Wugubule 4 - I CILAGANE CIPYA 1991

Uwuhembi ku wulanga

¹ Hanyuma ya zizi, nghalanga, nghawona mulango wono wuli mwazi ku wulanga. Ne lizi lililya lyono nalihulika hamwamulizo, lyono lyali nha mulilo wa ndulele, likatya, “Wunanuce ahano hono kacanyha, nane nokulajila zinghani zono zilejela hanyuma.”

² Ho baho baho du nghawa mu Muhe. Kumbe kuko ku wulanga holili yigoda lyo wutemi, na mucanyha yalyo, yali yekaye yunji.

³ Nayo yuyo mono yali yekaye mwigoda lilyo, ku wulanje, yali yehwanile alimasi ne libwe yidunghu yiswanu muno. Kanyhi kwali kolili icilalyambwa lye mvula, lyono likungʼalala, na kuwulanje, linha lili dedede, nalyo likawa lipilime ligoda lyo wutemi mbavu zose.

⁴ Hakawa hogali magoda makumi mejete na mane gono gali galipilime ligoda lyo wutemi, na mu magoda gago, wali wekaye wawaha makumi mejete na wane, nawo wali wavwalile vivwalo vizelu, na mu mitwe yawo, wali wavwalile mikumbo ya zahabu.

⁵ I mamuli ne lizi hamonga ne madidimo mawaha, vyalawaga baho heʼgoda lyo wutemi. Sunga ne zitala mupunghati zo moto, nazo zakaga baho heʼgoda lyo wutemi. Ne zitala zizo, yo myuhe mupunghati yo Mulungu.

⁶ Na hamwande ye ligoda lyo wutemi, hali ho cili cinhu cinji cono cihwanile malenga ga cilole, ne malenga gago gakawa gakungʼalala kotyeʼbwe lyono likungʼalala muno muno. Na mu mbavu zose ze ligoda lilyo lyo wutemi, mu wupilime walyo, kwali kovili viwumbwa vine vyumi. Ne viwumbwa vivyo vikawa vimemile meso, ku mwande na kunyuma.

⁷ I ciwumbwa cilongozi cali cihwanile simba, ce kejete kotya ngʼombe, na ce kadatu cali cina futa kotya ya munhu, naco ce kane, cali cinha kotya numba yikuguluka.

⁸ Ne viwumba vivyo vyose vyono vine, vyali vina mabawa mutandatu mutandatu, kanyhi vyali vimemile meso, mugati na mudeha. Navyo vikalaga vikwimba hamba kuceha cilo ne misi, vikutya, “Welile, welile, welile, yo Muwaha Mulungu Mono yali vilungo mono yali, mono hoyuli, na mono yakuza.”

⁹ Na lono viwumbwa vi vilya vine vyembaga zinyimbo zo kumukumya, na ze cogopo, hamonga no kumulumba yuyo mono yekaye mwigoda lyo wutemi, mono kekalaga cibitilila ne cibitilila,

¹⁰ awalye wawaha makumi mejete na wane, nawo wakagwa hamwande ya yuyo mono yekaye mwigoda lyo wutemi no kumuhemba yuyo mono kekalaga cibitilila ne cibitilila, nawo wakuyiwika mikumbo yawo ha mwande ye ligoda lyo wutemi akuno wakutya,

¹¹ “Agwe yo gwegwe go Muwaha nago Mulungu wetu, mono wunojeye lukumyo, ne lilumbo ne vilungo, hambi nha yo gwegwe muwumbi we vinhu vyose, na ku so wuhile wako, vyose vikawa, na vyose vyapegwa wumi no kuwumipa.”