यहूदा 1 - गवली उनाई नियम

शुभकामनाए

¹ इंज यहूदा, यीशु मसीह गा भाग्य एठा याकूब गा सानी बोकोटे, डी कुरकू के इनी पत्र ओलेकीबा मेना जो परमेश्वर गा द्वारा हाकोके मिंकू होय एठा जो आलेगा परमेश्वर बाटे गा प्रिय होय एठा यीशु मसीह गेन सजाका होय।

विश्वास गा घल्जी संघर्ष

² इंज प्रार्थना दडावा मेना कि परमेश्वर आपेके दया, एठा शांती एठा प्यार घोनेचटेका टे जिकी चाले।

³ हे इंजा प्यारे विश्वासी डाईचो, हालाकी इंज आपेके परमेश्वर गा उध्दार गा बारेन घोनेच चोच्का ओल चाहता डा, डेन आले सेबाईकु बेल्लाके होय, इंज डीके जरुरी समझातिंजेवा मेना, कि आपेके आरी दडा गा घल्जी ओलकी कि आपे डी विश्वास गा रक्षा गा घल्जी पूरा खिजाटे कोशिश डाए, जो म्याका बार हमेशा गा घल्जी परमेश्वर नी हेजा कुरकू के जीके होय, एठा जो चोलाकभी बान बदलाऊ।

⁴ इंज आपेके ओल लक्के मेना, चोयाकी अदा कुरकू जो यीशु मसीह लिंजेन विश्वास दडा गा दिखावा दडावा होय, दिकु आपेगा मसीह गा मंडली गेन बेल्लाएन मेना होय। दिकु परमेश्वर गा आदर बान दडा एठा दिकु गलत शिक्षा जिऊवा होय, एठा मंडीवा होय कि परमेश्वर हेजा कृपा टे आलेगा पापोनौर के मापोएबा होय, इनिघल्जी दिकु बुरा कामय दडा लठ्ठाका इकु जीवन बितातिंजेवा होय। दिकु यीशु मसीह के बान मनेन नेजबा होय, जो आलेगा म्याका स्वामी एठा आलेगा प्रभु होय। पवित्र ग्रंथ मंडीवा होय, “परमेश्वर येनोगो कुरकू के दण्डो जेबा।”

⁵ आपे कुरकू इनी सेबाई हाडाई होय, फिरभी इंज आपेके यादो जिऊ चाहतावा मेना, कि प्रभु नी इस्राएली कुरकू के गुलामी टे आराटे मिस्र देशो टे बल्लान सालेकु। पेनो बादोन डीचनी दिकु सेबाईकु के घोच्केकु, दिकुनी उजाळ जगान दिया लिंजेन विश्वास बान दडुका।

⁶ आपेके डी स्वर्गदूतकु गा बारेन भी सोचातिंज होना, जो डी हाक टे भेट्टिडुका बाने डा, जो परमेश्वर नी दिकुके जीके डा, बनकी स्वर्ग गेन ठहरातिंज्के पेळा जागाके आराके। पेनो परमेश्वर नी दिकुके इटान अंधरान हमेशा गा दण्डो टे टोल्केनेच, देटेन डीचनी दिकुके न्याय गा दिन गा घल्जी डोकेकु होय, जब डीच दिकु लिंजेन दोष येंडाएवा।

⁷ इनी इस्राएली कुरकू एठा स्वर्गदूतकु गा खिजा, डी कुरकू के भी यादो डोकी जो सदोम एठा अमोरा एठा दिकुगा आसो-पासो गा चफ्नी गाँव गेन थंदळ डा, कि दिकुगा सेंग्गोन चोच डाएन डा। डी कुरकू आनोवा दडामिंकू आरोएन एठा हर रोंगो गा आनोवा बुराई टे भेट्टेन मेना डा। इनिघल्जी परमेश्वर नी दिकुके सिंगेल टे नशोकेकु। दिकुगा सेंग्गोन जो डाएन दिकु लाबाळ गुरूजी गा घल्जी म्या चेतावनी आरोएन होय, कि दिकुके भी हमेशा गा सिंगेल टे दण्डो जेबा।

⁸ डीका खिजा, इनी अधर्मी कुरकू दावा दडावा होय, कि परमेश्वर नी दिकुके दर्शन गेन टिपीके होय, कि दिकु बुरा तरीका टे जीवन बितातिंजटे आपना खुदके कोम्बोरनौर के बिगळा सकतावा होय, दिकुके जेका गा हाक गेन थंदळ गा जरुरत बाऊ होय, एठा दिकु महिमा टे भेट्टिके स्वर्गदूतकु गा बारेन बुरा मंडीवा होय।

⁹ पेनो येटे टाएन कि मुख्या स्वर्गदूत मिकाईल नी भी डेनोगो बान दडुका, जैसा इनी लाबाळ गुरूजी दडावा होय। जब शैतान नी मिकाईल टे इनी बातो लिंजेन विवाद डाके, कि दिकु तालाटे जेके परमेश्वर गा कोनेटे मंडीमिठाच मूसा गा कोम्बोरके गगाळातिंज गा हाक होय, मेटे मिकाईल गा मेरान इनी कुरकू गा तुल्न गेन घोनेच जादा हाक होय। फिरभी डीचनी शैतान टे बुरा बातो बान मंडीडुका एठा दिया लिंजेन दोष बान येंडाडुका। बनकी डीचनी सिर्फ येटोका मंडीके, “प्रभु आमके कल्लाकोम।”

¹⁰ पेनो इनी कुरकू जानवरकु गा खिजा डी बातोनौर गा खिलाफ अपमान रोंगो तरीका टे मंडीवा होय, डीके दिकु बान समझातिंजे। जैसा जानवरकु के बान मालूम कि टोनोगो सोचातिंज होना होय, मेटे इनी डी पापोमय कामय के दडा गा द्वारा दिकु आपना खुदके नशोएवा होय।

¹¹ दिकु लिंजेन हाय! दिकुनी आदम गा कोणटे कैन गा खिजा बुराई टे व्यवहार डाके होय, डीचनी हेजा डाईटेके घोच्केनेच। दिकु बिलाम गा रोंगो होय डीचनी डामानौर गा घल्जी परमेश्वर गा कुरकू के पापो दडा गा घल्जी उकसातिंजू गा कोशिश डाके। डी कुरकू कोरह गा रोंगो नशोऊबा डीचनी मूसा गा खिलाफ विद्रोह डाके डा।

¹² इनी कुरकू गिदळी दिमाग मिंकू थंदळवा होय, एठा इकुगा सेरोम म्वार एठा मतलबी हरकतनौर टे आपे जो आटा जोम्बा होय, डीके खराबोएवा होय। दिकु कोयो गा सेंग्गोन उळातिंज्के मिनी बादळानौर गा खिजा होय, लेकिन चोलाका डा बान सा। दिकु बिना पाला गा सिंज गा रोंगो होय, जो तुटके मिनी एठा गोएन मिनी होय, एठा डीच फल बान जिऊ साकता।

¹³ इनी कुरकू समुद्र गा खापेट लापानौर गा रोंगो होय, जो हेजा गा सेरोम गा कामयनौर के पेसो गा रुपो गेन उज्बा होय। इनी कुरकू भाटकातिंज्के इफुल गा रोंगो होय जो इकुगा पक्काके कोरानौर लिंजेन बान सेंदरा। प्रभु नी दिकुगा घल्जी खोल अंधकार हमेशा टाएन डोके आराके होय, देटेन दिकुन हमेशा गा घल्जी थंदळ बोचोवा।

¹⁴ आदम गा याईय्या पीढी गेन, हनोक नी इनी अधर्मी कुरकू गा बारेन भविष्यवाणी डाके डा। डीचनी मंडीके, “आजुमे! परमेश्वर पक्का रुपोटे हेजा घोनेच चोखरा स्वर्गदूतकु गा सेंग्गोन हेजेवा।

¹⁵ एठा सेबाई कुरकू गा न्याय दडा गा घल्जी, डी सेबाई बुरा कामयनौर गा घल्जी दिकु लिंजेन दोष येंडा गा घल्जी, जो दिकुनी परमेश्वर गा खिलाफ डाके होय, एठा डी सेबाई खारब बातो गा घल्जी जो पापीकुनी दियागा खिलाफ मंडीके होय।”

¹⁶ इनी कुरकू हमेशा दूसराकु गा खिलाफ बळबळबा होय, एठा दूसरा कुरकू गेन गलती घागाटावा होय। दिकु टाऊलागी डी बुरा कामयनौर के दडावा होय, जो दिकु दडा चाहतावा होय। दिकु इकुगा बारेन घमंड टे दावा दडावा होय, एठा खुदके फायदा हासिल दडा गा घल्जी दूसरा कुरकू गा चालूपन दडावा होय।

कोशिश मिठाच आरुका थंदळे

¹⁷ पेनो हे इंजा प्यारे विश्वासी डाईचो, आपे डी बातो के यादो डोकी, जो आलेगा प्रभु यीशु मसीह गा कलामके मिंकू कुरकू घोनेच पेला मंडी मेना होय, बदोन डेगा हेजे मिनी टेमोन डाऊ जरुरी होय।

¹⁸ दिकु आपेटे मंडी लक्कू डा, आखरी दिननौर गेन येनोगो कुरकू होंगा जो प्रभु एठा दियागा कुरकू गा मजाक उळातिंजेबा। इंकुका डी कुरकू होय दिकुगा जीवन दिकुगा इकुगा बुरा इच्छानौर गा काबू गेन होय।

¹⁹ इंकुका डी कुरकू होय जो आपेके म्या डाए बान लक्के होय। दिकु इकुगा खुद गा स्वाभाविक इच्छानौर गा रोंगो व्यवहार दडावा होय, एठा दिकुन पवित्र आत्मा बाऊ होय।

²⁰ हे इंजा प्यारे विश्वासी डाईचो, आपेके इनिज-दियागा मदत दडाका होना ताकी डी चोखरा सच्चाईनौर गेन डे लिंजेन आपे विश्वास दडावा होय, इनिज-डीचके आरुकेच होना, आपे पवित्र आत्मा गा शक्तीटे प्रार्थना डाए चाले।

²¹ आपेके इनी चिनाटे बिबातातिंज होना, कि परमेश्वर आपेटे प्यार दडावा होय। जब कि आपे आलेगा प्रभु यीशु मसीह गा उम्मीद गा सेंग्गोन राह दोडोवा होय, कि आपेन हमेशा गा जीवन घाटायु। चोयाकी डीचनी आले लिंजेन दया डाके होय।

²² डी कुरकू गा प्रति दयालु आरोए, जो बान हाडाई कि तुनी शिक्षा लिंजेन विश्वास डाए, एठा जेगा विश्वास डंगल-डिंगील लक्के होय।

²³ घोनेचकु के नरक गा कोनेन सेने मिंकू कोरा टे झाटकातिंजटे ओठकु, पेनो अदा कुरकू लिंजेन दया दडा टेमो आपे ध्यान टे थंदळ। येटे टाएन कि डी कपळेनौर टे भी खीजो डाए डे लिंजेन दिकुनी इकुगा पापोमय कामयनौर दागो येंडाके होय।

परमेश्वर गा स्तुति

²⁴ परमेश्वर आपेगा रक्षा दडा गा लायको होय, ताकी आपे पापोमय जीवन गा वोजीटे बोचोयु बाकी होना डीच आपेके महिमा टे भेट्टिके परमेश्वर गा थंदळ गेन मतलब हेजा मेरान सा गेन एठा आपेके निर्दोष एठा खुशीटे पूरा भेट्टिटे आरु गा लायको होय।

²⁵ जो आलेके आलेगा प्रभु यीशु मसीह गा द्वारा उध्दार जिऊवा होय, डीका म्याका परमेश्वर के चोटोका जमाना टेमो टे, आए एठा हमेशा-हमेशा टाएन महिमा, बळाई, शक्ती एठा हाक हासिलजू होना। आमीन।