Minwiinzannu lé Wezuofe Sɛbɛ 28 - Kazambale lé Sebe Sauunu 1979

David we pla Salomɔn lɛ Balebangikɔn dɔle we ma

¹ David Izraɛl munu nwiinzannu faa laa, léé, ’wo da Jérusalɛm. Bɛn do do nwiinzannu koo, minwiinzan blɛn lé nyanamapamunu palunu nwiinzannu koo, mi wuru soru soru valé mi yɔ soru soru nwiinzannu koo, munu lé minwiinzan blɛn lé fuafɛnu valé alé trubɛnu ke wo lee, ’té wa a benu va, wo koo, miblalenu koo, tɔzannu valé nyanazannu faa koo, David wo laa.

² Minwiinzan blɛn David dɔ loru yé é léma: Anlé munu, an bwenu, ’ka tɔné dɔ an lɛ. É a an gi léé, ’an kɔn dɔ yé ’bɛ é kɛlɛ Gakelebale lé gipawe pagikɛsu flinna valé kolé Bale gane dɔrana nya, yé maa a anbo ma’lɛrɛna a dɔle we ma.

³ Naa, Kazambale lé an lɛ léé, maa a gulidanzan nya yé an mi kiɛre nyɛ zana, amalé an ’ka dan kɔn dɔ lɛ ’é tɔ bɔle we ma lo.

⁴ Gakelebale, Izraɛl lé Bale an si an ti gɔnɔ la, an kɛlɛle Izraɛl nwiinzan blɛn nya lɛɛfaama we ma; naa, é Juda si a va yé é né vininzan dɔna nɔ ’bɛ lɛ; yé é an ti gɔnɔ si a va Juda kulunu va, yé an ti benu va é maa ɛ si a va, léé, an pla Izraɛl faa nwiin.

⁵ Yé é négɔnénu nɔ an lɛ kiɛre, yé é an be Salomɔn si wo va, léé, ’é pla Izraɛlmunu nwiin, yé ’é nyana Izraɛl munu lé webleblin ta.

⁶ É lé an lɛ léé, an be Salomɔn ɛ dan ’élé kɔn valé ’élé gɔrɔnu dɔ lɛ, naa, ’é a si ’é be nya, yé ’é dan kɛlɛ lɛ a ti nya.

⁷ É léé, ’é dan Salomɔn plale mi nwiin dɔ lɛ gligli, ’té dé é ’élé bélidɔwe lɛdɔ ma yé é a sɔnnénu pa bélé éé a kɛla fɛan zo kyɔ, a zo. A zo lé Gakelebale a fe an lɛ.

⁸ Sin, Gakelebale lé zén‐ékevamunu faa yuɛ va, Izraɛl faa yuɛ va, kolé Bale lé é ke é tɔné dɔna ko lɛ, a yuɛ va, maa lé ka lɛ léé, ’ka Gakelebale, kalé Bale lé bélidɔwenu faa lɛdɔma ka bli faa nya, tɛrɛ zin ’ko kɛlɛle kazé nya we gi, yé é vo ka zarafɛ nya ka benu lee, lɛɛfaama a glɛ ’ka lo.

⁹ Yé bii, an be Salomɔn, ’i i ti Bale dɔɔ ma, bé kun i bɛ fié nya, bélé nyanama pa i bli faa nya ma, naa, Gakelebale éé mi faa bli gi ginian fɔɔ yé é bɔ a wɔlɛ ma, yé é mibligiwe valé mi lé gibɔrɔlenu faa dɔɔ. Dé bé nagini, é dan zi nɔ lɛ i lɛ léé, i ’é ye; dé i sɔn vɔ a ma é dan sɔn vɔ lɛ i ma yifaama.

¹⁰ ’É dɔ i bɔn‐in léé, Gakelebale i si a va léé, ’i kɔn dɔ ’é lɛ, ’élé fɛna sauun nya. ’I dɔ plɛplɛ, ’i we kɛlɛ.

¹¹ David Gakelebale lé kɔn lé plaan nɔ é be Salomɔn lɛ; kɔn lɛɛ koo, kɔnnu koo, fɛwezannu tadɔ kɔnmi koo, kɔnmi lorunu koo, kɔn gi kɔnnénu koo, nyanaizén mi la na lé kɔnmi koo, é ’bɛ faa lé plaan nɔ a lɛ.

¹² We faa lé ke David bli gi, Gakelebale lé kɔn gɔrɔnu koo, kɔnminu lé ke a zi fɛfaana Kazambale lé kɔn gi fɛwezannu valé fɛna sauun lé fɛwezannu tadɔkɔnnu nya, ’bɛ koo,

¹³ Balebanzannu valé Lévinu lé palunu koo, nyanama faa lé wa paan Gakelebale lé kɔn gi koo, Gakelebale lé kɔn gi nyanamapafɛnu koo, é ’bɛ faa dɔnama gɔɔn Salomɔn lɛ.

¹⁴ Kɔn gi nyanamapafɛnu lé wo dan wo kɛlɛ lɛ kyan nya, David a kɛlɛbɛ gɔɔn Salomɔn lɛ, wo kɛlɛkyan éé kilo sian do do fɛan zo, é ’bɛ fe; nyanamapafɛnu lé wo dan wo kɛlɛ lɛ gɔɔlifu nya, é ’bɛnu kɛlɛbɛ gɔɔn, yé wo kɛlɛgɔɔlifu éé kilo sian do do fɛan zo, é ’bɛ fe.

¹⁵ Kyanfintrannu valé ’wolé kyɛbɔ kiénénu, é ’bɛ kilo fe, yé é fintran do do valé élé kyɛbɔné do do lé kilo fe. É gɔɔlifu fintrannu zé kilo ’léé fe, yé é fintran do do valé élé kyɛbɔnénu do do kilo ’léé fe, wo dɔnama a fɛan zo, a yɛrama.

¹⁶ Kyantablénu lé woo Bale ’lɛburu plaan wo ta, é ’bɛnu lé kilo ’léé fe do do; yé é gɔɔlifu tablénu zé kilo ’léé fe.

¹⁷ Wiblegaannénu koo, kananu koo, kyan tegele bɔnu koo, é ’bɛnu kɛlɛbɛ nagɔɔn; ’yiminikananu lé wo dan wo kɛlɛ lɛ kyan nya, é ’bɛ kɛlɛbɛ valé a kilo nagɔɔn do do; ’yiminikananu lé wo dan wo kɛlɛ lɛ gɔɔlifu nya, é ’bɛnu é kɛlɛbɛ valé ’wo kilo nagɔɔn do do;

¹⁸ lasikɔrɔ kyɛ ble balebanna lé wo dan a kɛlɛ lɛ kyan tegele nya, é ’bɛ kɛlɛbɛ valé ’bɛlé kilo nagɔɔn. Goro koo, kyan sérubɛnnu lé woo bɛa soian Gakelebale lé gipawe pagikɛsu ta koo, é ’bɛnu kɛlɛbɛ nagɔɔn.

¹⁹ David léé: Gakelebale bozen bɛ nya lé an sɛbɛ ’ko gyɛ yé é we ’konu gɔɔn an lɛ, yé é an bɔn‐in kini wo kɛlɛbɛ ma.

²⁰ David lé é be Salomɔn lɛ léé: ’I dɔ gligli, ’i bli ta dɔ plɛplɛ, ’i we kɛlɛ; té i kana lo, té di é kini i gi lo. Naa, Gakelebale anlé Bale, é dan kɛlɛ lɛ i va; é ’ka dan i vo lɛ lo, é ’ka dan sɔn vɔ lɛ i ma lo, fɔɔ yé nyanamanu lé wo dan wo pa lɛ Gakelebale lé kɔn giwenu kɛlɛle lé we ma, yé wo lɛ é sɔɔ.

²¹ Balebanzannu valé Lévinu palunu lé maa wo dɔ Kazambale lé kɔn giwe kɛlɛle we ma, wo lé ke ’ko: yé munu faa lé wo bli ke é zima, ’té woo bɔa blabonyanama gɔnɔ faa pale lɛ, wo lé ke é dɔle i sɔnɔ ’ko, nyanama faa pale we ma, minwiinzannu faa valé munu faa lé ke i sɔnɔ ’ko, wo tɔné gi a drɔɔ i dére faa ’male we ma.