Yohana 19 - I CILAGANE CIPYA 1991

¹ Pilato yakawatya Wasilikale wamusole Yesu, wamukune ne viboko.

² Nawo Wasilikale wakanoza u mukumbo we mamiya, wakamuvwika Yesu mu mutwe, wakamuvwika ne kanzo ye liwala lye litoga.

³ Wakawa kumuziza hamwande yakwe, wakutya, “Lamucenyi, Mutemi we Wayahudi! Wakamutowa makofi.”

⁴ Pilato yakalawila kanyhi kunze, yakawatya, “Lanjenyi ta, ane nimuleta kunze kono kwenyu, ho mumanye vyono ane singhuwona lisutya muli mwene.”

⁵ Baho Yesu yakalawila kunze akuno yavwalile mukumbo we mamiya, hamonga ne kanzo ye liwala lye litoga. Pilato yakawatya, “Lanjenyi ta! u munhu mweneco yo ayu.”

⁶ Nawo Wakohani wawaha, hamonga ne walinzi waza kumuwona Yesu, wakawa kuzoza, wakutya “Mumutumbice mu Musalaba, Mumutumbice mu Musalaba si.” Pilato yakawatya, “Ale, mumusolaje nyenye le, mukamutumbice mu Musalaba, ninga ane singhuwona lisutya muli mwene.”

⁷ Wayahudi wakamupitula wakatya, “Ase cina uwulajilize, na lono cikuwutyatya wulajilize wuwo, ayu yimunojeye yafwe. Ku soko vyono yenoza Mwana wo Mulungu.”

⁸ Nayo Pilato yaza kuyihulika inghani yiyi, yakacila kogopa.

⁹ Yakenjila kanyhi mwikulu mugati, yakamutya Yesu “Alo kulawa hayi? Ninga Yesu si yamupitula cinji.”

¹⁰ Baho Pilato yakamutya, “Hongo si wukumhitula? Siwumanyile vyono ane nina wulajilize wo kukuwopolela, no wulajilize wo kukutumbicila?”

¹¹ Yesu yakamupitula yakatya, “Si wali wuwe no wulajilize wo wose kuli nene hamba hadodo, hono wali wulece kupegwa no Mulungu. Ku soko yiyo, yuyo mono yandavizye kuli gwegwe, kacila kuwa no wubi.”

¹² Na so nghani yiyo, Pilato yakawa kulondola londola nzila ho yamuwopolele Yesu, ninga Iwayahudi wakazoza wakutya, “Hono wumuwopolele munhu yuyu, agwe si wumwendile Kayisali, muli wose mono kenozaga Mutemi, yo kamubezaga Kayisali!”

¹³ Pilato yaza hulika nghani zizi, yakamuleta Yesu kunze, yakekala mwigoda lyo wulingʼanizi, ihanhu hono hatezagwa “Deha ye mabwe,” (na ku Cihebelaniya, “Gabata.”)

¹⁴ Nayo yali nha misi mugati, mwizuwa lyo wuwikanize we Pasaka. Pilato yakawatya Wayahudi, “Lanjenyi, Mutemi wenyu!”

¹⁵ Ninga wene wakazoza wakutya, “Muwulagaje, Muwulagaje, wumutumbice mu Musalaba si.” Pilato yakawatya, “Alo nimutumbice Mutemi wenyu?” Nawo Wakohani wawaha wakapitula, “Ase cisina mutemi yunji, langa Kayisali du.”

¹⁶ Hodu, hobaho Pilato yakawa kuwakombolela Yesu mu miwoko yawo yatumbikwe. Hobaho wakawa kumusola Yesu.

Yesu yakutumbikwa mu musalaba

¹⁷ Nayo Yesu yakalawila akuno yedinghuliye u Musalaba wakwe, sunga hanhu hono hatezagwa, “Hacipala,” (ku Cihebelaniya, hatezagwa, “Goligota.”)

¹⁸ Baho ho wamutumbicila yena na wanji wejete, yunji ku muwoko wo kulume, na yunji ku muwoko wo kucekulu, mwene Yesu haciligati.

¹⁹ Pilato yakandika mandiko yakagawicila mu musalaba. Nago gali gandicigwe nhavi, “Yesu wa Nazaleti u Mutemi we Wayahudi.”

²⁰ Ne Wayahudi wenji, wakagasoma Mandiko gago, hambi ihanhu baho hono yatumbicilwa Yesu, nha hali behi ne likaya. Ne mandiko gago gali gandicigwe mu nonga ye Cihebelaniya, na ye Cilatini na ye Cigiliki.

²¹ Baho iWakohani wawaha wakamutya Pilato, “Wulece kwandika u Mutemi we Wayahudi.” Langa mweneco vyono yateye, “Yo nene Mutemi we Wayahudi.”

²² Pilato yakapitula yakatya, “Vyono nakondya kwandika, hodu nandika du.”

²³ Iwasilikale, waza kukondya kumutumbika Yesu, wakayisola myenda yakwe, wakayipanga mafungu mane, musilikale ne fungu lyakwe. Wakayisola ne kanzo yakwe. Nayo kanzo yiyo, yali nunzizwe lukulu yisina luhono.

²⁴ Holeka wakeyitya, “Cilece kuyidemula, langa ciyitowelaje kula, ho yejele mono koyisola.” Ne nghani yiyo yikanozwa nha vivyo, ho gafisilizwe mandiko gono gakutya, “Wakegawila myenda yangu Ne kanzo yangu wakayitowela kula.” Ale, nha vivyo, vyo wanoza wasilikale wawo.

²⁵ Behi no musalaba wa Yesu, wali wemile u nyina wa Yesu, no mwanakwawe wo nyina, Malyamu u mugolece wa Kileyopa, na Malyamu Magadalena.

²⁶ Holeka Yesu yaza kumuwona u nyina, hamonga no mwijizwa mono yali yamwendile, yemile behi no nyina, baho yakamutyo nyina, “Yaya, wulanje ta, yuyo yo Mwanago!”

²⁷ Hanyuma yakamulonjela nayo yuyulya mwijizwa, “Wulanje ta, yuyo yo nyina yako!” Na vyono yalawa lululya, u mwijizwa yakamusola, vikawa kwikalana nayo mu kaya yakwe.

U wufwe wa Yesu

²⁸ Hanyuma Yesu, vyono yali yamanyile vyono zose zamalika, imandiko ho gafisilizwe, yakatya, “Nakaluka.”

²⁹ Baho hali hoyili bakuli yono yali yimemile siki. Wakazabika sifongo mugati ya yiyo siki, wakayidobeceza mu lusito lwa ezobu, wakamungʼwesa.

³⁰ Nayo Yesu yaza kukondya kuyibocela yiyo siki, yakatya, “Yimalika” hodu yakenamya mutwe wakwe, yakawa kufwa.

Yesu yakuhomwa no mugoha ha lubavu

³¹ Nawo Wayahudi, vyono lyali izuwa lye Ijumaa, lizuwa lyo wuwikanize. Ho miwili yilece kwikala mu musalaba mwizuwa lye Sabato, vyono lizuwa lilyo lye Sabato lyali izuwa yiwaha, Iwayahudi wakamulomba Pilato, imigulu ya wawo wono watumbikwa, yibenwe, nemiwili yawo yiwuswe.

³² Iwasilikale wakaza, wakamubena magulu, u mulongozi, na we kejete, wono watumbikanwa na Yesu.

³³ Ninga waza kuza hali Yesu, wakawona vyono yakondya kufwa, holeka si wamubena migulu.

³⁴ Ninga musilikale yunji muyawo, yakamucinya Yesu no mugoha ha lubavu, hobaho isakami ne malenga yikalawila. (

³⁵ Nayo mono yaziwona zizi, yazilonga, nanye ho mwihuwile. Na zizo zono yalonga, za mbeka, nayo yamanyile vyono yakulonga za mbeka.)

³⁶ Ne nghani yiyo yetumwa ho gafisilizwe i Mandiko Gono Gelile. “Hasina yifupa lyakwe hamba limonga lyono lyolobenwa.”

³⁷ Kanyhi na hanji mandiko gakutya, “Wolomulanga mono wamucinya.”

Yesu yakuzikwa mu citenjelo

³⁸ Zaza kukondya zizi, Yusufu wa Alimataya, yuyo yakamulomba Pilato, yawusole u muwili wa Yesu. (Nayo Yusufu yali mwijizwa wa Yesu, ninga kwa cinyele hambi nha yawogopaga i walongola we Wayahudi.) Nayo Pilato yakalumba. Holeka Yusufu yakaza yakawusola u muwili wa Yesu.

³⁹ Nikodemo nayo yakaza, yo yuyulya mono ha mwamulizo yamuziza Yesu ne cilo. Nayo yakaleta vihanza hanzwe vye manemane na wudi, kotya nha kilo makumi madatu.

⁴⁰ Wakawusola u muwili wa Yesu, wakawuvunjiliza mu myenda ya bafuta, hamonga na vye mhunjile, nha vyono Wayahudi wazoweye kunoza mu maziko gawo.

⁴¹ Baho hanhu hono Yesu yatumbicilwa, hali ho yili busitani, na mu busitani yiyo, mwali na citenjelo cipya, cono hamba munhu yali yakali si nazikwa mumo.

⁴² Alu, kusoko yo wipiganze we Wayahudi wo niwikanize so Sabato, na vyono kanyhi icitenjelo cico cali cili behi, wakamuzika Yesu mumo.