Minwiinzannu lé Wezuofe Sɛbɛ 16 - Kazambale lé Sebe Sauunu 1979

Wo Baleban nyanama dɔ é dɔbɛ gi

¹ Dé wo da Kazambale lé kɛsu nya, wa dɔra sɔkɔn lé David a dɔ azé nya, a wuo, yé wo Kazambale ban winu lé wa kyɛ blé, wo nya, yé wo bɔvɔ sarakanu bo.

² David nyaa aan wo Bale banna wi lé wa kyɛ blé, a nya, ’bɛ valé bɔvɔ sarakanu bole nya, é munu drɔɔ vo Gakelebale tɔ gi.

³ ’Bɛ zuo buru do koo, wi kuru do koo, dɔrɔporo gale povɔle koo, é a nɔ Izraɛl faa lɛ do do, gɔnénu valé lomu nya.

⁴ Bale la nyanama lé wa paan Gakelebale lé kɛsu ’lɛ, David a bɛ pa Lévinu lee; bazorole Gakelebale, Izraɛl lé Bale lɛ koo, a tɔzin fele valé a tɔ ma gyɛle koo, yee lé.

⁵ A vininzan a Azafa nya; ’bɛ é zuo a fiézan a Zakari nya, ’bɛ é zuo Jéiɛl, Sémiramɔt, Jééiɛl, Matitia, Éliab, Bénaja, Obɛd‐Édom valé Jéiɛl. Lɛrɛvɔvafɛnu a wo lee, gitaanu valé kɔnɔnu nya; yé Azafa kɔanu gyɛ.

⁶ Bénaja valé Jakaziɛl woo béli fɛɛn bléyi faa va Kazambale lé gipawe pagikɛsu ’lɛ.

Lɛrɛ lé wa vɔ

⁷ ’Bɛ yi ’ko la lé David Azafa valé é bwenu béli dɔ é vinin léé, ’wo Gakelebale tɔ zin fe lɛrɛvɔle nya.

⁸ ’Ka Gakelebale tɔ zin fe, ’ka a tɔ laa. ’Ka a kɛlɛwe blɛnnu zuo fe munu méléna.

⁹ ’Ka lɛrɛ vɔ, ’ka a tɔ bɔ lɛrɛvɔlenu nya. ’Ka a panyanama blɛnnu faa glewo.

¹⁰ A tɔ ’lɛzan lé we ma, ka gi ’é nana. Wo lé woo Gakelebale naginian, wo gi ’é nana ma.

¹¹ ’Ka Gakelebale laa, ’é bɔ ka va élé plɛplɛ nya. ’Ka a yara nagini bléyi faa do do ma.

^12-13 A wuozan Abraam kulunu, ’Kaa, Jakɔb lé nénu lé é ka si a va, We blɛnblɛnnu lé é a kɛlɛ, wo sele ’é dɔ ka gi ma, Gyɛzorowenu valé weblelenu lé woo sié a ’léé, wo sele ’é dɔ ka gi ma.

¹⁴ Gakelebale a kolé Bale nya; Alé webledérenu a tɛrɛ faa la.

¹⁵ Alé gipawe sele éé dɔa a gi yifaama, Alé blivolɛdérenu lé é wo fe mikulu wuru soru zé nya, a sele a a gi.

¹⁶ Gipawe lé é a kɛlɛ Abraam va, Yee valé balekundére lé é a fe Izak lɛ, wo sele a a gi.

¹⁷ É a dɔ gligli bélidɔwe nya Jakɔb zé nya. É a kɛlɛ gipawe lé a glɛ ’ka lo, a nya, Izraɛl zé nya,

¹⁸ A fele nya léé: ’An dan Kanaan tɛrɛ nɔ lɛ i lɛ, Izé tɔnɔ nya.

¹⁹ Bléyian va lé é we ’ko fe, ’té wo ’ka di lo, ’Té wo ’léé a kiéné, ’té wa bɛn nya ana tɛrɛ la,

²⁰ ’Té woo voo nɔɔna bɛnnu ta, ’Té woo sié bɛn do va yé woo goo bɛn bɛ va;

²¹ Naa, Bale ’ka zi nɔ lɛ mi do lɛ léé, é yaa wo nwiin lo, Yé é we lɛdɔ mi nwiinzannu gi wolé we ma.

²² Yé é léé: Té ka bɛ mané munu lé an nyɔnɔ zén wo nwiin, wo ma lo, Té ka wenaané bɔ anlé balelayemunu ma lo.

²³ ’Kaa faa lé ka ke tɛrɛlamunu nya, ’ka lɛrɛ vɔ Gakelebale lɛ. ’Ka alé mi sile we gi zana dɔɔ yioo yi.

²⁴ ’Ka a tɔbɔle zuo fe bɛnnu lɛ, ’Ka alé we blɛnnu zuo fe migɔnɔnu faa lɛ,

²⁵ Naa, Gakelebale a blɛn, a tɔ zi fe yara lé é baba, É a kanamazan nya é mini balenu faa ta;

²⁶ Naa, munu lé balenu faa a miyilinu nya, Yé Gakelebale ɛ lanu kɛlɛ.

²⁷ Zevɔfɛ blɛnblɛnnu a kolé Bale blɛɛn ’lɛ, Plɛplɛ valé ginanale a a nyanana.

²⁸ Migɔnɔ lelenu, ’ka Gakelebale tɔ zin fe, ’ka a tɔ bɔ. ’Ka kɛlɛ ma.

²⁹ ’Ka Gakelebale tɔ bɔ, a tɔ lé we ma, ’Ka da blɛnu nya, yé ’ka da a ’lɛ, Dé mi sauun bɔra a gi, ’ka ’wuo wɔra a gane wuo.

³⁰ ’Kaa tɛrɛlamunu faa, ka ma ’é nyɔɔn a ’lɛ. Tɛrɛ a é dɔle gligli, a ma ’ka nyɔɔn‐an lo.

³¹ Lanu gi ’é nana, tɛrɛ gi ’é nana é baba ma. Gakelebale a é plale munu nwiin, ’wa fe bɛnnu lɛ ma.

³² Wɛyi valé é vafɛnu, ’wo we plɛplɛ ma. Féinu valé wo tafɛnu, wo gi ’é nana ma.

³³ Pɔrɔ gi yilinu faa, ’wo siaa ginanale nya Gakelebale ’lɛ. Naa, é a dana tɛrɛlamunu lé we ble lɛ, azama.

³⁴ Gakelebale a ’é zin, amalé ’ka a tɔ zin fe, A nyanai zénle glɛ ’ka lo.

³⁵ ’Ka fe, ko siéwegi Bale, ’i ko si we gi, ’I ko si bɛnnu méléna, yé ’i ko zén ékeva, léé, Ko i tɔ ’lɛzan kɛlɛ blɛn, Yé ko i tɔ zin fe ginanale nya.

³⁶ Gakelebale, Izraɛl munu zé Bale, A drɔɔ ’é vo ma, lɛɛfaama a glɛ ’ka lo. Yé munu faa a fe léma: Amɛɛn. ’Ka Gakelebale tɔ zin fe.

³⁷ David Azafa valé é bwenu vo ana mi Gakelebale lé gipawe pagikɛsu ’lɛ, léé, wo ’wolé Balelanyanama pa Bale lé kɛsu ’lɛ yi faa do do ma.

³⁸ É Jédutun be Obɛd‐Édom valé Oza vo ana kɔntayuɛpazannu nya; é wo bwenu vo wo va é ziin mi yɔ yaa wɔlɛ sɔraa.

³⁹ É Balebanzan Sadɔk valé é bwenu Balebanzannu dɔ Gakelebale lé sɔkɔn ’lɛ, fɛna loru lé ke Gabaɔn, ana,

⁴⁰ léé, ’wo Gakelebale ban yifaama, balebanwi lé wa kyɛ blé, a nya, bladi valé nyanadi, balebanna lé woo wi kyɛ blé ana, a ta, yé we faa lé ke é gyɛle bélidɔwe lé Gakelebale a nɔ Izraɛlnu lɛ, yé wa kɛlɛle lɛ sɔɔ.

⁴¹ Éman valé Jédutun a wo va, wo valé mi bɛnu lé wo wo tɔ laa yé wo wo si a va Gakelebale tɔ zin fele we gi, woo lé. Naa, Gakelebale nyanai zénle glɛ ’ka lo.

⁴² Éman valé Jédutun a wo va, bélinu koo, kɔanu koo, fɛ bɛnu lé woo lɛrɛ vɔa wo va yé wo Kazambale tɔ bɔ koo, wo ’bɛnu bɛ pa ’bɛnu ɛ lee. Jédutun benu a kɔntayuɛpazannu nya.

⁴³ Munu faa go ’wolé kɔn ’léé nuu, yé David go ébo lé kɔngimunu drɔɔ vole we ma.