Wugubule 6 - I CILAGANE CIPYA 1991

U Mwana we ngholo yakuvinamatula vinamatizo

¹ Hanyuma nghawa kumuwona u Mwana we ngholo yakunamatula cinamatizo cinji ca muli vinamatizo vi vilya mupunghati. Nghahulika ciwumbwa cimonga ca muli viwumbwa vine vyumi, cikulonga kweʼzi ʼwaha neʼzi lye balalusi cikutya, “Wuze!”

² Nane naza kulanga, nghawona kumbe baho hoyili fwalasi monga nzelu. Na mono yali yali mucanyha yayo, yali yena wupinde, kanyhi yakapegwa no mukumbo. Nayo yakawuka baho nha mono yakondya kusuma, ho yajendelele kusuma.

³ Mwana we ngholo nayo yakawubena kanyhi muhuli we kejete. Nghahulika i ciwumbwa cumi ce kejete cikutya, “Wuze!”

⁴ Nane naza kulanga, kumbe kanyhi hakawa na fwalasi yinji ndunghu baho. Nayo mono yali yali mucanyha yayo, yakapegwa vilungo vyo kuleta wulugu mononze, wanhu wewulaje, kanyhi yakapegwa no mumaje muwaha muno.

⁵ Hanyuma kanyhi u Mwana we ngholo yakacinamatula cinamatizo ce kadatu. Nane nghahulika ci cilya ciwumbwa cumi ce kadatu cikutya, “Wuze!” Nane nghalanga baho nghawona kanyhi fwalasi yinji nhitu. Na mono yali yali mucanyha yayo, yali yena mu muwoko wakwe vipimilo vyejete vyo kupimila wuzito.

⁶ Nghahulika cinhu cinji kotya nha yizi lyono likulawilila kuli vi vilya viwumbwa vine vyumi. Nalyo lizi lilyo likatya, “Cibaba cimonga ca wusaje wa ngano, cogulwa dinali monga, na vibaba vidatu vya sayili, navyo vyogulwa dinali monga nha vivyo. Ninga wulanjilile, wulece kuhodanga mafuta hamba divayi!”

⁷ Hanyuma kanyhi Mwana we ngholo yakawubena muhuli we kane. Nghahulika ciwumbwa cumi ce kane cikutya “Wuze!”

⁸ Nane nghalanga, nghawona baho fwalasi yinji ye liwala lye silu. Ne litagwa lyo mono yali yali mucanyha yayo, yacemagwa Wufwe na Ahela vityatizye nayo. Ale, wawo wakapegwa vilungo mwipinga limonga lye lipinga lye yinze ho wawawulaje wanhu ko mumaje, ne nzala, ne lihuhuji, na kwe malimu makali ga mononze.

⁹ Hanyuma kanyhi u Mwana we ngholo yakacinamatula i cinamatizo ce hano. Ale hasi ye cikumbicilo co kufusiza wuvumba, nghawona awalya wono wawulagwa ku soko ye nghani yo Mulungu, na ku soko yo kuyiganula.

¹⁰ Nawo wakalila kweʼzi ʼwaha wakutya, “Agwe go Muwaha, mono welile kanyhi mono wuli mwihuwilwa, alo sunga vipulute vilo vilinga, ho wuze wuwalingʼanize no kuwalipiciza wose wono wekaye mononze, ku soko yo wu wulagwe wetu wono wali kuciwulaga?”

¹¹ Nawo wo wakapegwa yumonga yumonga civwalo cizelu, wakalonjelwa vyono walindile lindile hadodo, sunga kolo lyakondya kuficilicila i liwalo lye wetumami wayawo, kanyhi ne wandugu zawo wono wowulagwa nha vyono wawulagwa weneco.

¹² Nane nghawona lono Mwana we ngholo yakabena cinamatizo co mutandatu, kukawa neʼtulo yiwaha lye yisi, ne lizuwa likatukuwala nhe mwenda ititu no mwezi nawo, wukadunghuwala nha sakami.

¹³ Zinyelezi nazo zo wulanga, zikagwa hasi nha mana go mukuyu gono si gakangaye, vyono gakunghunhikaga lono mubici wayo wukusinjiswa ne mbeho mbaha.

¹⁴ No wulanga nawo wukajilila, wukawa nha kalatasi yono mhalinjizwe. Matunda gose hamonga ne vizingwa vyose, vikawuswa hanhu hayo.

¹⁵ I watemi wa mononze, ne wawaha hamonga ne wawaha we wasilikale, ne wagoli, na we vilungo, ne wanhu wose, watumwa ne walele wakehundika mu mapango na mu mabwe mawaha muno ga mu matunda.

¹⁶ Wakawa kugalonjela matunda na gago mabwe mawaha muno muno wakutya, “Ale, cigwilenyi si, mucihundicize ha yuyo mono yekaye mwigoda lyo wutemi, kanyhi ho ciwe kutali ne likuwo lyo Mwana we ngholo!

¹⁷ Hambi lizuwa lyo kogofya, lye likuwo lyawo, nha lyakondya kuza. Alu nani ʼmbi mono kosuma kwima no kwidoma nalyo?”