Minwiinzannu lé Wezuofe Sɛbɛ 21 - Kazambale lé Sebe Sauunu 1979

Mi nɔnɔle valé mi gyɛgyɛ lé we

¹ Satan nwa Izraɛl ma, yé é a pa David bli gi léé, ’é Izraɛlnu nɔnɔ.

² Yé David lé Joab valé munu nwiinzannu faa lɛ léé: ’Ka go, ’ka Izraɛl munu faa nɔnɔ, é sia Bɛɛ‐Sééba fɔɔ yé é bɔ Dan, yé ’ka da a zuo fe an lɛ, yé dé wa nɔɔ? yé maa a dɔɔ.

³ Joab lé a lɛ léé: Munu ’léé a fɛan zo, Gakelebale ’é munu kɛlɛ kiɛre ’bɛ ’léé gɔnɔ yɔ soru ma. Anzan blɛn, wo faa ’ka i leemunu nya loo? Mɛmalé anzan a fe a zoo? Mɛmalé i Izraɛl munu kɛla wenyanékɛlɛzannu nyaa?

⁴ Naa, minwiinzan blɛn dɔ ézé ta plɛplɛ. Yé Joab go yé é gié Izraɛl tɛrɛ faa la; ’bɛ zuo yé é da Jérusalɛm é ziin.

⁵ Joab munu tɔ gyɛ la sɛbɛ nɔ David lɛ: Izraɛlnu lé wo bɔa gulidanle lɛ, wa mi baa wuru fié yɔ sɔrafié wɔlɛ vu; Juda zé a gulidanmunu baa wuru do yɔ do wɔlɛ vu ta soru.

⁶ É ’ka Lévinu valé Bɛnjamɛnnu nɔnɔ lɛ lo, naa, minwiinzan blɛn dére a é naané Joab yuɛ gi, azama.

⁷ Bélidɔwe ’ko ’ka sɔ lɛ Kazambale lɛ lo, yé é Izraɛlnu gyɛ gyɛ nya.

⁸ Yé David lé Kazambale lɛ léé, an wenyané blɛn kɛlɛ, sin, ilé zanté, i leezan ma we vo, naa, maa we ’ko kɛlɛ ’tu nya.

⁹ Gakelebale we fe David lé fɛnayezan Gad lɛ léé:

¹⁰ ’I go David va ma: Bé fe a lɛ léma: Gakelebale léma: Maa migyɛgyɛ yaa dɔ i ’lɛ; bé do si a va yé maa i gyɛ a nya.

¹¹ Gad go David va yé é lé a lɛ léé: Gakelebale léma:

¹² lɔrɔ dɔle lɛɛ yaa a do; i nyanézannu i gyɛ gwɔun nya yé wo i guru zana a gi moné yaa wuo, ’bɛ a do; Gakelebale lé gwɔun valé bawurumagyɛ dale ilé tɛrɛ la yi yaa yé Gakelebale lé lanje é guruzanaagiwe kɛlɛ Izraɛl tɛrɛ faa la, ’bɛ a do; ’izé si a va. Bé va si sin, yé we lé maa dan a fe lɛ an nwunvɔzan lɛ, yé maa a dɔɔ.

¹³ David a zi pa Gad lɛ léé: Maa a nyané blɛɛn blena; ’an vɔ Gakelebale lee ma, naa, alé nyanai zénle a blɛn; té an vɔ munu lee lo ma.

¹⁴ Gakelebale Izraɛlnu gyɛ bawurumagyɛ nya, yé wo ga mi baa yɔ do wɔlɛ vu ta soru.

¹⁵ Kazambale lanje do pa zia léé, ’é Jérusalɛm guru zana a gi; é a kɛlɛna bléyian va, Gakelebale a nagini yé é bli nɔla we tɔntɔn kɛlɛle ma, yé é lé fɛ guru zanaagi lanje lɛ léé: É sɔ, ’i bɛ si ana sin. Gakelebale lé lanje a é dɔle Jébusi mi Oonan lé ’sa sunwona sɔnɔ.

¹⁶ David é yara nwa loru yé é Gakelebale lé lanje ye é dɔle tɛrɛ valé la méléna, ’té gwɔun a a lee ’é soile Jérusalɛm vazia. Yé David valé mi segelenu dia ’wo bli la, ’té bɔlɔ a é zénle wo ta.

¹⁷ Yé David lé Kazambale lɛ léé: Maa‐an maa mi nɔnɔle ’ko we fe loo? Maa ɛ wenyané kɛlɛ, maa ɛ wenaané kɛlɛ, naa, ’blanu ’ko, mɛ lé wa kɛlɛɛ? Gakelebale, anlé Bale, ’i dɔra maa valé an ti lé kɔngimunu ta, té ilé munu gyɛ bawurumagyɛ nya lo.

¹⁸ Gakelebale lé lanje lé Gad lɛ léé, ’é we fe David lɛ léé, ’é balebanna kɛlɛ Gakelebale zé nya Jébusi mi Oonan lé ’sa sunwona.

¹⁹ David go, dére lé Gad a fe Gakelebale tɔ gi, a yɛrama.

²⁰ Oonan a ’sa sunwona, yé é nɔla yé é lanje ye, yé yee valé é be ziɛnnu yɔɔ.

²¹ David bɔ aan wo Oonan sɔnɔ, Oonan a nagini, yé é David ye; yé é si ’sa sunwona yé é dia é bli la David ’lɛ, ’té a yara a tɛrɛ va.

²² David lé Oonan lɛ léé: ’Ilé ’sa sunwona nɔ an lɛ, an Gakelebale banna kɛlɛ ana; maa dan a lɔ lɛ, yé migyɛgyɛ é si munu ma.

²³ Oonan lé David lɛ léé: Bé si, anzan minwiinzan blɛn a ye é zima fɛan zo, ’é a kɛlɛ ma; i yua, maa dirigɔnénu nɔ léé, wo wo kyɛ ble Bale lɛ, yé goroyilinu ’é kɛlɛ kyɛ nya, yé maa ’sa nɔ balebanfɛ nya; maa ’bɛ faa nɔ.

²⁴ Naa, minwiinzan blɛn David lé Oonan lɛ léé: Gba, é sɔ an lɛ léé, maa a lɔ gɔɔli nya; maa ’ka dan Gakelebale ban lɛ ilé fɛ nya lo, yé wi lé maa a ye é pla, ’té maa ’ka gɔɔli sɛrɛ lɛ ’bɛ ma lo, maa ’ka ’bɛ zo wi kyɛ blé saraka nya Gakelebale lɛ lo.

²⁵ Yé David fɛkona lɔ Oonan lee kyan sikla wuru yaa nya.

²⁶ David Gakelebale banna kɛlɛ ’bɛna, yé balebanwi lé wa kyɛ blé, é ’bɛ valé bɔvɔ sarakanu bo Gakelebale lɛ. É Gakelebale tɔ laa, yé Gakelebale a zi pa kyɛ nya, é si la gi yé é zun balebanna lé woo wi kyɛ blé a ta, a ta.

²⁷ Yé Gakelebale we fe lanje lɛ yé élé gwɔun wɔra é kɔlɛ gi.

²⁸ ’Bɛ bléyi va, David a ye aan wo léé, Gakelebale ’é dére ’ma Jébusi mi Oonan lé ’sa sunwona, é sarakanu bo ’bɛna.

²⁹ Naa, Gakelebale lé sɔkɔn lé Moizi a dɔ bwi gi, ’bɛ valé balebanna lé woo wi kyɛ blé Gakelebale lɛ a ta, wa fɛna loruna Gabaɔn.

³⁰ David ’ka go lɛ balebanna ’kona Kazambale naginile we gi lo, Gakelebale lé lanje lé gwɔun kana blɛn zén a gi, ’bɛzama.