Minwiinzannu lé Wezuofe Sɛbɛ 10 - Kazambale lé Sebe Sauunu 1979

Saul gale

¹ Filisitinu da guli dan lɛ Izraɛlnu va yé Izraɛlnu vlan buru wo ’lɛ yé wo galenu vo é zanale Gilboa gɔ ma.

² Filisitinu Saul valé é benu zuo bin yé Saul benu Jonatan koo, Abinadab koo, Malki‐Sua koo, wo wo gyɛ.

³ Guli bɛ mini Saul lɛ, yé savulimunu sa vɔ a ma yé é tuo.

⁴ Yé Saul lé élé gulidanfɛnu kɔné sizan lɛ léé: ’Ilé gwɔun so é kɔlɛ gi yé ’i an fɔn a nya, dé ganedɔlomunu ’ko é da an fɔn yé wo we nana an ma. Kana zén alé gulidanfɛnu kɔné sizan gi yé é ’ka a nyi si lɛ lo. Yé Saul élé gwɔun si yé ébo vɔ a ’léé.

⁵ Alé gulidanfɛnu kɔnésizan a ye aan wo é gale, ébo vɔ élé gwɔun ’léé yé é ga.

⁶ ’Bɛ zo lé Saul valé é be yaanu zamaga wo, ’té a kulu ga é wo sin bɛ.

⁷ Izraɛl munu faa lé wo ke é nyanale gɔ worona, wa ye aan wo léé, munu vlan buru yé Saul valé é benu ga, wo fwi ’wolé flanu ta yé wo vlan buru é ziin. Yé Filisitinu da nyana lɛ wo pai.

⁸ ’Bɛ é tu kini, Filisitinu da gamunu tafɛnu si lɛ yé wo Saul valé é benu ye é diale Gilboa gɔ ma.

⁹ Wo alé fɛnu si a ta, yé wo go a ’wuo valé alé gulidanfɛnu nya wo lee. ’Bɛ zuo yé wo we néné ’ko zana dɔɔ Filisitinu lé tɛrɛ faa la, wolé miyilinu valé munu lɛ.

¹⁰ Wo Saul lé gulidanfɛnu pa wolé yo lé kɔn gi, yé wa ’wuo dun Dagɔn bangikɔn gi.

¹¹ We faa lé Filisitinu a kɛlɛ Saul lɛ, Jabɛs munu lé ke Galaad tɛrɛ la, wo faa we ’ko ’ma aan wo,

¹² wo va nyanazannu faa nwa, yé wo Saul valé é benu gale si yé wo go wo nya Jabɛs. Wo wo pa térébɛnt yili wuo, Jabɛs, yé wo lɔrɔ sɔn yi sɔrafié.

¹³ Saul é yara si Gakelebale ta, amalé é ga; é ’ka a dére ta tawo lɛ lo, yé é go miléli laazannu va, yé é we laa wo lee.

¹⁴ É ’ka go lɛ we laa lɛ Gakelebale lee lo, amalé Gakelebale a gyɛ, yé é alé plale mi nwiin nɔ Izai be David lɛ.