Wugubule 15 - I CILAGANE CIPYA 1991

I cililo ciwaha ce ndumilizo

¹ Hanyuma nghawona citanjilo cinji ku wulanga citanjilo JL ciwaha muno kanyhi ca wizine. Baho hali na wamalayika wali mupunghati, wena magazo mupunghati ge ndumilizo. Ne likuwo lyo Mulungu lyomalicila mu magazo gago mupunghati.

² Nghawona cinhu cihwanile lilenga nha cilole, lyono lihangahanjlie no moto. Nghawawona ne wanhu wa walya nha vivyo, wono walisuma lilimu lilya hamonga ne cihwani calyo, i lilimu lyono litagwa lyalyo likutambulwa mu nzila ye liwalo lililya. Ne wanhu wawo wali wemile heʼlenga lye cilole, akuno wena ne masumbi gono Mulungu yawapela.

³ Nawo wembaga u lwimbo lwa Musa u mwitumami wo Mulungu, no lwimbo lo Mwana we ngholo, wakutya, “Muwaha Mulungu, u Mudaha vyose i metumo gako ga wizine muno muno! Gwe go Mutemi we makungugo, zinzila zako zo ze wilingʼano kanyhi za mbeka!

⁴ Go Muwaha, alo naniʼmbi mono si yakogopile gwegwe? Hamba naniʼmbi mono si yakulikumya ilitagwa lyako? Agwe yo gwegwe mono welile du wuli wene. Ne makungugo gose gokuza kwako ho gakuhembe, hambi i metumo gako, nha gali lingʼani kanyhi gejeye ne wanhu wose.”

⁵ Hanyuma ya zizo, nghawona wuhembelo ku wulanga wudiguywe, wuli mwazi, na mugati yayo molili lihema lyono likulajila vyono mbeka u Mulungu yali baho.

⁶ Ale, wamalayika wawalya mupunghati wono wena magazo mupunghati, wakalawa mumo mu wuhembelo, akuno wavwalile vivwalo vya bafuta vyono vikungʼalala muno muno, wena ne misipi ya zahabu mu zimhambaga zawo.

⁷ Hanyuma ciwumbwa cinji ciyagwe ne viwumbwa vivilya vine vyumi, cikawapela wawalya wamalayika mupunghati, mabakuli ga zahabu gono gamemile likuwo lyo Mulungu, mono kekalaga cibitilila ne cibitilila.

⁸ U wuhembelo wukamema lyosi lyono lyaletwa no lukumyo ne vilungo vyo Mulungu, hasina hamba munhu wo wose mono yasuma kwinjila mu wuhembelo, sunga gaze gakondye kumalika magazo mupunghati mawaha, ge wamalayika wawalya mupunghati.