Wugubule 16 - I CILAGANE CIPYA 1991

I mabakuli ge likuwo lyo Mulungu

¹ Hanyuma kanyhi nghahulika lizi yiwaha likulawa ku wuhembelo, lizi lilyo likuwalonjela wawalya wamalayika mupunghati, likutya, “Ale mubite mukagamwaje mu yinze gago mabakuli mupunghati ge likuwo lyo Mulungu.”

² Ale, malayika mulongozi yakabita yakalijidila libakuli lyakwe mu yinze. Ho baho baho kukawa malonda mabi muli wanhu kanyhi gono gakuwatamisa muno muno, nago malonda gago gakawa muli wanhu wose wono wali wena citanjilo ce lilimu lililya, na wawalya wono wacihemba cihwani calyo.

³ Nayo malayika we kejete yakalijidila libakuli lyakwe mwilenga. Nalyo lilenga likagaluka, likawa sakami yose, nha sakami ya munhu mono yafwiye, sunga ne viwumbwa vyumi vyose vya mwilenga vikafwa.

⁴ Malayika we kadatu nayo yakalijidila libakuli lyakwe mu makolongo na mu mivwilo ye malenga, navyo vyose vikagaluka sakami.

⁵ Nane nghamuhulika malayika muwaha u mulindilizi we malenga, yakutya, “Agwe Mono Welile mono wuli baha na mono wali baho kulawa katali Agwe wuli lingʼani mu ningʼaniza yako yiyi yono wuyinozize.

⁶ Hambi nha wayimwaga sakami ye wanhu wako, sunga na ye wawizi, holeka nagwe kuwapela i sakami wayingʼwe, na mbeka vyo yiwanojeye!”

⁷ Hanyuma nghahulika lizi kulawa mu cikumbicilo, likutya, “Heya go Mulungu u Mudaha vyose, i ningʼaniza yako yo ye mbeka kanyhi ye lingʼani.”

⁸ Nayo malayika we kane yakalijidila libakuli lyakwe mwizuwa. Nalyo lizuwa likapegwa vilungo vyo kuwanyanya wanhu ko moto walyo.

⁹ Iwanhu wakanyanywa vibi muno muno, wakawa kumuliga Mulungu mono yena vilungo muli magazo gago mawaha. Ninga hamba si wawuleka u wubi wawo, no kumukumyo Mulungu.

¹⁰ Malayika we hano nayo yakalijidila libakuli lyakwe mu wikalo wuwaha we lililya lilimu. Uwutitu wukawa kudinda mu wutemi walyo, wanhu wakawa kwilumanga i zinimi zawo ku soko yo wusungu,

¹¹ wakamuliga Mulungu wa ku wulanga ku soko yo wusungu wawo we malonda gawo. Ninga hamba si wagaleka i metumo gawo mabi.

¹² Nayo Malayika wo mutandatu yakalijidila libakuli lyakwe mwikolongo liwaha lyono likucemwa Efulata. Ne malenga galyo gakawa kunyala, na munzila yiyo yinzila yikawa kunozwa so watemi wono wazaga wakulawa kucilima.

¹³ Hanyuma nghawona myuhe midatu myavu yinha madelu, yikulawa mu mulomo wa lililye lizoka, na mu mulomo wa lililye lilimu, na mu mulomo wa yulyo muwizi wo wulambi.

¹⁴ Ayi yo myuhe ye masetani yono yinozaga mapoto. Yiyi myuhe midatu yo yiyo yono yiwabitilaga watemi we yinze yiyi yose, no kuwakonghola hamonga ho wehome wulugu wuwaha mwizuwa liwaha lyo Mulungu Mudaha vyose.

¹⁵ “Wuhulicize! Ane nghuza nha muhizi! Holeka, mumoti munhu mono yakwikala meso, no kuvwala myenda yakwe, ho yalece jenda cipwi ako na ako ha mwande ye wanhu.”

¹⁶ Hodu, yiyo imyuhe myavu yikawa kongholela hamonga wawo watemi, hanhu hono hacemagwa mu Cihebelaniya Hali-Magedoni.

¹⁷ Hanyuma malayika wo mupunghati, nayo yakalijidile libakuli lyakwe mu mbeho. Ne lizi liwaha likahulikwa likulawa mwigoda lyo wutemi, mu wuhembelo, likutya, “Yakondya kuwa!”

¹⁸ Hodu, kukawa na mamuli, mazozo, mabalalusi, ne litulo liwaha lyeʼsi, litulo lyeʼsi lyono likali si nejela hamba hadodo kuwulawa lono Mulungu yamuwumbilo munhu.

¹⁹ Ne likaya lililye liwaha likatemanulwa hali hadatu, ne makaya ga we makungugo gakagwa. Likaya liwaha lya Babiloni, Mulungu hamba si yalisemwa yaye. Yakalingʼwesa i cikombe ce divayi ye likuwo lyakwe.

²⁰ Ne vizingwa vyose vikatiza, ne matunda nago hamba kwijela yaye.

²¹ Ne mvula ye mabwe mawaha gono gali gena wuzito nha wa kilo makumi mahano limonga limonga, yikawatonyela wanhu. Nawo wanhu wakamutovula u Mulungu ku soko ye ligazo lye mvula yiyo ye mabwe. Ne ligazo lye mvula yiyo ye mabwe, lyali igazo yiwaha muno muno.