Minwiinzannu lé Wezuofe Sɛbɛ 5 - Kazambale lé Sebe Sauunu 1979

Rubɛn — Gad — Manasé, wo kulunu

¹ Izraɛl lé né vininzan Rubɛn benu: Rubɛn a é ti lé né vininzan nya; naa, é ’é ti lé yialafɛ tiri dɔ, yé alé né vininzan dɔna kɛlɛ Izraɛl be Jozɛfu kulunu zé nya; duowo é ’ka lé wo Jozɛfu tɔ gyɛ wo tranu tɔgyɛlasɛbɛ gi Izraɛl lé né vininzan nya lo.

² Weboen lé, Juda a plɛplɛ é bwenu méléna, yé a kululazan do kɛlɛ mi blɛn nya, naa, né vininzan dɔna a Jozɛfu zé nya.

³ Izraɛl lé né vininzan Rubɛn benu: Énɔk, Palu, Esrɔn, Kaami.

⁴ Joɛl benu: Sémaéja, ’bɛ be Gɔg, ’bɛ be Siméi,

⁵ ’bɛ be Misé, ’bɛ be Réaja, ’bɛ be Baal,

⁶ ’bɛ be Bééra; yee lé Asiri munu nwiinzan blɛn Tiglat‐Pilézɛɛ go a nya luu gi; é a Rubɛnnu va mi blɛn nya.

⁷ Bééra bwenu, wo gɔnɔla ma gɔnɔla ma, wo wo tɔ gyɛ ’wo tra tɔgyɛlasɛbɛ gi, wo kulu é kulu yɛrama: a vininzan Jéiɛl, Zakari;

⁸ Béla a Azaz be nya, Azaz a Séma be nya, Séma a Joɛl be nya. Béla lé munu éé nyanaan Aroɛɛ, yé wo bɔ fɔɔ Nébo valé Baal‐Méɔn;

⁹ yirinwanazia, wo nyanale éé sié Yufrat yuu va, fɔɔ yé é bɔ nyéné saa lé fɛna pélisiana, naa, wolé trubɛnu a kiɛre Galaad tɛrɛ la.

¹⁰ Saul bléyi va wo guli dan Agarénu va, yé wo wo kele; yé wo nyana wolé sɔkɔnnu wuo, Galaad yirinwanazia glɛ faa la.

¹¹ Gad kulunu éé nyanaan wo yara, Bazan tɛrɛ la, fɔɔ yé é bɔ Salaka.

¹² A vininzan Joɛl, a fiézan Safam, Jaénai, Safat, wo nyana Bazan tɛrɛ la.

¹³ Wo bwenu, wo tranu gɔnɔ yɛrama: Mikaɛl, Mésulam, Sééba, Jorai, Jaékan, Zia, Ébɛɛ, mi sɔrafié.

¹⁴ Abisail benu: é a Uuri be nya, Uuri a Jaroas be nya, Jaroas a Galaad be nya, Galaad a Mikaɛl be nya, Mikaɛl a Jésisai be nya, Jésisai a Jakado be nya, Jakado a Buz be nya;

¹⁵ Guni be Abidiɛl be Aki a mi blɛn nya wo tranu lé gɔnɔla.

¹⁶ Woo nyanaan Galaad valé Bazan tɛrɛ la flanu ta, ’bɛ valé Sarɔn lé flaginima tɛrɛnu ta fɔɔ yé é bɔ wo glɛ la.

¹⁷ Wo faa tɔ a é gyɛle ’wo tra tɔgyɛlasɛbɛ gi, Juda nwiinzan blɛn Jotam valé Izraɛl nwiinzan blɛn Jéroboam bléyi va.

¹⁸ Rubɛnnu koo, Gadnu koo, Manasénu lɛgɔnɔ do koo, nyanazannu a wo va; botakuunfɛ valé gwɔun a wo lee, yé wo sa ganale dɔɔ, yé wo bla bo gulidanle gi. Wo va munu lé wo ma ke é ’lɛrɛle gulidanle we ma, wa mi baa yɔ do wɔlɛ fié, é ta lé mi wuru yaa yɔ sɔraa.

¹⁹ Wo guli dan Agarénu va, Jétuu koo, Nafis koo, Nodab koo, wona.

²⁰ Mi bɛnu da bɔ lɛ wo va, yé wo Agarénu valé wo vamunu faa kele. Naa, gulidanbléyi va wo siaa Kazambale lɛ, yé wo ’wobo bɛ pa a lee, amalé Bale a ’ma.

²¹ Wo wolé trubɛnu si: nyɔgɔménu baa yɔ do wɔlɛ soru koo, ’bla baa yɔ suiɛdo wɔlɛ soru koo, sokofale baa do koo, woo lé; yé wo mi baa yɔ fié wɔlɛ vu si é ziin.

²² Guli ’ko si Kazambale va, amalé mi kiɛre ga. Yé wo nyana Agarénu pa gi, fɔɔ yé é bɔ wo gobléyi va luu gi.

²³ Manasé lɛgɔnɔ do nyanale sia Bazan tɛrɛ la fɔɔ yé wo bɔ Baal‐Eɛmɔn gɔ valé Sénii gɔ valé Eɛmɔn gɔ ma; wa di.

²⁴ Wo tranu lé guniwuonu lé ke ’ko: Éfɛɛ, Jiséi, Éliɛl, Azriɛl, Jérémi, Odavia, Jakadiɛl; wa nyanazannu nya, yé wo tɔ ye, yé wo kɛlɛ guniwuonu nya.

²⁵ Naa, wo wenyané kɛlɛ wo tranu lé Bale ma; ana tɛrɛlamunu lé Kazambale wo gyɛ wo ’lɛ, wo go ’bɛnu lé balenu zuo.

²⁶ Yé Izraɛl lé Bale Pul valé Tiglat‐Pilézɛɛ bli nwa, ’té ’bɛnu ke Asirimunu nwiinzan blɛnnu nya bɛ, yé Tiglat‐Pilézɛɛ go Rubɛnnu valé Gadnu valé Manasénu lɛgɔnɔ do nya luu gi; é go wo nya Salaki koo, Sabɔɔ koo, Aara koo, Gozan yuu koo, wona, yé woo nyanaan ’bɛna fɔɔ kyɔ yi ’ko nya.