Wugubule 8 - I CILAGANE CIPYA 1991

I cinamatizo co mupunghati

¹ No Mwana we ngholo yali yeza kucinamatula i cinamatizo co mupunghati, ku wulanga kukawa twii, nha lipango lya nusu saa.

² Hanyuma nghawa kuwawona wa walye wamalayika mupunghati wono wemile hali Mulungu wakupegwa ndulele mupunghati.

³ Na malayika yunji yakaza, akuno yadinghuye cifusizo ca zahabu mu muwoko wakwe, nayo yakema ha wukumbicilo co kufusiza wuvumba. Nayo yakapegwa wuvumba winji ho yawulavye cilavya hamonga ne malombo ge wanhu wose wo Mulungu ho yagalavizye mu cikumbicilo ce zahabu cono cili heʼgoda lyo wutemi.

⁴ Ne lyosi lyo wuvumba hamonga ne malombo ge wanhu wo Mulungu, vikananucila mu muwoko wa malayika yuyo mono yali yali hali Mulungu.

⁵ Hanyuma yuyo, yakasola cifusizo, yakacimemya moto wono yawusola mu wukumbicilo, yakacigumila kononze. Baho hakawa na mabalalusi, ne mazi, ne mamuli, sunga ne litulo lye yisi.

Ndulele

⁶ Hanyuma wa walya i wamalayika mupunghati wono wali wena zindulele mupunghati, nawo wakewikaniza ho wazitowe.

⁷ Malayika u mulongozi yakayitowe ndulele yakwe. Hobaho yikagwa kononze mvula ya mabwe, yono yali yihangahanjile no moto, hamonga ne sakami. Ne libimha lye kadatu lye yinze likatakamila, ne libimha lye kadatu lye mabici likatakamila, hamonga ne mahanze gose ge dedede gakatakamila.

⁸ Nayo malayika we kejete yakayitowe ndulele yakwe. Na cinhu cinji kotya itunda yiwaha muno lyono likwaka moto, likagumilwa mwilenga. Ne libimha lye kadatu lye lilenga likawa sakami,

⁹ libimha lye kadatu lye viwumbwa vya milenga vikafwa, ne libimha lye kadatu lye zingalawa, nazo zikahodanjika.

¹⁰ Hanyuma malayika we kadatu nayo, yakayitowa ndulele yakwe. Ne nyelezi mbaha yono yakaga nha moto, yikagwa kulawa ku wulanga, nayo yikagwila mwibimha lye kadatu lye makolongo ne mivwilo ye malenga.

¹¹ (Inyelezi yiyo yicemagwa “Wusungu.”) Holeka libimha lye kadatu lye malenga, gakawa makali, ne wanhu wenji wakafwa ku soko yo wungʼwe we malenga gago, vyono gali geza makali.

¹² Malayika we kane nayo yakayitowe ndulele yakwe. Na hobaho libimha lye kadatu lye lizuwa, na lyo mwezi, na lye zinyelezi likatowa, sunga no wuzelu wayo, wukatukuwazwa libimha lye kadatu lyo wungʼalale wayo. Ne libimha lye kadatu lye misi likawa lisina wuzelu, sunga ne libimha lye kadatu lye cilo, nalyo nha vivyo.

¹³ Nane naza langa, nghahulika numba yiguluce yili kucanyha muno muno, akuno yikulonga kweʼzi iwaha yikutya, “Woyi he, woyi he, woyi he, kuli wono wowa wakali wekaye mononze, lono wamalayika wadatu wono wasigaye kolo wakuzitowa zindulele zawo!”