Wugubule 18 - I CILAGANE CIPYA 1991

U wongomele we likaya lya Babiloni

¹ Hanyuma ya zizi, nghamuwona malayika yunji yakutima kulawa ku wulanga. Yali yena vilungo viwaha, ne yinze yikamulikwa so wungʼalale wakwe.

² Nayo yakalonga kweʼzi yiwaha, yakutya, “Ligwa Libabiloni liwaha, lingwa! Aluno weza wuli wikalo we masetani hamonga na myuhe yiyi, kanyhi weza wuli wikalo we zindeje zinyavu, kanyhi ze cikomaza muno.

³ Hambi i makungugo gose nha gakoligwe ku soko ye divayi yi nghali yo wusenyha wakwe. Nawo watemi wa kononze wanoza wusenyha nayo, ne wasuluza wa kononze wagolipe ku soko ye mikalile yakwe yo wiyendeze, yono yisina wiyimile.”

⁴ Nghahulika lizi linji likulawa ku wulanga likutya, “Anye nyo wanhu wangu, muwuce muli mwene, ho mulece kuhanga nayo mu wubi wakwe, ho mulece kuwutuga u wulipicizwe wakwe.

⁵ Hambi u wubi wakwe, nha weza winji muno, nawo wipanjile sunga ko ku wulanga, no Mulungu kakumbucila zinzila zakwe zo wubi wakwe.

⁶ Ale mumutendelaje nha vyono yamutendelenyi nyenye, mumuwuyajizaje kejete nha vyono genha i metumo gakwe. Memyenyi i cikombe cakwe ko wungʼwe wukali kali kejete, si nho wungʼwe awulya wono u mwene yamupelenyi.

⁷ Mumupelaje magazo no wusungu, mu nghango yo wikumye wakwe, ne mikalile yakwe yo wiyendeze. Hambi nha yakwiyitya mu nhumbula yakwe, ‘Ane nikaye baha, ane nili mutemi we cicekulu. Ane si nili mufwile, hamba si nowutuga wusungu!’

⁸ Na ku soko yiyo, i magazo gakwe gomwagana mwizuwa limonga, wutamwa, wukalale, ne nzala. Nayo konyanywa mu moto, hambi u Muwaha Mulungu mono yakumulingʼaniza, nha yo Mudaha vyose.”

⁹ I watemi wa kononze wono wasenyha nayo, no kwikala nayo mu mikalile yo wiyendeze, wololila citalo, kolo wakuliwona lyosi lye likaya lilyo lyono likuticimila.

¹⁰ Nawo wolowa wemile kutali muno, wakugogopa i magazo gakwe, akuno wakutya, “Woyi he! Woyi he kuligwe go Babiloni, i likaya litambule kanyhi lye vilungo! Mwidaha lya saa monga du, u wulipicizwe wako wakondya kukuziza.”

¹¹ Ne wasuluza wa kononze wololila no kumulilila citalo, nha holowa hasina kanyhi munhu mono kosuma kugula vinhu vyawo vyo wusuluza,

¹² hasina kanyhi mono kogula zizahabu zawo, hamba fweza zawo, hamba mabwe gawo go wuguzi wukamu, hamba zilulu zawo, hamba bafuta ne myenda ye liwala lyo lugandu, hamba halili yawo ne myenda midunghu, ne viya vyose vye mawala gose ge mabici ge nghulunje, hamba viya vye mahembe ge zinhembo, hamba cuma ne malumalu,

¹³ hambo mudalasini, ne hati ye zimboga, wuvumba, manemane, wudi, divayi, mafuta, wusaje, ne ngano, ne zingʼombe, ne zingholo, ne zifwalasi, ne magali go kukwegwa, hamba wawanda wawo, sunga no wumi we wanhu.

¹⁴ I wasuluza wakumutya, “Alu cambuzi cose cono wali wucilanjiliye, alu ceyagala, no wugoli hamonga no wumoti, vyose vyakondya kukuwucila, hamba si kosuma kuvituga kanyhi!”

¹⁵ I wasuluza wono wagolipa ku soko ye likaya lilyo, wolokwima kutali, ku soko yo woga we magazo gakwe, wolongʼungʼulika no kulila citalo,

¹⁶ akuno wakutya, “Woyi he! Woyi he kuligwe go likaya liwaha. Wali wazowela kuvwala myenda ye bafuta ze liwala lyo lugandu ne ndunghu, hamonga no kwihamba kwe zizahabu, ne mabwe go wuguzi wukamu ne zilulu!”

¹⁷ Ninga alu wugoli wako wose wukuwucila mwipango lya saa monga du! Hanyuma i wajendya zingalawa wose, hamonga ne wanya mihinzo wawo wose, ne wajendela mwilenga, sunga na wose wono wetumaga milimo mwilenga, wose wakema kutali,

¹⁸ nawo wali kuliwona lyosi lyo moto wono waliticimiza, nawo wakalila kweʼzi yiwaha muno, akuno wakutya, “Kukali hamba si nawa ne likaya lyono linha nhe likaya lilino liwaha!”

¹⁹ Nawo wakeyitila manghundi mu mitwe yawo akuno wakulila muno muno kwe mazi mawaha no kulila citalo wakutya, “Woyi he! kuligwe go likaya liwaha! Lye kaya lyono wose wanye zingalawa zono zikujendela mwilenga mo wagolipila so wugoli walyo. Ninga wakondya kwajiliza i vinhu vyawo vyose mwipango lya saa monga du!”

²⁰ Ale, wusecelele go wulanga ku soko yo wuhodanjice wakwe. Nanye nyo wanhu wo Mulungu, musecelele, nanye nyo watumwa ne wawizi, ale musecelele nha vivyo! Hambi u Mulungu nha kalilipiciza ku soko ye metumo galyo gono lyamutendelenyi nyenye!

²¹ Hanyuma malayika yunji mono yali vilungo muno, yakenula libwe yiwaha lyono lihwanile nho luzala luwaha lo kusajila, nayo yakaligumila mwilenga akuno yakutya, “Nha vivyo ne likaya liwaha lya Babiloni vyo lyogumilwa no kwajililila lukulu, hamba kwijela yaye.

²² Ne mazi ge watowa masumbi, ne mazi ge watowa zingʼoma, ne mazi ge watowa zifulembe ne zindulele, si golohulikwa kanyhi muligwe. Hasina hamba fundi we liwala lyo lyose kanyhi mono kosuma kwijela muli gwegwe, hamba ne lizi lyo luzala lo kusajila si lyohulikwa kanyhi muli gwegwe.

²³ No wuzelu we tala si wokwijela kanyhi mugati yako, hamba mazi ge wa bwana halusi na bibi halusi nago si gohulikwa muli gwegwe kanyhi. Ne wasuluza wako wali wo wawaha kononze kose, na ku soko yo wuhawi wako, i makungugo gose gakakongwa.”

²⁴ I likaya lilyo likalipicizwa ku soko vyono mugati yayo yejela i sakami ye wawizi, ne sakami ye wanhu wo Mulungu, sunga ne sakami ye wanhu wose wono wawulagwa kononze.