Yohana 21 - I CILAGANE CIPYA 1991

Yesu yakwilajila kuli wejizwa mupunghati

¹ Hanyuma ya zizo, yakelajila kanyhi kuli wejizwa wakwe ha mwejelele we lilenga lya Tibeliya. Nayo yelajila nhavi kuli wene.

² Wa Simoni Petelo na Tomaso mono yacemagwa we Matundu, na Nataneli wa ku Kana ya ku Galilaya, hamonga ne wana wejete we cilume wana wa Zebedayo, kanyhi na wanji wejete wa muli wejizwa wakwe, wose wawo wali wali hamonga.

³ Simoni Petelo yakawa kuwatya i wayagwe, “Nye wayangu, ane nahelela ta, ku wunimula zisomba.” Nawo wakamutya, “Nase cobitana nagwe.” Hodu wakawa kubita, wakenjila mu ngalawa, ninga hamba siwasuma kwibata cinji mu cilo cico.

⁴ Na lono kwali kweza kuli behi no kwelelecela, Yesu yali yemile kwisangha, ninga i wejizwa hamba siwasuma kumumanya vyono yo mweneco Yesu.

⁵ Baho Yesu yakawawuza, yakutya, “Alu wazelelo, mukali simunebata hamba cinji hongo?” Nawo wakatya, “Heya, cikali si nebata hamba cinji.”

⁶ Yesu yakawatya, “Ale, mulutajilaje lwavu ku lubavu lo kulume lwe ngalawa, nanye mozituga zisomba.” Nawo wakalutajila lwavu, hamba si wasuma kanyhi kulukwega, so winji we zisomba.

⁷ U mwijizwa yuyo mono yali yendigwe na Yesu, yakamutya Petelo, “Yo mwene Muwaha.” Nayo Petelo yaza kuhulika vyono yo mwene Muwaha, yakawa kwitunga mwenda wakwe (hambi nha si yali yetunjile) yakelujila mwilenga.

⁸ Ninga awalya iwejizwa wanji wakaziza mu cigalawa sunga ko ku nhumbi, akuno wakulukwega lwavu lono lwali lumemile masomba, hambi nha si wali walikutali ne yisi nghavu, langa yali nha meta igana limonga du, kuwulawa ku nhumbi.

⁹ Waza kutima ku nhumbi, wakawona moto wa makala wukolelezwe, na mucanyha yayo mwali na somba na mukate vikasikwe.

¹⁰ Yesu yakawatya, “Letenyi ta, imasomba ganji gono munimuye lulu.”

¹¹ Nayo Simoni Petelo, yakenjila mu ngalawa, yakalukwega lwavu sunga ko kwisangha, nalo lwali lumemile somba zi mbaha igana limonga na makumi mahano na idatu, hamba ziwe zali nyinji nha vivyo, ninga u lwavu si lwademuka.

¹² Yesu yakawatya, “Muze mulye.” Na hasina hamba yumonga mono yejelela kumuwuza yatye, “Gwegwe nani?” Hambi wose nha wakamanya vyono yo mwene Muwaha.

¹³ Yesu yakaza, yakasola mukate yakawapela, ne zisomba yakanoza nhavivyo.

¹⁴ Alu lwali lo lwe kadatu, lwa Yesu kwilajila kuli wejizwa wakwe, lono yali yakondya kuzuka muli wafu.

Yesu na Petelo

¹⁵ Waza kukondya kulya, Yesu yakamutya Simoni Petelo, “Ati Simoni go mwana wa Yohana, alu wunyendile ane muno muno wuwacizize wawa?” Nayo yakamutya, “Heya Muwaha, agwe wumanyile vyono ane nghwendile.” Yesu yakamutya, “Ale wudime vikolo vyangu.”

¹⁶ Lwe kejete kanyhi yakamutya, “Simoni go mwana wa Yohana, wule, wunyendile ane muno muno?” Nayo Petelo yakatya, “Heya Muwaha, wumanyile vyono ane nghwendile.” Yesu yakamutya, “Ale wudime zingholo zangu.”

¹⁷ Lwe kadatu kanyhi yakamutya, “Ati Simoni go mwana wa Yohana, wunyendile ane ʼmbi?” Nayo Petelo yakakalala vyono Yesu yamuwuzize kadatu yakutya, “Unyendile?” Yakamutya, “Muwaha, agwe wumanyile zose, wumanyile vyono ane nghwendile.” Yesu yakamutya, “Ale wudime zingholo zangu.”

¹⁸ Nghukulonjela mbeka, vyono “Lono wali wukali mudodo, wali wuzoweye kwiwopa musipi no kubita ko kose kono wasakaga. Ninga kolo weza kukombipa, kologolola mawoko gako, na yunji kolokuwopa, yakutegule kono si wendile.”

¹⁹ (Yesu yalongaga zizi, yakulajila vyono Petelo kofwa no kumukumya Mulungu). Hanyuma yakamutya, “Unhyatye.”

Yesu na ayulya mwijizwa yunji

²⁰ Baho Petelo yakapituka, nayo yakamuwona yuyulya u mwijizwa mono Yesu yali yamwendile, yakuwatyatya. U mwijizwa yuyu, yo ayulya u mwijizwa mono yali yekaye behi muno na Yesu ha zindigwa ze cinyamihe, mono yamuwuza Yesu yakutya, “Muwaha nani mono kokugaluka.”

²¹ Holeka Petelo yaza kumuwona yuyo, yakamutya Yesu “Ati Muwaha, ayu nayo ma?”

²² Yesu yakamutya, “Hono nyende yuyu yekale sunga kolo nghuza, agwe wina nghani ʼci? Agwe wunhyatyaje nene.”

²³ Ne nghani yiyo yikamanyika muli we zindugu, vyono u mwijizwa yuyo si kolofwa. Ninga Yesu si yamulonjela vyono u mwijizwa yuyo si kolofwa, langa yatya, “Hono nyende yuyu yekale sunga kolo nghuza, agwe wina nghani ʼci?”

²⁴ Ayu yo mwijizwa mono yazihomelela zinghani zizi, no kuzandika. Nase cimanyile vyono wuhomelezi wakwe wa mbeka.

I ndumilizo

²⁵ Kanyhi kozili zinji nyinji zono yanozaga Yesu, zono mhali zandikwe zose, monga monga, na lunji, sunga ne yinze yeneco si yali yikwile so winji we vitabu vyono vyali vyandikwe.