Minwiinzannu lé Wezuofe Sɛbɛ 15 - Kazambale lé Sebe Sauunu 1979

Wo go Bale lé kɛsu nya Jérusalɛm

¹ David élé kɔnnu dɔ David lé fla; é fɛna ma’lɛrɛ Kazambale lé kɛsu zé nya, yé é sɔkɔn dɔ a lɛ.

² Yé David léé: É a lé Lévinu saa é Kazambale lé kɛsu kɔné si; Gakelebale wo si a va, léé, ’wo Kazambale lé kɛsu kɔné si, ’té wa ma nyanama paan yifaama.

³ Yé David Izraɛl munu faa zén ékeva Jérusalɛm, Gakelebale lé kɛsu sile yé wa dɔra fɛ lé é ana ma’lɛrɛ azé nya, ana.

⁴ David Arɔn benu valé Lévinu zén ékeva.

⁵ Kéat kulunu a yɔ suiɛdo; wo’lɛzan Uriɛl valé é bwenu nya;

⁶ Mérari kulunu a wuru do yɔ do; wo ’lɛzan Asaja valé é bwenu nya;

⁷ Gɛɛsɔn kulunu a yɔ suiɛdo wɔlɛ vu, wo ’lɛzan Joɛl valé é bwenu nya;

⁸ Élisafan kulunu a wuru do, wo ’lɛzan Sémaéja valé é bwenu nya;

⁹ Ébrɔn kulunu a yɔ ziɛn, wo ’lɛzan Éliɛl valé é bwenu nya;

¹⁰ Uziɛl kulunu a yɔ soru wɔlɛ vu ta fié, wo ’lɛzan Aminadab valé é bwenu nya.

¹¹ Balebanzannu Sadɔk valé Abiataa koo, Lévinu Uriɛl, Asaja, Joɛl, Sémaéja, Éliɛl, Aminadab koo, David wo laa.

¹² É lé wo lɛ léé: Ka a Lévinu gɔnɔla guniwuonu nya; ’kabo kɛlɛ é zima, ka valé ka bwenu, yé ’ka da Gakelebale, Izraɛl lé Bale lé kɛsu nya, fɛ lé maa ana ma’lɛrɛ azé nya, ana.

¹³ É vinin, ka ’ka ana lo, amalé Gakelebale, kolé Bale ko bla; ko ’ka a sia lɛ bélidɔwe yɛrama lo, azama.

¹⁴ Balebanzannu valé Lévinu wobo kɛlɛ tegele Gakelebale, Izraɛl lé Bale lé kɛsu sile yé wo da a nya we ma.

¹⁵ Lévinu Kazambale lé kɛsu si é siyilinu nya wo bɛapa ta, we lé Moizi a fe Gakelebale dére nya, a yɛrama.

¹⁶ Yé David lé Lévinu ’lɛzannu lɛ léé, ’wo lɛrɛvɔafɛnu nɔ lɛrɛvɔzannu lɛ; gitaanu koo, kɔnɔnu koo, kɔanu koo, é a lé wo wo gyɛ yé wo we plɛplɛ, gi nanale tɔmase nya.

¹⁷ Yé Lévinu Joɛl be Éman dɔ; a bwenu méléna, Bérékia be Azafa; wo bwenu Mérari kulu va, Kusaja be Étan;

¹⁸ ’bɛ zuo wo bwenu lé ke palu fiézan gi, Zakari, Bɛn, Jaaziɛl, Sémiramɔt, Jééiɛl, Uni, Éliab, Bénaja, Maaséja, Matitia, Élifélé, Miknéja, kɔntayuɛpazannu Obɛd‐Édom valé Jéiɛl.

¹⁹ Zéné kɔanu a lɛrɛvɔzannu Éman valé Azafa valé Étan lee, wo gyɛle we ma.

²⁰ Zakari, Aziɛl, Sémiramɔt, Jééiɛl, Uni, Éliab, Maaséja, Bénaja, alamota gitaanu a ’bɛnu lee;

²¹ Matitia, Élifélé, Miknéja, Obɛd‐Édom, Jéiɛl valé Azazia, kɔnɔnu lé wo bale ke sɔraa, wa ’bɛnu lee, wo kɛlɛle lɛrɛ zilɛzannu nya we gi.

²² Kénania lé ke lɛrɛ zilɛzan nya Lévinu va, é lɛrɛvɔle valé lɛrɛvɔafɛ faa gyɛle nagɔɔn‐an, naa, éé baan ’bɛ gi.

²³ Bérékia valé Elkana ɛ ke Bale lé kɛsu kɔné sizannu nya.

²⁴ Balebanzannu Sébania, Jozafat, Nétanéɛl, Amasai, Zakari, Bénaja, Éliézɛɛ, woo ɛ béli fɛɛn Kazambale lé kɛsu ’lɛ. Obɛd‐Édom valé Jékija a kɛsu kɔné sizannu nya é ziin.

²⁵ David koo, Izraɛl mi segelenu koo, mi wuru soru soru nwiinzannu koo, wo Gakelebale lé gipawe pagikɛsu si Obɛd‐Édom lé kɔn gi yé wo zén zia ginanale blɛn nya.

²⁶ Kazambale bɔ Lévinu va yé wo Gakelebale lé gipawe pagikɛsu si; wo Bale ban dirigɔné sɔrafié valé ’blagɔné sɔrafié nya.

²⁷ Lɛnsɔ zima a David ta; Lévinu faa lé wo ke Bale lé kɛsu sina koo, lɛrɛvɔzannu koo, lɛrɛ zilɛzan Kénania koo, lɛnsɔ zima a wo faa ta; éfɔdi lé wa kɛlɛ lɛnsɔ nya, ’bɛ a David ta.

²⁸ Izraɛlnu faa go Gakelebale lé gipawe pagikɛsu nya ginana siaale nya, ’té woo béli gɔnɔ fié fɛɛn, ’té woo kɔanu gya, ’té woo gitaanu valé kɔnɔnu gya.

²⁹ Dé Gakelebale lé gipawe pagikɛsu wɔra David lé fla, ’té Saul lu Mikal a naginina fɛnɛti la; é minwiinzan blɛn David ye fɔrɔna, ’té éé nɛnɛ bo, yé é lɔlu kplililii bo a ma é bli gi.