Yakobo 5 - I CILAGANE CIPYA 1991

I suguzi kuli wagoli

¹ Nalu ta hulicizenyi anye nyo wagoli! Mulile citalo no kwikunguza so wugaye wenyu wono womuzizenyi.

² Isawo yenyu nha yawola, ne vivwalo vyenyu nha vyaligwa ne makuni.

³ Zizahabu zenyu ne mapesa genyu, gatuga nghangaga, ne nghangaga yiyo yowa wuhomelezi kuliʼnye, nayo yomulyenyi miwili yenyu nho moto. Anye mwiwutila isawo mu vilo vivi vye ndumo!

⁴ Simwawalipa misahala i wetumami wono wetumo mulimo mu migunda yenyu. Lanjenyi ta vyono wakukalala? Icililo ca wawo wono wakududula mu migunda yenyu, cafika mu makutu go Muwaha Mulungu u Mudaha vyose.

⁵ Hambi nha mwekala kononze ne mikalile ye cinyemo nyemo na yo kwiyendeza nyo weneco. Mwakondya kuzijinya zinhumbula zenyu nyo weneco so lizuwa lyo wuwulagwe.

⁶ Mwalingʼanizwa no kumuwulaga munhu mono yasina wusutye, nayo hamba siyamugomolezezenyi nghani yo yose yonoʼmbi.

Ingola no wulombe

⁷ Ale, wandugu zangu, mweze no wukangalile sunga Muwaha kolo kokuziza. Lanjenyi ta u mulimi vyono kalindilaga ko wukangalile i ndudula yakwe yilete ndigwa swanu. Umwene kalindilaga ko wukangalile i mvula ye lifuku ne ye lihwela.

⁸ Na nyenye nha vivyo yimunojelenyi muwe na ngola, musikamye zinhumbula zenyu, hambi lizuwa lyo wuze wakwe Muwaha nha lyasejelela.

⁹ Wandugu zangu, mulece kwingʼungʼulicila nyenye wose, ho mulece kulingʼanizwa no Mulungu. Hambi u Mulingʼanizi nha yeza behi no kwinjlia ha mulango.

¹⁰ Wandugu zangu, hono muwe mukusaka kuwona musambo we ngola no wukangalile muli magazo, mwihwesaje ze wawizi wono waganulaga mwitagwa lyo Muwaha.

¹¹ Holeka ciwacemaga wawo wo wamoti ku soko vyono wakangalila. Mwakondya kuhulika zo wukangalile wa Ayubu, kanyhi mumanyile vyono u Muwaha yamutendela ha ndumilizo. Hambi Muwaha nha yamemile nheto no lusungu.

¹² Ninga ko muno, wandugu zangu mulece kwilaha. Mulece kwilahiza ku wulanga, hamba monoʼnze, hamba ku cilaha cinji co cose. Langa mutye “Heya” hono nhunizo yenyu yo heya, na “Ngʼo” hono nhunizo yenyu yo ngʼo, ho simolingʼanizwa no Mulungu.

¹³ Ma, hoyuli munhu wo wose muli nyenye mono yena wugaye? Yimunojeye yalombe. Ma, hoyuli yunji musangalafu? Yimunojeye yembe zinyimbo zo wulumbe.

¹⁴ Ma, hoyuli yunji mono yatamigwe muli nyenye? Yimunojeye yawaceme iwanyamhala we Likanisa, nawo womulombela no kumubacila mafuta mwitagwa lyo Muwaha.

¹⁵ Na hono walombe wehuwiye, yuyo mutamwa koponywa, u Muwaha komupela ciba, no wubi wono yali yetuma wonenelwa.

¹⁶ Ale, mweze kwiyivumilila mabi genyu, mwilombelaje, ho muponywe. Uwulombe wo munhu we lingʼani wina vilungo vyo kwituma nyinji.

¹⁷ Eliya yali munhu yenha sese. Yakalomba muno imvula yilece kutonya, nayo siyatonya muʼsi myaka midatu ne myezi mutandatu.

¹⁸ Ale, yakalomba kanyhi, ne mvula yikatonya kulawa ku wulanga neʼsi yikacindya zindigwa zayo.

¹⁹ Wandugu zangu, muyenyu yunji hono yajilile mu mbeka, na muyenyu yunji yamupitule,

²⁰ manyenyi vyono, yuyo mono yakumupitula munya wubi kuwulawa mu nzila yakwe yo wajilile, kaloyiponya i nhumbula yakwe mwifwa no wubi winji wonenelwa.