1 Tɛsalɔnik munu 4 - Kazambale lé Sebe Sauunu 1979

Tawogane lé é sɔ Kazambale lɛ

¹ É ziin, bwenu, é a lé kalé tawogane é kɛlɛ fɛan zo yé kalé we é sɔ Kazambale lɛ, ko a fe ka lɛ. Yé ka a tawona ko dére ta. Ko a zanté vɔna ka lɛ, ’té ko we plaan ka lɛ Mizan Jézu tɔ nya léé, ’ka a kɛlɛle gi gyɛ.

² Wenu lé ko wo pla ka lɛ Mizan Jézu dére nya, ka wo dɔɔ.

³ We lé é sɔ Kazambale lɛ, yee lé ke léé, ’ka kɛlɛ sauun, té ka pɛnpɛnné gyɛ lo;

⁴ ka faa do do kabo kun, ka kɔlɛ vole sauun valé wéiin we gi.

⁵ Té ka kabo nɔ le lé we gi bélé fɛan zo lé yolémunu lé wo ’ka Kazambale dɔɔa lo, wa kɛla fɛan zo, a zo lo.

⁶ Té mi do é wenyané ’ko zo kɛlɛ é bwe lɛ lo. Mizan ɛ ’bɛ zoɛ wenu lɛgi paan; yee lé ko a fe ka lɛ é kyɛn, yé ko a gɔɔn ka lɛ wéiin.

⁷ Kazambale ’ka kaa laa lɛ pɛnpɛnnégyɛle we ma lo, naa, é kaa laa kaa kɛlɛle sauun we ma.

⁸ Bɛwemalé mian éé sɔn vɔa we plalenu ’ko ma, é ’ka sɔn vɔ lɛ mi ma lo, naa, Kazambale lé é Léli Sauun nɔ ka lɛ, é sɔn vɔ yee ɛ ma.

⁹ Dé é a ka sɔle ka ke lɛ lé we nya, Kazambale ɛ ke ’bɛ paana ka gi, amalé é ’ka lé maa we ’ko gyɛ ka lɛ lo.

¹⁰ Webozen lé, bwenu lé wo ke Masédɔane tɛrɛ faa la, ka wo lɔrɔ paan é ziin. Naa, bwenu, ko we plaan ka lɛ léé, ’ka ka ke lɔrɔpale gi gyɛ é ziin,

¹¹ yé ka bli ’é bɔ we ’konu ma ma: ’ka vo drɔɔ, ’ka yara pa kabozen lé we ɛ ta, ’ka nyanama pa kabo bɛ nya, ko fe ka lɛ fɛan zo é kyɛn bɛ, a zo.

¹² ’Bɛ zo lé, kalé tawogane é dan drɔ lɛ yolémunu va, ’té ka ’ka kɛla mi do kpen nwiin kɔné nya lo.

¹³ Bwenu, ko ’ka a va léé, ka vo ka tanyila, munu lé wo ke yiɛna, wolé we ma lo; té ka bli kyɛ é dɔ bélé munu lé wo bli ’ka we do lɛ lo, wozé zo lo.

¹⁴ Dé ko dɔ a ta léé, Jézu ga yé é nwa é ziin, é a lé ko dɔ a ta é ziin léé, munu lé wo ga Jézu gi, Kazambale é dan wo pa lɛ Jézu va yé é da wo nya.

¹⁵ Wean ko a fe ka lɛ Mizan dére nya, yee lé é ke ’ko: Ko lé, Mizan é dan bɔ lɛ ko ma é yuɛma, ko ’ka dan gié lɛ munu lé wo ga é kyɛn, wo ’lɛ lo.

¹⁶ Naa, dé tɔmase do bɔ, dé lanjenuzan siaa, dé Kazambale lé béli we, ’bɛ bléyi nya tɔɔn, ’té Mizan bozen é dan si lɛ la gi yé é zun, yé munu lé wo ga Krist gi, wo dan nwa lɛ é vinin.

¹⁷ ’Bɛ zuo yé ko mi yuɛmalenu lé, ko vo ’ko, wo dan ko faa sia lɛ ékeva wo nya latinu ta, keele we gi Mizan nya la worona. A zo lé ko dan vo lɛ yifaama Mizan va.

¹⁸ Bɛwemalé, ’ka ka ke tɔrɔ paa dére ’konu nya ma.