Minwiinzannu lé Wezuofe Sɛbɛ 12 - Kazambale lé Sebe Sauunu 1979

Sunyanu lé wo ke David zuo Saul yuɛma bléyi va

¹ Bléyian va lé David go baa Kis be Saul lee yɔɔ lɛ, munu lé wo go a zuo Siklag, wo lé ke ’ko. Wa nyanazannu lé wo bɔ a va gulidanbléyi va, wo vazannu nya.

² Wa savulimunu nya, woo paalu vulian ’wo bɛyi valé ’wo bɛbo nya, yé wo savulile dɔɔ; wa Bɛnjamɛn munu lé wo ke Saul bwenu nya, wo vazannu nya.

³ Minwiinzan Akiézɛɛ valé Sé?-?maa be Joas, wo si Gibéa; Jéziɛl valé Azmavɛt be Pélɛt; Béraka; Anatɔt mi Jéu;

⁴ Gabaɔnzan Jisimaéja lé ke nyanazan yɔ do wɔlɛ vu va nyanazan nya, yé é a wo ’lɛ; Jérémi; Jakaziɛl; Jokanan, Gédéra mi Jozabad;

⁵ Éluzai; Jérimɔt; Béalia; Sémaria; Arof mi Séfatia;

⁶ Elkana, Jisija, Azaréɛl, Korémunu Joézɛɛ valé Jasobéam;

⁷ Gédɔɔ mi Jérosam benu Joéla valé Zébadia.

⁸ Gad munu va nyanazannu go David va fɛna plɛplɛna bwi gi; wa sunyanu lé woo blaboo gulidanle gi, ’té mibotakuunfɛ valé dinnu a wo lee bɛ, wo nya; wa bélé golizranu zo, wo ta a é kelekele bélé gannu zo gɔ nwiin.

⁹ Ézɛɛ a wo ’lɛzan nya; a fiézan, Abudias; a yaazan, Éliab;

¹⁰ a ziɛnzan, Misimana; a soruzan, Jérémi;

¹¹ a suiɛdozan Atai; a sɔrafiézan Éliɛl;

¹² a sɔraazan, Jokanan; a sɔraziɛnzan Elzabad;

¹³ a vuzan, Jérémi; a vu ta dozan, Maabanai.

¹⁴ Wa Gad munu nya, sunyapalu nwiinzannu nya; wo va mi kiiéné do kpen é bɔalɛ léé, é guli dan mi yɔ soru va; yé wo va mi blɛɛn é bɔalɛ léé, é guli dan mi wuru soru va.

¹⁵ Wo ɛ Juudɛn yuu kini moné vinin nya, bléyian va lé é bɔra bwi la, ’bɛ bléyi va, yé munu lé woo nyanaan gɔ woronanu, yirinwanazia valé yirivɔnazia, wona, yé wo wo bin.

¹⁶ Bɛnjamɛn valé Juda mi kenu é ziin, wo go David va alé fɛna plɛplɛna.

¹⁷ David bɔra wo va yé é lé wo lɛ léma: Dé ka da an va ka bli zima nya léé, ka bɔ an va, kaa bli é dan kɛlɛ lɛ do; naa, dé ka da dabli kɛlɛle an lɛ we ma, bɔle an nyanézannu va we gi, dɔlé ’té an ’ka glawe do kpen kɛlɛ lɛ lo, kaa tinu lé Bale ’é ana ye ma, yé ’é we gi bɔi tegele ma.

¹⁸ Amasai lé ke sunyanu nwiinzan blɛn do nya, Léli a kun yé é léé: David, ko a izé nya, Izai be, ko a i va. ’I vo drɔɔoo, ’i vo drɔɔ, yé munu lé wo bɔ i va, ’wo vo drɔɔ, naa, ilé Bale bɔ i va. Yé David wo si yé é wo pa sunyanu nwiinzannu va.

¹⁹ Manasé munu pa David va, bléyian va lé é a gona gulidanna Saul va, yee valé Filisitinu nya, ’bɛ bléyi va. Naa, wo ’ka bɔ lɛ Filisitinu va lo; naa, Filisitinu va mi blɛnnu wo ke va we ble, yé wo David diéra a fele nya léé: Ko ’wuo nya‐an é dan é péli vɔ lɛ ézan va é ziin loo?

²⁰ Dé David go é pa gi Siklag, Manasé munu lé wo go a va, wo lé ke ko: Adinas, Jozabad, Jédiaɛl, Mikaɛl, Jozabad, Éliu, Siltai; wa Manasé lé mi wuru palunu nwiinzannu nya.

²¹ Wo bɔ David va, gulidanna ’wiifɛtazannu Amalɛk munu va, naa, wo faa a nyanazannu nya, yé wo kɛlɛ zilɛzannu nya sunya palunu gi.

²² Yi faa do do ma, munu éé dan David va, bɔle a va we gi, fɔɔ wo kɛlɛ kiɛre bélé Kazambale lé sunya palu do zo bwi gi.

Sunyanu lé wo go David dɔ lɛ minwiinzan blɛn nya Ébrɔn

²³ Munu lé wo go David va Ébrɔn, gulidanfɛnu nya wo lee, a kɛlɛle minwiinzan nya Saul pa gi we gi Gakelebale dére yɛrama bɛ, wo ’léé lé ke ko.

²⁴ Juda munu lé botakuunfɛ valé din ke wo lee, ’té wo ma ke é ’lɛrɛle gulidanle we ma bɛ, wa mi baa yaa mi wuru ziɛn.

²⁵ Siméɔn munu lé wo ke nyanazannu nya guli ma, wa mi baa yaa woru soru, é ta lé mi yɔ soru.

²⁶ Lévi munu a baa fié wuru yaa;

²⁷ Arɔn lé munu va mi blɛn Jéojada vamunu a mi baa do wuru sɔraa yɔ soru;

²⁸ pɛniɛ nyanazan Sadɔk valé é ti lé kɔngimunu, wa zilɛzannu yɔ do wɔlɛ fié.

²⁹ Bɛnjamɛn munu, Saul bwenu, a mi baa do wuru soru; naa, fɔɔ ’bɛ bléyi ’ko va, wo va mi kiɛre péli vo Saul va.

³⁰ Éfraim munu a mi baa vu é ta lé mi wuru ziɛn; wa nyanazannu tɔbɔle nya, wo si Éfraimnu gɔnɔ faa gi.

³¹ Manasé munu lɛ do a baa sɔraziɛn; wo wo si a va léé, wo David dɔ minwiinzan blɛn nya.

³² Isakaa munu va, minwiinzan wuru do, é valé wo bwenu lé wo ke é plale wo wuo, wo nya. Gikinizannu lé wo nya, we lé é a lé Izraɛl a kɛlɛ, wo ɛ fé.

³³ Zabulɔn munu a mi baa yɔ do wɔlɛ soru; wo ma a é ’lɛrɛle sunya kɛlɛle we ma, ’té gulidanfɛ gɔnɔ faa a wo lee, yé gulidanbli a wo gi.

³⁴ Néfitali munu va, milɛzannu a wuru soru, yé mi baa vu ta sɔraa wuru soru a wo va, ’té botakuunfɛ valé din a wo lee.

³⁵ Dan munu a mi baa vu ta ziɛn wuru yaa, ’té gulidanfɛnu a wo lee.

³⁶ Azɛɛ munu a mi baa yɔ do, wo ma a é ’lɛrɛle gulidanle we ma.

³⁷ Juudɛn yuu zi zia, Rubɛn munu koo, Gad munu koo, Manasé bɛn lɛ do koo, wa mi baa yɔ yaa, ’té gulidanfɛnu gɔnɔ faa a wo lee.

³⁸ Gulidanmunu faa ’ko, wo go ’wo ma nya é ’lɛrɛle Ébrɔn, wo bli zin nya, David dɔle Izraɛlmunu faa nwiinzan blɛn nya we ma. Izraɛl mi pɔnénu é ziin, wo faa bli kɛlɛ do léé, David ’é kɛlɛ minwiinzan blɛn nya.

³⁹ Wo yi yaa kɛlɛ David va, ’té woo fɛ blé, ’té woo fɛ minian, naa, wo bwenu da wo lɛ wɛɛ lɛ.

⁴⁰ Munu lé woo nyanaan wo sɔnɔ fɔɔ yé é bɔ Isakaa koo, Zabulɔn koo, Néfitali koo, wolé tɛrɛnu la, wo da fɛ nya wo lɛ; buru gɔnɔ faa koo, bɔrɔyiliporo gale povɔle valé dɔrɔporo gale povɔle koo, nwɛ koo, nyɔnɔ koo, diri kiɛre valé ’bla kiɛre koo, wo wo vɔ sokofalenu koo, nyɔgɔménu koo, mulɛnu valé dirinu koo, wo punu yé wo da wo nya, naa, Izraɛlnu gi a é nanale, azama.