Minwiinzannu lé Wezuofe Sɛbɛ 13 - Kazambale lé Sebe Sauunu 1979

David Bale lé kɛsu dɔra Obɛd‐Édom lé kɔn gi

¹ Mi wuru nwiinzannu valé mi yɔ soru nwiinzannu koo, mi blɛnnu faa koo, wo ’wo ke va we ble Davidnu nya.

² Yé David léé, Izraɛl munu faa lé wo ke é zénle ékeva, wo lɛ léé: Dé é sɔ ka lɛ, dé we ’ko si Gakelebale kaalé Bale va, kaa we pa zia fɛfaana, kaa bwenu lé wo vo Izraɛl tɛrɛ pɔnénu ta, wo lɛ, ’wo valé Balebanmunu valé Lévinu lé ke wolé kuru ’léénu valé ’wo zi flanu ta, wo lɛ zia, léé, ’wo zén ékema ko va;

³ yé kaa da kaalé Bale lé kɛsu nya kaa va, naa, ko ’ka alé we kɛlɛ lɛ Saul bléyi va lo.

⁴ Zén‐ékevamunu faa léé, ’bɛ a é zima, naa, we ’ko sɔ munu faa lɛ.

⁵ David Izraɛlnu faa zén ékeva, é sia Éjipiti lé Sikɔɔ yuu ma, fɔɔ yé é bɔ Amat flagɔrɔ ’léé, Kazambale lé kɛsu sile Kiijat‐Jéarim yé ’wo da a nya we ma.

⁶ David valé Izraɛlnu faa go Baala lé ke Kiijat‐Jéarim nya bɛ, ’té é ke Juda tɛrɛ la fla do nya bɛ, ana, Kazambale lé kɛsu sile we ma; Gakelebale lé éé nyanaan sérubɛnnu méléna, wa tɔ laan kɛsu ’ko ta.

⁷ Wo Kazambale lé kɛsu si Abinadab lé kɔn gi, yé wa dɔra goro dɛrɛ gi, ’té Uza valé Akijo éé goro ’ko vɔa.

⁸ David valé Izraɛlnu faa nɛnɛ bo wolé plɛplɛ faa nya Gakelebale ’lɛ, ’té woo lɛrɛ vɔa kɔnɔnu koo, kpélénu koo, flinnu koo, kɔanu koo, bélinu koo, wo va.

⁹ Wo bɔ aan wo Kidɔn lé ’sa sunwona, yé dirinu Bale lé kɛsu tɛnla, amalé Uza é bɛ soi léé, é dan a kun lɛ.

¹⁰ Gakelebale bli fli Uza ma, yé Gakelebale a gyɛ, é bɛ mane kɛsu ma, azama. Uza ga ’bɛna, Kazambale ’lɛ.

¹¹ Gakelebale we lɛdɔ Uza gi bɛan zo, ’bɛ ’na David ma. Yé wo fɛkona tɔ pa Pérɛs‐Uza, fɔɔ kyɔ.

¹² ’Bɛ yi la David kana Bale lee, yé é léé: Maa dan kɛlɛ lɛ kaa yé maa Kazambale lé kɛsu wɔra anlé kɔn gii?

¹³ David ’ka go lɛ Bale lé kɛsu nya David lé fla lo, naa, é go a nya Gatzan Obɛd‐Édom lé kɔn gi.

¹⁴ Kazambale lé kɛsu vo Obɛd‐Édom lé kɔn gi moné yaa. Yé Gakelebale Obɛd‐Édom lé kɔngimunu drɔɔ vo, é valé alé fɛnu faa nya.