kalé zanté; munu lé woo Bale lé nyanama paan ka va, ’té wa ka zilɛzannu nya Mizan gi, ’té woo we plaan ka lɛ bɛ, ’ka wo lɛdɔma.

¹³ Wo va sɔlɛle ’é kɛlɛ ka bli gi blɛɛn wo panyanama lé we ma. ’Ka vo ka ke va drɔɔ.

¹⁴ Bwenu, kalé zanté. Munu lé wo ’ka we tegele kɛla lo, ’ka we pla wo lɛ. Munu lé wo fuu si wo ta, ’ka wo tɔrɔ paa. Munu lé wo ’ka plɛplɛ Kazambale lé we gi lo, ’ka bɔ wo va. Ka bli ’é kɛlɛ tiéé munu faa ma.

¹⁵ ’Ka yuɛ pa kabozen va léé, té mi do é wenyané lɛgi pa é bɔluzan ma wenyané nya lo. Naa, ’ka yara pa wezin kɛlɛle ta ka ke lɛ, é valé munu faa lɛ.

¹⁶ Ka gi ’é nana yifaama ma.

¹⁷ Té ka daan bazorole ma lo.

¹⁸ Wean é sɔ Kazambale lɛ léé, ka a kɛlɛ Jézu Krist gi, yee lé ke ’ko: ’ka Kazambale bɔ vɔ we faa gi.

¹⁹ Té ka Kazambale Léli dɔ lo.

²⁰ Té ka balelawefelenu ye boawe nya lo.

²¹ ’Ka wenu faa va si. ’Ka kun a zin ma ma.

²² ’Ka sɔn vɔ wenyané gɔnɔ faa ma.

²³ Mi vo drɔɔ Bale bozen ’é ka kɛlɛle sauun lɛ sɔɔ; ka léli koo, kabozen koo, ka kɔlɛ koo, wo faa ’é vo é tadɔle, ’té gun ’ka a ma lo fɔɔ yé Kaazan Jézu Krist dayi é bɔ.

²⁴ Mi lé é ka laa, é a yarapawelazan nya, yee ɛ dan a kɛlɛ lɛ.

²⁵ Bwenu, ’ka bazoro ko tɔ ma.

²⁶ ’Ka we bwenu faa va ka bɔn gi fu nya.

²⁷ An we plaan ka lɛ Mizan tɔ nya léé, ’ka sɛbɛ ’ko ta fe bwenu faa yuɛ va.

²⁸ Kaazan Jézu Krist lé zin ’é vo ka ta ma.