Wugubule 7 - I CILAGANE CIPYA 1991

U wuwicilwe vitanjilo kuli wanhu 144,000 wa Isilayeli

¹ Hanyuma ya zizo, nghawona wamalayika wane, wemile mu zinhuzi zose ze yinze vyono yine, akuno webatilize mbeho ze yinze, ho mbeho yilece kuputa munze hamba hadodo, hamba mu yisi, hamba mu malenga, hamba mu mabici.

² Kanyhi nghamuwona malayika yunji yakulawilila ku lubavu lwe cilima yakubita kucanyha, akuno yena ne cinamatizo co wo Mulungu u mumi. Nayo malayika yuyo yakazoza kweʼzi ʼwaha, yakuwalonjela wawo wamalayika wane wono wali wapejigwe vilungo vyo kuhodanga yisi ne malenga,

³ nayo malayika yuyo yakatya, “Mulece kuyihodanga yisi, hambe malenga, hambe mabici, sunga kolo cakondya kuwawicila citanjilo mu wusu wawo, i wetumami wo Mulungu wetu.”

⁴ Hanyuma nghahulika i liwalo lya wawo wono wawicilwa citanjilo, nawo wali nhavi, wanhu elufu igana limonga na makumi mane na yine we nghungugo yose ye wanhu wa Isilayeli.

⁵ Wa mu nghungugo ya Yuda wali wanhu elufu ikumi na nyejete. Wa mu nghungugo ya Lubeni, elufu ikumi na nyejete Wa mu nghungugo ya Gadi, elufu ikumi na nyejete.

⁶ Wa mu nghungugo ya Asheli, elufu ikumi na nyejete. Wa mu nghungugo ya Nafutali, elufu ikumi na nyejete. Wa mu nghungugo ya Manase, elufu ikumi na nyejete.

⁷ Wa mu nghungugo ya Simiyoni, elufu ikumi na nyejete. Wa mu nghungugo ya Lawi, elufu ikumi na nyejete. Wa mu nghungugo ya Isakali, elufu ikumi na nyejete.

⁸ Wa mu nghungugo ya Zabuloni, elufu ikumi na nyejete. Wa mu nghungugo ya Yusufu, elufu ikumi na nyejete. Wa mu nghungugo ya Benyamini, elufu ikumi na nyejete.

I mapuga ge wanhu we zinghungugo zose

⁹ Hanyuma naza kulanga, nghawona ipuga yiwaha lye wanhu si wakuwala, wanhu we zimbeyu zose, ne milango yose, na we zinonga zose. Nawo wali wemile heʼgoda lyo wutemi, na hali Mwana we ngholo, akuno wavwalile vivwalo vizelu, kanyhi webate ne manhambi ge mitende mu mawoko gawo.

¹⁰ Wakalonga ne mazi mawaha, wakutya “I mhonelo yetu yikulawa kuli Mulungu wetu mono yekaye mwigoda lyo wutemi, kanyhi na kuli Mwana we ngholo!”

¹¹ Nawo wamalayika wose wakenuka, wakalipilima ligoda lyo wutemi, hamonga na wa walya wawaha hamonga na vi vilya i viwumbwa vine. Wose wakagwa funama heʼgoda lyo wutemi, wakamuhembo Mulungu,

¹² wakutya, “Heya! I lilumbo no lukumyo, ne mahala, ne wulumbe, ne cogopo, ne vilungo no wuwaha, viweze kuli Mulungu wetu cibitilila ne cibitilila! Heya!”

¹³ Yunji muyagwe na wawalye wanzehe yakambuza yakutya, “Alu mwene wawa wono wavwalile vivwalo vizelu, wo wanhuci? Na kanyhi, walawa hayi wene?”

¹⁴ Nane nghamupitula nghamutya, “Muwaha, gwegwe wumanyile!” Nayo yakanonjela yakutya, “Wawa awa, wo wawalya wono wakola wapolile mugati yo wugaye wuwaha. Ne myenda yawo, wakayezeza mu sakami yo Mwana we ngholo, nayo yikawa mizelu swe.

¹⁵ Holeka wukuwawona wali heʼgoda lyo wutemi lyo Mulungu. Nawo wamwitumamilaga u Mulungu mu wuhembelo wakwe, misi na cilo, nayo mono yekaye mwigoda lyo wutemi, nayo kokoma lihema lyakwe muli wene ho yawadime.

¹⁶ “Nawo si wolowonela lukulu nzala hamba nyhilu, ne lizuwa hamba moto wunji, si wolowatowa kanyhi,

¹⁷ hambi u Mwana we ngholo mono yali haciligati ye ligoda lyo wutemi, nha yo kolowa yo mudimi wawo, nayo kowatonga sunga ko ku mivwilo ye malenga go wumi. No Mulungu kogapatila lukulu mahozi gose ga mu meso gawo.”