Minwiinzannu lé Wezuofe Sɛbɛ 29 - Kazambale lé Sebe Sauunu 1979

Wo fɛnu nɔ Balebangikɔn dɔle we ma

¹ Minwiinzan blɛn David lé munu faa lé wo ke é zénle ékeva, wo lɛ léé: An be Salomɔn lé Kazambale a si a va é do kpen, é a mi boroné nya, yé a lɛɛ ’ka kiɛre lo, yé nyanama ’ko a blén, naa, fuakɔn ’ko ’ka mi zé nya lo, é a Gakelebale ɛ zé nya.

² An fɛnu ma’lɛrɛ anlé Bale lé kɔn zé nya an bli faa nya; an kyan téé kyanfɛnu zé nya; an gɔɔlifu téé gɔɔlifufɛnu zé nya, an zéné téé zénéfɛnu zé nya, an foliɛwɔlɛ téé foliɛwɔlɛfɛnu zé nya, an yili téé yilifɛnu zé nya, ɔnisigɔlɛnu valé gɔlɛwezannu lé wo dan wo vɔ lɛ ’wo vɔgikyan gi koo, gɔlɛwezan nyananyana valé gɔlɛ yuɛ kiɛre koo, gɔlɛwezan gɔnɔ faa koo, gɔlɛfu plɛplɛ kiɛre kiɛre koo, maa wo faa téé wo kɛlɛfɛnu zé nya.

³ ’Bɛ ta loru, anlé Bale lé kɔn lé we a an gi blɛn fɔɔ, yé maa anbo lé kyan valé gɔɔlifu nɔ anlé Bale lé kɔn lé we ma é ziin, yee lé maa a ma’lɛrɛ kɔn sauun lé we ma, ’bɛ a é bɛ;

⁴ Ofii kyan talan baa do wuru soru koo, gɔɔlifu lé wa ’yibo, a talan baa yaa wuru soru koo, maa ’bɛ nɔ a sɔɔlale kɔn gurunu ma we ma,

⁵ maa kyan nɔ, kyanfɛnu kɛlɛle we ma, yé maa gɔɔlifu nɔ gɔɔlifufɛnu kɛlɛle we ma, ’bɛ valé nyanama faa lɛsɔɔle we ma. É sɔ de ɛ lɛ é ziin léé, ézé blɛ drɔɔ kɛlɛ Gakelebale lɛ kyɔɔ?

⁶ Guniwuonu koo, Izraɛl bɛnnu nwiinzannu koo, mi wuru soru soru valé mi yɔ soru soru nwiinzannu koo, minwiinzan blɛn leezannu koo, wo blɛ drɔɔ kɛlɛ.

⁷ Kyan talan baa fié wuru soru koo, gɔɔli lé wa laama dariki, ’bɛ baa soru koo, gɔɔlifu talan baa soru koo, zéné talan baa sɔraziɛn koo, foliɛwɔlɛ talan baa yɔ fié wɔlɛ vu koo, wo bɛ faa nɔ Kazambale lé kɔn lé nyanamapafɛnu nya.

⁸ Munu lé gɔlɛwezannu ke wo lee, wo wo nɔ Gɛɛsɔn mi Jééiɛl lɛ, yé ’bɛ a tadɔ Gakelebale lé kɔn lé fɛwezannu tadɔna.

⁹ Munu gi nana wolé blɛ drɔɔ kɛlɛle we ma, naa, wo bli zin nya lé wo blɛ ’konu kɛlɛ Gakelebale lɛ; yé minwiinzan blɛn David gi nana fɔɔ é vɔ a ma wu nya.

David bazoro

¹⁰ David Gakelebale drɔɔ vo zén‐ékevamunu faa yuɛ va. É léé: Gakelebale, ko ti Izraɛl lé Bale, i drɔɔ ’é vo lɛɛ faa tere ma, té a glɛ é dɔ lo.

¹¹ Gakelebale, fɛnu faa lé ke la gi valé fɛnu faa lé ke tɛrɛ la, wa izé nya, amalé kɛlɛle blɛn koo, plɛplɛ valé tɔ blɛn koo, vole é yuɛma lɛɛfaama valé fuasan koo, wo faa a bii ɛ zé nya; Gakelebale, bii a é nwale fɛnu faa ta loru i boan, amalé i plale mi nwiin yara lé.

¹² Fuafɛnu valé fuasan éé sié bii ɛ va, bii ɛ plaan fɛnu nwiin, gla kɛlɛle valé plɛplɛ a bii ɛ lee, i bɛ ɛ sɔa fɛ blɛnnu faa kɛlɛle valé wo dɔle gligli nya.

¹³ Oo kolé Bale, sin ko i tɔ zin fé, yé ko i tɔ ma gya.

¹⁴ Maa a de nya, yé anlé munu a de nya, yé ko bɔa blɛ drɔɔ ’ko kɛlɛle lɛ i lɛɛ? Fɛ faa sié bii ɛ va, yé fɛ lé ko nɔ i lɛ ’ko, bii ɛ nɔ ko lɛ.

¹⁵ Ko a bɛnnu valé giézannu nya i yuɛ gi, bélé ko tranu faa zo; kolé tɛrɛla yinu a bélé furɔ zo, yé ko bli ’ka we do lɛ lo.

¹⁶ Gakelebale, kolé Bale, fuafɛ ’konu faa lé ko wo ma’lɛrɛ kɔn dɔle i lɛ i tɔ sauun biéle we ma, bii ɛ nɔ ko lɛ yé wa bii ɛ zé nya.

¹⁷ Oo, anlé Bale, maa gi dɔɔ léé, i mi bli gi ginian yé we drɔle sɔ i lɛ; é ziin, maa blɛ drɔɔnu ’ko faa nɔ i lɛ an bli gi drɔle nya, yé maa ye léé, ilé munu lé wo ke ’ko, wo blɛ ’konu kɛlɛ i lɛ bli drɔɔ nya, yé ’bɛ an gi nana.

¹⁸ Gakelebale ko tranu Abraam koo, Izak koo, Izraɛl koo, wolé Bale, ’i bligiwe ’ko valé gibɔrɔle ’ko vo ilé munu bli gi yifaama, yé i wo dɔ gligli i va.

¹⁹ Ilé bélidɔwenu koo, ilé weplalenu koo, i sɔnnénu koo, ’i wo lɛdɔama bli vɔ an be Salomɔn gi, yé ’é we ’konu faa kɛlɛ, yé fuakɔn lé maa a dɔfɛnu ma’lɛrɛ, yé ’é a dɔ ma.

²⁰ David lé, munu faa lé wo ke é zénle ékeva, wo lɛ léé: ’Ka Gakelebale kalé Bale drɔɔ vo. Yé zén‐ékevamunu faa Gakelebale, wo tranu lé Bale drɔɔ vo. Wo dia ’wo bli la Gakelebale valé minwiinzan blɛn ’lɛ.

²¹ ’Bɛ é tu kini wo Gakelebale ban dirigɔné wuru soru koo, boligɔné wuru soru koo, ’blané wuru soru koo, baleban’yi koo, saraka bɛnu kiɛre kiɛre koo, wo nya, Izraɛlnu faa zé nya.

²² ’Bɛ yi la wo fɛ ble yé wo fɛ mini Gakelebale ’lɛ gi nanale blɛn nya; wo David be Salomɔn dɔ ’wo nwiinzan blɛn nya a gɔnɔ fiézan nya, yé wo nyɔnɔ zén a nwiin Gakelebale ’lɛ a kɛlɛle minwiinzan nya we ma, yé wo nyɔnɔ zén Sadɔk nwiin léé, ’é kɛlɛ Balebanzan nya.

²³ Salomɔn nyana minwiinzan blɛn nya Gakelebale lé webleblin ta, ’é ti David pa gi. Alé we faa vɔ a ma, yé Izraɛlnu faa a lɛdɔama.

²⁴ Minwiinzannu faa valé tɔzannu pla minwiinzan blɛn Salomɔn wuo, minwiinzan blɛn David benu boen‐oo.

²⁵ Gakelebale Salomɔn tɔ kɛlɛ blɛn Izraɛlnu faa yuɛ va, yé a plale mi nwiin bléyi va Izraɛl a tɔ kɛlɛ gyéiin é mini Izraɛl minwiinzan blɛnnu faa lé wo ke a ’lɛ, wo faa ta.

David gale

²⁶ Izai be David pla Izraɛl faa nwiin.

²⁷ É pla Izraɛl nwiin lɛɛ yɔ fié; é pla wo nwiin Ébrɔn lɛɛ sɔrafié, yé é pla wo nwiin Jérusalɛm lɛɛ yɔ do wɔlɛ vu ta yaa.

²⁸ É kwa gyɛ ginanale nya yé é ga; a yi a kiɛre yé alé fuafɛnu valé a tɔ bɔle fan. Yé a be Salomɔn pla munu nwiin a pa gi.

²⁹ Minwiinzan blɛn David kɛlɛwenu, a vininzannu valé a voélazannu, wa é gyɛle fɛnayezan Samuɛl koo, balelayezan Natan koo, balelayezan Gad koo, wolé sɛbɛnu gi;

³⁰ wenu faa lé wo bɔ a plale mi nwiin bléyi va, alé we blɛnblɛn kɛlɛlenu, ’bɛ valé we faa lé wo bɔ azé bléyi va, dé wa Izraɛl tɛrɛ laoo, dé wa tɛrɛ bɛnu taoo, wa é gyɛle yee sɛbɛnu gi.