तीतुस 1 - गवली उनाई नियम

नमस्कार

¹ इंज पौलुस, परमेश्वर गा भाग्य एठा यीशु मसीह गा कलामके मिठाच चेला इनी पत्र तीतुस के ओल लक्के मेना। इंज इनिघल्जी कलामके मेना, कि परमेश्वर गा कलामके कुरकू गा विश्वास के मजबूत दडा, एठा सच्चाई गा ज्ञान सुसबान गा घल्जी जो भक्ति गा सेंग्गोन राजीके होय।

² येनेगा परिणाम डी कुरकू हमेशा थंदळ गा घल्जी आसा दोडोवा, चोयाकी परमेश्वर, जो चोलाकाभी लाबाळ बान मंडी, इनी दुनिया आरुटे पेला इनी वादा डाके डा।

³ एठा नका साही टेमो लिंजेन, डीचनी हेजा मकसद डी सच्चो शिक्षा गा द्वारा घाल्के होय, डेगा प्रचार आलेगा उध्दार दडामिठाच परमेश्वर गा हुकूम गा रोंगो इंज्के जिले मेना होय।

⁴ मसीह गेन आलेगा विश्वास गा वोजीटे, तीतुस, आम इंजा सच्चो कोण गा बराबोर होय। आलेगा परमेश्वर बाटे एठा उध्दार दडामिठाच यीशु मसीह कोनेटे आपेन कृपा एठा शांती घाटाऊ लज्जू।

क्रेते द्वीप गेन तीतुस गा कामय

⁵ इंज्नी आमके क्रेते द्वीप गा अदा जिम्मेदारीनौर जीटे इनिघल्जी आराकेमी, ताकी आम डेगा टाकु मसीह गा मंडलीनौर गा समस्यानौर के सुटे एठा हरेक मसीह गा मंडलीनौर गेन जुनाकु के ठहरातिंज्कु। इनी बातो गा बारेन इंजा शिक्षानौर के यादो डोए।

⁶ जो जुना सनाकुके आम ठहरातिंज्कु दिकु निर्दोष होना, म्याका जापाए गा साना होना, दिकुगा कोणकुटे विश्वासी होना एठा दिकु आय्यासी एठा हुकूम बान आजोम बाकी आरु होना।

⁷ चोयाकी जुनाकु के परमेश्वर गा भंडारी डाऊ गा वोजीटे निर्दोष थंदळ होना। न जिद्दो होना, न खिजोमिठाच होना, न सिडूकुत्त्य होना, न कुखामिठाच होना, एठा न लुच्चा कामय गा लालीचो होना।

⁸ डीच पांचार दडामिठाच, एठा दूसराकु गा सेंग्गोन भलाई दडामिठाच होना, संयमी होना, न्यायि होना, चोखरा होना एठा अनुशासन प्यार होना।

⁹ डीचके यीशु मसीह बारेन भारोसा टाकु खाबोर लिंजेन मजबूत टे विश्वास दडा होना चोयाकी इनी इथूकेमी मेना होय, ताकी दिकु दूसराकु के सही शिक्षा गा पालन दडा गा घल्जी आरीकेकु होना एठा डी कुरकू गा गलती भी घाल्की होना जो इनिजगा खिलाफबेन होय।

पाखंडी गुरूजी

¹⁰ येनेगो इनिघल्जी मंडीवा मेना चोयाकी घोनेचका कुरकू होय जो सच्चो शिक्षा गा विरोध गेन बेकार गा बातो दडामिठाच होय, कास करके दिकु जो यहूदी समूह तालाटे मसीह गा विश्वासी आरुके होय। दिकु इकुगा अधिकारीकु गा बातो के तिरस्कार डाएवा होय एठा घोनेचकु के बहकातिंजटे धोकान दोडोवा होय।

¹¹ येनेगो कुरकू के शिक्षा जिऊ टे रोकातिंज्कु, चोयाकी दिकु बुरा बातो गा शिक्षा जिऊवा होय एठा चोटोका परिवारनौर गा विश्वास के बिगळातिंजेवा होय। दिकु येनेगो घिनौनापणा कामय गा घल्जी दडावा होय।

¹² क्रेते द्वीप गा थंदळ मिंकू तालाटे का म्या कोरोनी, डीचके देटे गा कुरकू परमेश्वर गा कोनेटे मंडीमिठाच मनातिंजेज्बा होय, दिकुगा बारेन मंडीके, “कि दिकु कुरकू हमेशा लाबाळ मंडीवा होय एठा दिकुगा बर्ताव हिंसक जानवरकु रोंगो होय दिकु पेटू एठा आळसी होय।”

¹³ क्रेते द्वीप गा थंदळ मिंकू गा बारेन इनी गवाही सच्चो होय, इनिघल्जी दिकुके काळाक्को टे कल्लाकु ताकी देटे दिकु मसीह लिंजेन विश्वास गेन पक्कायु होना।

¹⁴ यहूदी कुरकू गा मनघाळन काहनीनौर लिंजेन एठा जो सच्चो टे भटकतिंजूवा होय डी कोरोकु गा हुकूमनौर लिंजेन मन बाकी येंडा।

¹⁵ डी कुरकू गा मन चोखरा होय, दिकुगा घल्जी सेबाई बातो चोखरा होय, एठा तुनी कुरकू गा मन चोखरा बाने, दिकुगा घल्जी चोच्काभी चोखरा बाऊ। जो बुरा कामय दडावा होय एठा मसीह यीशु लिंजेन विश्वास बान दडा, दिकुगा पापोमय बिचार होय।

¹⁶ दिकु मनातिंजेवा होय कि दिकु परमेश्वर के हाडाई होय, पेनो दिकुगा कामयनौर टे इनी ओटबा होय कि दिकु परमेश्वर के बान हाडाई होय। दिकु खीजो एठा हुकूम बान आजोम मिंकू होय, एठा तुनिका अच्छा कामय गा लायको बाने।