Minwiinzannu lé Wezuofe Sɛbɛ 20 - Kazambale lé Sebe Sauunu 1979

Wo Raba si yé wo Filisitinu kele

¹ ’Bɛ zuo lɛɛ do, bléyian va lé minwiinzan blɛnnu éé goo guli dan lɛ, Joab sunyanu palu plɛplɛ si, yé wo go ’wii lɛ Amɔnnu lé tɛrɛ la, yé é Raba mabɛn. Naa, David vo Jérusalɛm. Joab Raba gyɛ guli nya, yé é a guru zana a gi.

² David tɔkoro si Rabamunu nwiinzan blɛn ’wuo ma, é a kyan nya yé é kilo sian talan do, yé é a é ’lɛrɛle gɔlɛwezannu nya. Wa wo David ’wuo ma, yé é gulizarafɛ kiɛre si fla ’ko ta.

³ É ana munu bɔra, yé é wo kɛlɛ yiliféngyɛmunu koo, tɛrɛkanlamunu koo, zaa nya nyanamapamunu koo, wo nya; é yee duo kɛlɛ Amɔnnu lé fla faa la munu lɛ. David valé é vamunu faa nɔla ’wo pa gi Jérusalɛm.

⁴ ’Bɛ zuo wo guli do dan Filisitinu va Gézɛɛ. Usa mi Sibékai Rafa mi do gyɛ, wa laama Sipai. Yé Filisitinu tua.

⁵ Wo guli do dan é ziin Filisitinu va. Jaii be Elkanan Goliat bwe gyɛ; a tɔ lé Lakimi yé é si Gat; alé dinyili a bélé sɔ nyana zo.

⁶ Wo guli do dan é ziin Gat. Mi grɔgrɔ do ana bɛ, a bɛnwɔlɛ valé a ganewɔlɛ a suiɛdo suiɛdo, wo faa a yɔ do wɔlɛ ziɛn, yé é a Rafa kululazan nya.

⁷ É zɛn vɔ Izraɛlnu lɛ; yé David bwe Siméa be Jonatan a gyɛ.

⁸ Munu ’ko a Gat mi Rafa lé nénu nya. Wo zamaga wo David valé é leemunu lee.