Minwiinzannu lé Wezuofe Sɛbɛ 11 - Kazambale lé Sebe Sauunu 1979

Minwiinzan blɛn David lé we

¹ Izraɛl bɛn faa da David va Ébrɔn yé wo léé: I ’ka a yé loo? Ko a ibo wi nya.

² Turu é kyɛn, bléyian va lé Saul a ko nwiinzan nya, ’té bii ɛ goo Izraɛlnu nya, ’té i dan wo nya. Gakelebale, ilé Bale lé i lɛ léé: Bii ɛ dan élé munu Izraɛl pa lɛ, yé bii ɛ dan pla lɛ élé munu Izraɛl nwiin.

³ ’Bɛ zo lé Izraɛl lé mi segelenu faa da minwiinzan va Ébrɔn, yé David é gi pa do wo va Ébrɔn, Gakelebale yuɛ va. Wo nyɔnɔ zén David nwiin a kɛlɛle Izraɛl nwiinzan nya we ma, Gakelebale dére lé Samuɛl a fe, a yɛrama.

⁴ David valé Izraɛlnu faa go guli dan lɛ Jérusalɛm lé ke Jébusi nya bɛ, a ma. Jébusi munu ana bɛ, wana tɛrɛ la munu nya.

⁵ Jébusi munu lé David lɛ léé: I ’ka wɔraan ’ko lo. Naa, David fɛna plɛplɛ Siɔn si. David lé fla lé.

⁶ David a fe kɔɔn léé: Dé miomian é Jébusi munu gyɛ é vinin, é dan kɛlɛ lɛ minwiinzan valé mi blɛn nya. Séruja be Joab go é vinin, yé é kɛlɛ minwiinzan nya.

⁷ David nyana fla plɛplɛ ta, bɛwemalé wana laama David lé fla.

⁸ É kɔnnu dɔ nuu, é a pélisia Milo valé é zi, yé Joab fla ’ko pɔné ma’lɛrɛ.

⁹ David kɛlɛle blɛn gi gyɛ, yé lai sunyanu lé Gakelebale kɛlɛ a va.

David lé nyanazannu

¹⁰ Nyanazannu lé wo ke David va, wo ’lɛzannu lé ke ’ko: wo valé Izraɛlnu faa bɔ David va a plale wo nwiin kɛlɛle sɔbɛlawe nya we ma, yé wa dɔ ’wo nwiinzan blɛn nya, dére lé Gakelebale a fe Izraɛl ma we nya, a yɛrama.

¹¹ Sunya nyanazannu lé wo ke David lé nyana la, wo tɔ lé ke ’ko: Akamoni be Jasobéam a sunyanu nwiinzan blɛn do nya. É élé din vɔ mi wuru do yɔ soru ma, yé wo faa zamaga wo fɛ duona.

¹² ’Bɛ zuo Akoki mi Dodo be Éléazaa a gulidanzannu yaa ’ko va mi do nya.

¹³ É a David va Pas‐Damim, fɛana lé Filisitinu zén ékeva gulidanle we ma, ana. Sɔnmlén féi blɛn do ana bɛ; yé munu a vlan buruna Filisitinu lee.

¹⁴ Wo dɔ yee féi méléna, yé wa takuun, yé wo Filisitinu gyɛ. Yé Gakelebale wo si we blɛɛn gi.

¹⁵ Sunya nwiinzannu yɔ do wɔlɛ vu va mi yaa go David va Adulam lé gɔlɛkoro lé ke gɔlɛ nwiin, a gi, ’té Filisitinu palu wolé sɔkɔnnu dɔ Réfaim munu lé gɔ worona.

¹⁶ David a guliyɔɔkɔn plɛplɛ gi, ’té Filisitinu lé sunya palu do a é nyanale Bɛtléɛm.

¹⁷ David é gi bɔrɔ we do ma, yé é léé: ’Yiguru lé ke Bɛtléɛm fla zi gɔrɔ ’léé, de ɛ dan ’yi tɔ lɛ a gi yé maa a minii?

¹⁸ Yé mi yaa ’ko gié Filisitinu lé sɔkɔnnu méléna, yé wo ’yi tɔ ’yiguru lé ke Bɛtléɛm fla zi gɔrɔ ’léé, a gi. Wo da a nya yé wa nɔ David lɛ, naa, David ’ka a nyi si lɛ léé, é a mini lo, amalé é a zana Gakelebale ’lɛ.

¹⁹ Yé é léé: Anlé Bale ’é an tabin léé, té maa we ’ko kɛlɛ lo ma. Munu lé wo ’wobo bɔra gale lɛ ’naan, maa dan wo nyɛ mini lɛɛ? Wo bli si ’wobo lɛ yé wo da a nya. Yé é ’ka a nyi si lɛ léé, é a mini lo. We lé sunya nyanazan yaa ’ko a kɛlɛ, yee lé ke bɛ.

²⁰ Joab bwe Abisai a mi yaa ’lɛzan nya é ziin. É élé din vɔ mi wuru do mi yɔ soru ma, yé é wo gyɛ. A tɔ a é bɔle mi yaa ’ko va.

²¹ É a mi yaa palu fiézan va lɛamazan nya, yé é kɛlɛ wo nwiinzan nya; naa, yee valé mi yaa palu vininzan ’ka bɔ lɛ ékema lo.

²² Jéojada be Bénaja lé é si Kabiséɛl, é a nyanazan nya yé a tɔ a é bɔle é kɛlɛwenu ma. Moab mi fié lé wo mini ’wo bɔlunu faa ta, é wo gyɛ. É zun ’yiguru do gi, yé é golizra gyɛ ’bɛna, yian nya lé glasépun a dana, a yi nya.

²³ É Éjipiti mi do gyɛ, ’bɛ nwiin torole a mɛtrɛ fié é buu yé alé dinyili a bélé sɔnyana zo; é go a va é lee lé yili nya, é ’bɛlé din si é lee, yé é ’bɛ gyɛ a nya.

²⁴ We lé Jéojada be Bénaja a kɛlɛ, yee lé ke bɛ; a tɔ bɔ nyanazannu yaa palu fié ’ko va.

²⁵ É a lɛamazan nya mi yɔ do wɔlɛ vu va, naa, yee valé mi yaa palu vininzan ’ka bɔ lɛ ékema lo. Yé David a nyana élé wekyɛ zi.

²⁶ David lé sunyanu va nyanazannu lé ke ’ko: Joab bwe Azaɛl, Bɛtléɛm mi Dodo be Elkanan,

²⁷ Arɔɔ mi Samɔt, Palɔn mi Élɛs,

²⁸ Tékoa mi Ikɛs be Ira, Anatɔt mi Abiézɛɛ,

²⁹ Usa mi Sibékai, Akoas mi Ilai,

³⁰ Nétofa mi Maarai, Nétofa mi Baana be Élɛd,

³¹ Bɛnjamɛn mi Ribai be Itai, é si Gibéa. Piratɔnzan Bénaja,

³² Nakalé‐Gaas mi Urai, Arabazan Abiɛl,

³³ Basarum mi Azmavɛt, Saalbɔnzan Éliaba,

³⁴ Gizɔnzan Bɛné‐Asɛm, Aaraazan Sagé be Jonatan,

³⁵ Aaraazan Sakaa be Akiam, Uu be Élifal,

³⁶ Mékérazan Éfɛɛ, Palɔnzan Akija,

³⁷ Kaamɛlzan Esro, Ezbai be Naarai,

³⁸ Natan bwe Joɛl, Agri be Mibikaa,

³⁹ Amɔn mi Sélɛk, Bérɔtizan Nakrai lé é Séruja be Joab lé gulidanfɛnu kɔné sié.

⁴⁰ Jétɛɛzan Ira, Jétɛɛzan Garɛb,

⁴¹ Éti mi Uri, Aklai be Zabad,

⁴² Rubɛn mi Siza be Adina, é a Rubɛnnu ’lɛzan nya, mi yɔ do wɔlɛ vu a a va.

⁴³ Maaka be Aanan, Mitinizan Jozafat,

⁴⁴ Asitarɔt mi Ozias, Aroɛɛzan Otam benu Saama valé Jéiɛl,

⁴⁵ Simri be Jédiaɛl, a bwe Titizan Joka,

⁴⁶ Makavimzan Éliɛl, Elnaam benu Jéribai valé Josa?-?via, Moab mi Jitima,

⁴⁷ Éliɛl, Obɛd, Jaasiɛl‐Mɛsobaja.