Yohana 5 - I CILAGANE CIPYA 1991

Yesu yakumuponya munhu behi ne cilamba ce malenga

¹ Hanyuma ya zizi kukawa na sikukuu ya Wayahudi, nayo Yesu yakabita ku Yelusalemi.

² Kuko ku Yelusalemi, behi no mulango wono wucemagwa “Mulango we Zingholo.” Hali ho lili ilamba, lyono ku nonga ye Cihebelaniya lyacemagwa “Betisaza.” Lyono lyali lina deha yihano.

³ Mumo mo waswezaga mhuga ye watamwa, wabofu, we citewe, wono wadejepe. [Wakulindila wutilibulwe we malenga,

⁴ hambi Malayika wo Muwaha, nha yatimaga hanji na hanji mwilamba, yakugatilibula malenga, no munhu wo wose mono yalongolaga kwinjila mu malenga lono gali gatilibuka, yuyo yakapona mu wutamwa wakwe.]

⁵ Ale, hali na munhu yunji baho, mono yali mutamwa myaka makumi madatu na munana.

⁶ Yesu yaza kumuwona u munhu yuyo yagonile baho, yakamanya vyono kekalaga mutamwa kwa myaka minji, yakamuwuza, “Ukuhila Upone?”

⁷ U mutamwa yakamupitula yakatya, “Muwaha ane sina munhu wo kunhajila mu malenga, mu cipango cono gakutilibuka. Hambi ane hono nghusaka kwinjila, yunji yakuwa yalongola kwinjila.”

⁸ Yesu yakamutya, “Winuce, wudinghule muceka wako, ujende.”

⁹ Lo lulo munhu yakawa yapona, yakadinghula u muceka wakwe yakawa kujenda. I nghani yiyi, yetumwa mwizuwa lye Sabato.

¹⁰ Holeka wanji wa muli Wayahudi wakamutya mono yaponywa, “Izuwali nha Sabato, yilimwiko kudinghula u muceka wako.”

¹¹ Ninga mwene yakawatya, “U munhu yuyo mono yamhonizye, yo yanonjeye, wudinghule muceka wako ujende.”

¹² Nawo wakamuwuza, “Alo yo nani mwene mono yakulonjeye, wudinghule u muceka wako ujende?”

¹³ Ninga mwene mono yaponywa, si yali yamumanyile munhu mono yamuponyizye, hambi Yesu nha yali yawuka ihanhu baho, hambi nha hali na ipuga yiwaha lye wanhu.

¹⁴ Hanyuma Yesu yakamwagana mu Nyumba yo Mulungu yuyo mono yaponywa, yakamutya, “Ulanje, alu wapona, ale wulece kwituma wubi kanyhi, ho yize yilece kukwagana i yimbi yono yicizize.”

¹⁵ U munhu yakabita, yakawalonjela iwalongola we Wayahudi vyono yo Yesu mono yamuponyizye.

¹⁶ Ku soko vyono Yesu yetuma nghani yiyi mwizuwa lye Sabato, Iwayahudi wakawa kwamula kumugaza.

¹⁷ Ninga Yesu yakawalonjela, “Baba yakwituma milimo cibitilila, holeka nane nghwituma milimo nha vivilya.”

¹⁸ Ku soko ye zinghani zizo, iwalongola we Wayahudi wakacila muno kulondola nzila yo kumuwulaga Yesu, si so wuhodanje wo wulajilize we Sabato du, langa na so wulonje wono yateye Mulungu yo Sogwe, na kusoko yiyo yakwinoza sawa no Mulungu.

U Wulajilize wo Mwana wo Mulungu

¹⁹ Yesu yakawalonjela, “Mbeka nghumutyenyi, u Mwana si kosuma kwituma cinji yali wene, yadahile kwituma cicilya du cono yakuwona u Sogwe yakwituma, kusoko cicilya cono sogwe ketumaga, no mwana nayo vyo ketumaga nha vivyo.

²⁰ U Sogo yo munhu yamwendile Mwanagwe, kanyhi kamulajilaga zose zono yakwituma mweneco, kanyhi komulajila ne metumo mawaha gono gacizize gaga, nanye mokwizina.

²¹ Nha vyono u Sogo yo munhu kawazukulaga i wafu no kuwapela wumi, nha vivyo nayo Mwana kawapelaga wumi awalya wono yendile.

²² Sogo yo munhu si yakumulingʼaniza munhu wo wose, ninga u mulimo wose wo kulingʼaniza, yamupela u Mwanagwe,

²³ ho wanhu wose wamogope u Mwana, nha vyono wamogopaga u Sogo yo munhu. Mono siyakumogopo Mwana, si yakumogopa no Sogo yo munhu mono yamutuma.

²⁴ “Mbeka nghumutyenyi, Mono yakuyihulika i nghani yangu, no kumwihuwila mono yanhuma, yena wumi we cibitilila. Hamba si kolingʼanizwa ngʼo langa yakondya kuwuka mwifwa, yenjila mu wumi.

²⁵ Mbeka nghumutyenyi, i cipango cikuza, na lulu caza, i cipango cono i wafu wolihulika ilizi lyo Mwana wo Mulungu, nawo wono wolihulika wowa womi.

²⁶ Nha vyono u Sogo yo munhu yo mwamulizo wo wumi, ale nha vivyo nayo yamupela Mwanagwe yawe mwamulizo wo wumi.

²⁷ Kanyhi yamupeye no wulajilize wo kulingʼaniza, ku soko u mwene yo Mwana wo Munhu.

²⁸ Mulece kwizina nghani ayi, hambi i cipango nha cikuza, cono wose wono wali mu vitenjelo wolihulika ilizi lyakwe,

²⁹ nawo wolawila, mu vitenjelo, nawo wono wetumaga viswanu, wozuka no kuwumipa, na awalya wono wetumaga wubi, wozuka no kulingʼanizwa.

I wahomelezi wa Yesu

³⁰ “Ane si nosuma kwitumila cinji mu wulajilize wangu no mweneco, ane nghulingʼaniza nha vyono hulikaga kwa Baba, ne ningʼaniza yangu ya mbeka, hamba si nyendile kwituma zo wuhile wangu no mweneco, langa vyono yendile mono yanhuma.

³¹ Hono niyihomelele no mweneco, wuhomelezi wangu si wosuma kuvumilwa vyono wa mbeka.

³² Ninga ho yali yunji mono kahomelelaga, ane manyile vyono, zose zono yakuhomelela muliʼne zo ze mbeka.

³³ Anye mwawatuma wanhu kuli Yohana, nayo yakayihomelela yi mbeka.

³⁴ Ane si vyono nghuwitumbila wuhomelezi wa wanhu, langa nghulonga zizi, anye ho mupone.

³⁵ Yohana yali yenha tala yono yikwaka no kumulika, nanye mukawa mwiwikanize kuwusangalalila u wuzelu wuwo kwa cidaha.

³⁶ Ninga ane nina wuhomelezi wangu wuwaha kuciza wa Yohana, hambi i milimo yono nghwituma, yo milimo yono yamhela Baba niyitume, nayo yo yikuhomelela vyono Baba yo yanhuma.

³⁷ Nayo Baba mono yanhuma, yo yakuhomelela. Nanye mukali si nalihulika lizi lyakwe hamba nhavi, hamba kuwuwona wusu wakwe.

³⁸ Hamba ne Nghani yakwe, si yikalaga mugati yenyu, vyono si mumwihuwiye yuyo mono yamutuma.

³⁹ Anye musomaga Mandiko Gono Gelile mukwihwesa vyono, mugati yayo muli gago, motuga wumi we cibitilila, na kumbe gago mandiko go gakuhomelela nene!

⁴⁰ Hamba nha vivyo, anye si mwendile kuza kwangu ho mutuje wumi.

⁴¹ “U wuhile wangu, si vyono ho nhuje u lukumyo kulawa kuli wanhu.

⁴² Ninga nimumanyilenyi anye, manyile vyono u wendo wa kuli Mulungu wuli musina mu zinhumbula zenyu.

⁴³ Ane niziza mu wulajilize wa Baba, ninga anye hamba si mukumbocela yaye, munhu yunji hono yazize mu wulajilize wakwe mweneco, nanye momubocela.

⁴⁴ Mosuma wule kwihuwila, kumbe nanye ho mwendile kubocela lukumyo lono lukulawa muli nyenye nyo weneco, hamba si mukulondola lukumyo lono lukulawa kuli Mulungu mono yali wene?

⁴⁵ Mulece kwihwesa vyono ane nomusonjezenyi kuli Baba. Yuyo Musa mono mumwitumbiye, yo komusonjezenyi kuli Baba.

⁴⁶ Mbeka hono mwali mumwihuwile Musa, mwali munyihuwile na nene nha vivilya, hambi Musa nha yandika mu zangu.

⁴⁷ Ninga hono si mukwihuwila azilya zono Musa yandika, alu mosuma wule kwihuwila i zinghani zangu?”