Minwiinzannu lé Wezuofe Sɛbɛ 18 - Kazambale lé Sebe Sauunu 1979

Filisitinu — Moabnu — Sirinu — Édomnu David wo faa gyɛ guli nya

¹ ’Bɛ zuo David guli dan Filisitinu va yé é wo tua, yé é Gat valé é zi flanu si Filisitinu lee.

² É Moabnu gyɛ guli nya, yé Moabnu pla David wuo yé woo vagɔɔli banwoo a lɛ.

³ Tesoba munu nwiinzan blɛn Adadézɛɛ go Yufrat yuu si lɛ ézé nya, yé David guli dan a va Amat sɔnɔ yé é a kele.

⁴ Gulidangoro wuru soru koo, wisootazannu baa yaa wuru soru koo, ganelasunyanu baa vu koo, David wo si; yé é goroganawisoonu gane zi miinnu bɔi yé é wisoo yɔ soru saa vo goro ganale we ma.

⁵ Sirinu si Damas yé wo da bɔ lɛ Tesoba nwiinzan blɛn Adadézɛɛ va, yé David Sirinu gyɛ mi baa vu ta do.

⁶ David sunyanu palunu nyana Damas, Siri tɛrɛ la. Yé Sirinu pla David wuo, ’té woo vagɔɔli banwoo a lɛ. Dé David go fɛofɛana, Gakelebale a takuun‐an.

⁷ Kyan botakuunfɛnu lé ke Adadézɛɛ lé munu lee, David wo si yé é da wo nya Jérusalɛm.

⁸ É ziin, David zéné kiɛre si Adadézɛɛ lé flanu Tibisat valé Kun ta. Zéné ’wolikana koo, zéné wɛyili koo, Bale lé kɔn gi nyanamapafɛnu koo, Salomɔn wo kɛlɛ yee zéné ’ko nya.

⁹ Amat nwiinzan blɛn Tou a ’ma léé, David Tesoba nwiinzan blɛn Adadézɛɛ lé sunyanu faa kele,

¹⁰ yé é be Adoram pa zia David va, wele a va we ma, ’bɛ valé a bɔvɔle gulidanle Adadézɛɛ va valé a kelele we ma. Tou a guli danna Adadézɛɛ va turu, ’bɛzama. É kana gɔnɔ faa pa zia é ziin, kyankana koo, gɔɔlifukana koo, zénékana koo, woo lé.

¹¹ Minwiinzan blɛn David wo faa pa é yɛrama Gakelebale zé nya; gɔɔlifu valé kyan lé é a si bɛnnu faa lee, Édom koo, Moab koo, Amɔnnu koo, Filisitinu koo, Amalɛknu koo, wo lee, é ’bɛ pa é yɛrama Gakelebale zé nya é ziin.

¹² Séruja be Abisai Édom munu gyɛ mi baa sɔraziɛn wɛpɛnguru gi.

¹³ É sunyanu palunu nyana Édom, yé Édom munu faa pla David wuo. Fɛ faa lé David é go ana, Gakelebale a takuun‐an ana.

¹⁴ David pla Izraɛlnu faa nwiin, yé é wedrɔle valé we tegele kɛlɛ élé munu faa lɛ.

¹⁵ Séruja be Joab a sunyanu faa nwiinzan nya; Akilud be Jozafat ɛ ke we zuo fele gyɛzan nya sɛbɛ ta;

¹⁶ Akitub be Sadɔk valé Abiataa be Abimélɛk a Balebanzannu nya; Savisa a sɛbɛgyɛzan nya;

¹⁷ Jéojada be Bénaja a Kérétinu valé Pélétinu nwiinzan nya; yé David benu a é plale munu nwiin wo ti bɛ gi.