Minwiinzannu lé Wezuofe Sɛbɛ 19 - Kazambale lé Sebe Sauunu 1979

Amɔnnu nwiinzan blɛn poo gyɛ David wuomunu ta, yé wo guli dan

¹ ’Bɛ zuo Amɔn munu nwiinzan blɛn Nakas ga yé a be pla munu nwiin a pa gi.

² David léé: Maa dan zin kɛlɛ lɛ Nakas be Anun lɛ, naa, a ti wezin kɛlɛ an lɛ. Yé David munu nwunvɔ a tɔrɔ paale we ma a ti gale ma. David leezannu bɔ aan wo Anun va Amɔn munu lé tɛrɛ la, a tɔrɔ paale we ma.

³ Amɔn munu lé mi blɛnnu lé Anun lɛ léé: É dɔ i gi léé, i ti tɔ bɔle we ma lé David mi nwunvɔ i tɔrɔ paale we maa? Fla dɔɔle we ma yé é a sɛrɛ, ’bɛ valé tɛrɛ naginile we ma‐an a leezannu da i va loo?

⁴ Yé Anun David wuozannu kun, yé é wo puomagun bo, yé é wolé varɔnu bɔi wo méléna yé é vo wo boro ma loru yé é daan wo ma yé wo go.

⁵ David we ’ko ’ma aan wo, é munu pa wo ’lɛ zia, naa, yara a munu ’ko gyɛna é baba, yé é we pa ’bɛnu ’léé, léé, ’wa fe wo lɛ léé, ’wo vo Jériko fɔɔ yé wo lɛmagun é bɔ é ziin, ’bɛ zuo yé ’wo da.

⁶ Amɔnnu a ye aan wo léé, ’wo gin dɔ David nyé gi, wo valé Anun gɔɔlifu talan wuru soru si yé wa pa Sirinu lé wo ke Mézopotami valé Maaka valé Tesoba tɛrɛnu la, wo lɛ zia léé, ’wo gulidangoronu valé wisootazannu nɔ ’wo lɛ.

⁷ Yé Sirinu gulidangoro baa vu ta suiɛdo nɔ wo lɛ yé Maaka nwiinzan blɛn valé élé munu da yé wo nyana Médéba ’lɛ. Amɔnnu si ’wolé flanu ta yé wo zén ékeva yé wo zi sia gulidanle we ma.

⁸ David we ’ko ’ma aan wo é Joab valé sunyanu faa nwunvɔ. Wo faa a nyanazannu nya.

⁹ Amɔnnu da yé wo dɔ guli bale la flagɔrɔ ’léé; minwiinzan blɛnnu lé wo da, wo dɔ é bale la féinu ta.

¹⁰ Joab a ye aan wo léé, é a lé é guli dan ’é ’lɛzia valé ’é zuozia, é Izraɛl lé sunya vabole kenu si, yé é wo dɔ Sirinu ma;

¹¹ yé é mi pɔnénu pa é zuané Abisai va wo dɔle Amɔnnu ma we gi.

¹² É léé: Dé Sirinu a plɛplɛ yé wo mini maa ta, i dan da lɛ bɔ lɛ an va; dé Amɔnnu a plɛplɛ yé wo mini i ta, maa dan go lɛ bɔ lɛ i va.

¹³ ’I dɔ gligli yé kaa bli ta plɛplɛ nagɔɔn kolé munu valé kolé Bale lé flanu lé we ma, yé dé wean dɔ Gakelebale gi wezin nya, ’é a kɛlɛ ma.

¹⁴ Joab valé é vamunu go guli dan lɛ Sirinu va yé wo fwila a ’lɛ.

¹⁵ Amɔnnu a ye aan wo léé, Sirinu fwila, wo fwila é ziin Joab zuané Abisai ’lɛ, yé wo go fla. Joab si Amɔnnu zuo yé é da é pa gi Jérusalɛm.

¹⁶ Sirinu a ye aan wo léé, Izraɛlnu ’wo kele, wo we pa zia Sirinu lé wo ke yuu zi, wo lɛ zia léé, ’wo da bɔ ’wo va; ’té Adadézɛɛ lé sunyanu faa nwiinzan Sofak a wo ’lɛ.

¹⁷ Wa zuo fe David lɛ, yé é Izraɛlnu faa zén ékeva, wo Juudɛn kini, yé wo zén zia guli danle wo va we ma. David élé sunyanu dɔ gulibale la Sirinu ma. Wo Sirinu kele yé wo vlan buru Izraɛlnu lee.

¹⁸ Sunyanu lé ke gulidangoro baa yaa wuru soru gi valé ganelasunyanu baa yɔ do, David wo gyɛ.

¹⁹ Adadézɛɛ a ye aan wo léé, Izraɛlnu ’wo kele, é yɔfalo fu nwa David lɛ, yé wo pla a wuo. Yé é ’ka sɔ lɛ Sirinu lɛ léé, wo bɔ Amɔnnu va é dɛrɛ lo.