Minwiinzannu lé Wezuofe Sɛbɛ 17 - Kazambale lé Sebe Sauunu 1979

Balelayezan Natan we fe David lɛ

¹ David nyana kli élé kɔn gi aan wo, é lé balelayezan Natan lɛ léé: I ’a yé loo? an nyanaan kɔn lé wa dɔ sɛdrɛyili nya, a gi, ’té Gakelebale lé gipawe pagikɛsu a é dɔrale sɔkɔn gi.

² Natan a zi pa David lɛ léé: Kazambale a i va, amalé we faa lé ke i bli gi, bé kɛlɛ.

³ ’Bɛ yi la é béli Kazambale we fe Natan lɛ yé é léé:

⁴ ’I go bé fe an leezan David lɛ léma: Gakelebale léma: Biian i dan kɔn dɔ lɛ an lɛ yé maa nyana a gi lo.

⁵ É sia yian nya lé maa Izraɛl si luu gi fɔɔ kyɔ, maa ’ka nyana lɛ kɔn gi monomono lo; an nyanaan sɔkɔnnu gi nuu, an nyanana kɛlɛ fɛ kiɛre na.

⁶ Fɛfaana lé an tawo Izraɛlnu faa va, Izraɛl lé weblemunu lé maa wo dɔ anlé munu pazannu nya, maa a fe tan wo va mi do lɛ gɔnɔ do léé: Mɛmalé ka ’ka sɛdrɛyilikɔn dɔ lɛ an lɛ loo?

⁷ Sin, ’i go bé fe an leezan David lɛ léma: Lai sunyanu lé Gakelebale léma: Maa i si trubɛnu blena, ’blanu zuo, i kɛlɛle anlé munu Izraɛl nwiinzan nya we gi;

⁸ dé i tawo fɛofɛana, maa a i va, maa i nyanézannu kulu ga i ’lɛ, yé maa tɔ nɔ i lɛ bélé tɛrɛlami blɛɛnnu tɔ zo;

⁹ maa nyanana nɔ anlé munu Izraɛl lɛ, yé maa wo suni wɔra léé, wo dɔ gligli, yé wo ’ka nɔɔan lo, yé minyanénu ’ka wo gya é dɛrɛ bélé é vinin zo lo,

¹⁰ bléyian va lé maa weblemunu dɔ anlé munu Izraɛl nwiin ’bɛ bléyi zo lo. Maa ka nyanézannu faa gyɛ yara nya. Gakelebale é dan ilé kɔn dɔ lɛ, maa ɛ fe i lɛ.

¹¹ Dé ilé yinu lɛ sɔɔ yé i go i tranu va, maa dan i kulu do nwa lɛ i zuo, i be do nya, yé maa dan a kɛlɛ lɛ mununwiinzan nya.

¹² Yee ɛ dan kɔn dɔ lɛ an lɛ, yé maa ’ka dan a plale munu nwiin glɛ dɔ lɛ lo.

¹³ Maa dan kɛlɛ lɛ a ti nya, yé é dan kɛlɛ lɛ an be nya, yé maa ’ka dan an yuɛ si lɛ a ta, bélé fɛan zo lé maa a si mi lé ke i ’lɛ, a ta, a zo lo.

¹⁴ Maa dan a nyana lɛ kli anlé kɔn gi, yé maa dan a dɔ lɛ munu lé maa ke é plale wo nwiin, wo vazan do nya, yé alé plale munu nwiin glɛ ’ka dan dɔ lɛ lo.

David Bale bɔ vɔ

¹⁵ Natan go yé é dére ’konu faa valé yuɛzi giwe ’konu faa fe David lɛ.

¹⁶ Yé minwiinzan blɛn David go yé é nyana Gakelebale ’lɛ, yé é léé: Bale, Gakelebale, de ɛ ke maa nya, yé anlé kɔn a mɛ fɛ nya, yé i da an nya fɔɔ fɛkona kyɔɔ?

¹⁷ Yé ’bɛ a kiéné i yuɛ gi yé i tɛlɛ tɛlama we fe i leezan kulunu lé we ma é ziin. Bii lé i ke loru, Bale, Gakelebale, ibo tua an naginile we ma bélé mi le an naginile zo.

¹⁸ Fua blɛn lé bé nɔ i leezan David lɛ, mɛ we lé maa fé é dɛrɛ ’bɛ maa? I i leezan dɔɔ.

¹⁹ Oo Gakelebale, i bligiwe ma lé i we blɛnblɛn ’konu kɛlɛ i leezan lé we ma, a nagɔɔnle a lɛ we gi.

²⁰ Oo Gakelebale, i bɔmazan ’ka lo, bii do kpen lé ke Bale nya, a bɛ ’ka lo, we faa lé ko a ’ma ko tɔné gi, a yɛrama.

²¹ Bɛn bɛ a tɛrɛ la bélé ilé munu Izraɛl zoo? I da wo tabo lɛ, wo kɛlɛle ilé munu nya we gi, yé i tɔ nɔ ibo lɛ yé i gyɛzorowe valé we blɛnblɛnnu kɛlɛ bɛnnu binle nya ilé munu lé i wo tabo Éjipiti munu lee, wo ’lɛ. Bɛn bɛ a ’bɛ zoo?

²² Ilé munu Izraɛl dɔ gligli, léé, wo kɛlɛ ilé munu nya lɛɛfaama; yé bii, Gakelebale, i kɛlɛ wolé Bale nya.

²³ Oo Gakelebale, sin, dére lé bé fe i leezan valé a kulunu lé we ma, ’é vo ana lɛɛfaama ma, yé ’i we kɛlɛ i dére yɛrama ma.

²⁴ I dére ’é vo ana, i tɔ zin bɔle yifaama we gi, yé wo léé: Lai sunyanu lé Gakelebale, Izraɛl lé Bale, é a Izraɛl lé Bale nya. Yé i leezan David kulunu ’é dɔ gligli i yuɛ va.

²⁵ Oo anlé Bale, biibozen a gɔɔn i leezan lɛ léé, i dan a kulu vo lɛ ana. ’Bɛlé we ma lé é dɔ i leezan ’wuo gi léé, é dan bazoro lɛ i lɛ.

²⁶ Sin, oo Gakelebale, bii a Bale nya, yé i zin ’ko kɛlɛwe fe i leezan lɛ.

²⁷ Amalé ’i i leezan kulu drɔɔ vo ma, a vole ana yifaama i yuɛ gi we ma ma. Oo Gakelebale, fɛ lé bé drɔɔ vo, a drɔɔ a é vole lɛɛfaama, a glɛ ’ka lo.