Yakobo 1 - I CILAGANE CIPYA 1991

Umulamu

¹ Nene Yakobo, umwitumami wo Mulungu, na wo Muwaha Yesu Kilisito, nghumwandicilenyi nyenye, nyo zinghungugo ikumi na nyejete, zono ziyagaye kononze kose. Lamucenyi!

U wihuwilo ne Mahala

² Wandugu zangu, muweze na nyemo kolo mukuzizwa ne majelo ganji ganji,

³ hambi nha mumanyile vyono kolo wihuwilo wenyu wukusuma kulewana ne majelo, womupelenyi ngola.

⁴ Kanyhi mweze mumanyile vyono ingola yenyu yomutazenyi sunga ku ndumo, ho muwe mukamile kanyhi mukwilaniciye, ho mulece kucepucilwa na cinji co cose.

⁵ Na hono muyenyu yunji yawe yanjiye mahala, ale, yimunojeye yamulombe Mulungu mono komupela, hambi Mulungu nha kawapelaga wose kwa winji, na kwe nhumbula swanu.

⁶ Ninga yimunojeye yalombe yehuwiye akuno yasina mahwele go gose. Hambi u munhu mono yena mahwele nha yehwanile mawingo ge lilenga, gono gapemhelusagwa no kugumilwa ako na ako ne mbeho.

^7-8 Umunhu mono yenha nhavivyo, mono yena mahweso gono gali hejete, nha kekalaga yakukangamyanga mu mikalile yakwe yose, holeka yalece kutya kopegwa co cose kulawa kuli Muwaha.

U wuciwa no Wugoli

⁹ Ninga u Mukilisito muciwa yimunojeye yawe na nyemo lono Mulungu yakumwinula,

¹⁰ nayo mugoli, yimunojeye yawe na nyemo lono yakugwiswa no Mulungu. Hambi umugoli nha kokwajilila nhe liluwa lya mu mbago.

¹¹ Hambi lizuwa nha lidulaga, na kolo likukalipa linyazaga mahanze, ne maluwa gayo gakungʼunhikaga, no wuswanu wayo wose wuhodanjikaga. Ale nha vivyo, no mugoli nayo kolo kongomezezwa mu metumo gakwe.

Majelo

¹² Mumoti munhu mono yakukangalila wujelwe, hambi kolo yeza yasuma nha kopegwa i cihumbilizwa co wumi cono Mulungu yawatemezezya wawalya wono wamwendile.

¹³ Na lono munhu yakujelwa, yalece kutya, “Nghujelwa no Mulungu.” Hambi u Mulungu nha sikosuma kujelwa no wubi, hamba mweneco, sikamujelaga munhu wo wose.

¹⁴ Ninga u munhu kajelagwa lono yakukwegwa no kusumwa ne masulumizi gakwe mweneco.

¹⁵ Na lono wusulumizi wenjipa wulelaga wubi, nawo wubi kolo wakangala, wulelaga lifwa.

¹⁶ Nye wandugu zangu wendece, mulece kukongwa.

¹⁷ Ivipegwa vyose viswanu ne vilavywa vyose vyono vikwilaniciye vilawaga ku wulanga, vilawaga kuli Sogo ya munhu, u Muwumbi we mazelu ga ku wulanga, mono yasina cipitupitu hamba yasina cinji co cose cono cosuma kumuletela wupituce.

¹⁸ So wendo wakwe mweneco yacilela mu nghani yakwe ye mbeka, ho ciwe nha cili mikalo milongozi wa muli viwumbwa vyakwe.

I cihuliko no witume

¹⁹ Wandugu zangu wendece, kumbucilenyi nghani yiyi! Umunhu wo wose yeze mupelu kuhulika ninga yalece kuwa mupelu kulonga hamba yalece kuwa mupelu kusimba.

²⁰ Hambi u munhu mono yena likuwo, nha sikosuma kwituma u wuhile wo Mulungu wono wuli lingʼani.

²¹ Holeka, muyilecelaje lukulu i mikalile yenyu mibi ne mijendele yose yo wavu, mwiwice mu miwoko yo Mulungu no kuyibocela nghani yiyilya yono hadikwe mu zinhumbula zenyu, yono yosuma kuziponya zinhumbula zenyu.

²² Mulece kwiyikonga nyo weneco, mu wuhuliciza i nghani yakwe du, langa mweze wetuma i nghani yakwe.

²³ Wo wose mono kahulikaga nghani yiyo, hamba siyakuyituma, yuyo yehwanile u munhu mono yakwilanga ifuta yakwe mwilole.

²⁴ Hambi nha kelangaga mweneco, hanyuma yayo kabita, na lulo lulo baho du kawa kwiyisemwa nha vyono yali yenha.

²⁵ Langa umunhu mono yakuwulanjisa muno muno wulajilize wono wukwilaniciye wono wupelaga wanhu welecele, no munhu mono yakujendelela loiwibata, hamba sikuwuhulika du, no kuwusemwa hanyuma yayo, langa yakwitumamila, umunhu yuyo kowa mumoti muli vyose vyono yakwitumama.

²⁶ Na hono munhu yewone mweneco nha munhu mono yebate dini muno muno, ninga kuno siyakusuma kulwimila lulimi lwakwe, dini yakwe u munhu yuyo yikuwa yisina hamba cambuzi co cose, langa yakwikonga mweneco du.

²⁷ Hambi dini yono yelile na yono yisina manamha manamha ha mwande yo Mulungu u Sogo yo munhu nha yoyi: Kuwataza wana wono wasina walezi wawo, ne wacekulu wafwile mu wugaye wawo, no kwiyilanjilila go mweneco ho wulece kutipizwa ne yinze yiyi.