Yakobo 4 - I CILAGANE CIPYA 1991

U wiyendi ne zeyinze

¹ U wulugu no wisonji wose muli nyenye vilawaga hayi? Vilawaga mu masulumizi genyu mabi gono galewanaga nhondo zose muli nyenye.

² Mu sulumilaga vinhu, na kolo mweza simukuvituga, hobaho mukwiwikaniza kuwulaga, mukusulumila muno kuvituga vinhu, ninga simukuvituga, holeka mwisongaga no kwitowa. Hambi nha simutugaga cico cono musakaga vyono simucilombaga kuli Mulungu.

³ Kanyhi kolo mukulomba simupegwaga, vyono mulombaga ko wuhile wubi hambi nha mulombaga ho mwigutye imasulumizi genyu.

⁴ Anye muli wanhu mono si muli wehuwilwa, mwihwanile wasenyha. Simumanyile vyono munhu hono yawe kuyenda yinze yawa mulugu wo Mulungu? Wo wose mono yakusaka yawe kuyenda yinze, yakwinoza yawe mulugu wo Mulungu.

⁵ Mulece kwihwesa mba vyono i Mandiko Gono Gelile galongaga zinghani za bwete, lono gatezaga, “Umuhe wono Mulungu yawika muli sese, wina wivu wuwaha.”

⁶ Ninga, lihewa lyono cikupegwa no Mulungu lili vilungo muno muno, nha vyono gatezaga i Mandiko, “Mulungu kawemilaga iwedunhumuzi, langa kawapelaga lihewa iwenenenyhezi.”

⁷ Holeka ale mwiwikaje mu wukamiswe wo Mulungu, mumwimile Setani, nayo komutizenyi.

⁸ Mumusejelelaje Mulungu, nayo komusejelelenyi. Kwemenyi miwoko yenyu nyo wahodanji! Mweze zinhumbula zenyu nyo wakoci!

⁹ Muzinguce, mugaye no kulila citalo, uluseko lwenyu luweze citalo, ne nyemo yenyu yiweze wuzinguce wuwaha.

¹⁰ Mwinenenyheze hali Mulungu, nayo komwinulenyi.

U wubi wo kumulingʼaniza muyago

¹¹ Wandugu zangu, mulece kwihosa nyenye wose. Mono yakumuhosa nduguye no kumulingʼaniza, yuyo, yakuwuhosa kanyhi yakuwulingʼaniza Wulajilize. Na hono wuwuhose Wulajilize, ale, agwe siwukuwibata Wulajilize, langa wukuwuhosa.

¹² Hambi nha Mulungu yali wene du yo kawikaga wulajilize no kulingʼaniza. Yo mweneco yali wene du mono yasumile kuponya no kongomeza. Ale, wuli nani gwegwe mono wukumulingʼaniza u munhu muyago?

U wubi wo widunhumuzi

¹³ Ale, hulicizenyi ta, anye mono mutezaga, “Izuwali hamba mitondo, cobita kwikaya lyo wutunga no kwikala kuko mwaka wose cikusuluza no kutuga cambuzi.”

¹⁴ Hamba simumanyile vyono wumi wenyu wowa wule ku mitondo! Hambi anye nha mwihwanile linghungolyosi lyono lijelaga cipango cidodo vivi du no kwajilila kanyhi.

¹⁵ Langa yali yinojeye mutye, “U Muwaha hono yacitaze cokwikala womi no kunoza aci hamba acilya.”

¹⁶ Ninga lu mukwidunhumula no kwisaja, no widunhumuzi wono winha wuwu wo wubi.

¹⁷ Ale, no munhu mono siketumaga ziswanu zono yazimanyile vyono zo zimunojeye yetume, ale yuyo yakwituma wubi.