Wugubule 14 - I CILAGANE CIPYA 1991

U lwimbo lwe wahu wono wakombozwa

¹ Hanyuma nghawona ilitunda lya Sayuni, no Mwana we ngholo yemile mucanyha ye litunda lilyo, hali howali ne wanhu igana limonga na mukumi mane na yine elufu wono wali wemile hamonga nayo, wono wali wandikwe mu wusu wawo, litagwa lyo Mwana we ngholo hamonga ne litagwa lyo Sogwe.

² Nghahulika lizi kulawa ku wulanga, lizi lyono lyali nha lizi lya malenga menji kanyhi kotya nha mabalalusi mawaha. Lizi lyono nalihulika likawa kanyhi nhe watowa masumbi wono wakugatowa i masumbi gawo.

³ Nawo wa walya i wanhu elufu igana limonga na mkumi mane na yine wembaga u lwimbo lupya ha mwande ye ligoda lyo wutemi na hali avilya viwumbwa vine vyumi, hamonga na wa walye wawaha. Na hasina munhu mono yasuma kwijizo lwimbo lulo, langa hono si wa walya du wanhu we ligana limonga na makumi mane na yine elufu wono wagulwa mononze.

⁴ I wanhu wawo, wo wanhu wono weyikamisa mu wele wose, wono siwetumana makani go wusulumizi na wecicekulu, hambi wene nha wasindile. I wene wawo, wamutyatyaga Mwana we ngholo ko kose kono yakubita. Wawo wo wagulwa kulawa muli wanhu wanji, kanyhi wakawa wo walongozi kulavywa kuli Mulungu na kuli Mwana we ngholo.

⁵ Kanyhi hasina cidaha cinji co cose cono wakawa walambi, wasina hamba yilema lyo lyose.

I wamalayika wadatu

⁶ Hanyuma nghamuwona kanyhi malayika yunji yaguluce mu wulanga, yena no Luganuzi Luswanu lwe cibitilila lo Mulungu ho yaluganule kuli wanhu wose wono wekaye mononze, kuli makungugo gose, ne zimbeyu zose, ne wanhu we milonjele yose, na kuli wanhu wose we mawala gose.

⁷ Nayo malayika yuyo yakalonga kweʼzi yiwaha yakutya, “Ale mumogopajo Mulungu, kanyhi mumukumye! Hambi cidaha co kulavye ningʼaniza yakwe, nha cakondya kuza. Holeka mumuhembaje mweneco mono yawumba wulanga ne yinze, lilenga ne mivwilo ye malenga.”

⁸ Malayika we kejete nayo, yakamutyatya yu yulyo mulongozi yakutya, “Woyi, lyagwa! Heya, lyagwa nye, li Babiloni liwaha lyagwa! Li Babiloni lyono lyawangʼwesaga divayi yalyo, wanhu wose we makungugo gose, divayi yono nghali, divayi yo wusenyha walyo!”

⁹ Nayo Malayika we kadatu yakatyatilila munyuma wulonje we wayagwe, yakalonga kweʼzi yiwaha yakutya, “U munhu wo wose mono kolihemba lilimu lilyo hamonga ne cihwani calyo, mu muwoko walyo,

¹⁰ ale u munhu yuyo koyingʼwa divayi ye likuwo lyo Mulungu, divayi yono yakondya kujidilwa mu cikombe ce likuwo lyakwe, kanyhi hamba si hanza hanzwe ne malenga yaye. U munhu yuyo kogazizwa mu moto ne cibiliti, hamwande ye wamalayika wono welile na hamwande yo Mwana we ngholo.”

¹¹ Lyosi lyo moto wo wugazwe wawo, lifunghaga cibitilila ne cibitilila. I wanhu wawo langa wono walihembaga lilimu lilyo hamonga ne cihwani calyo, kanyhi wakawicilwa ne citanjilo ce litagwa lyalyo, wawo wolowa wasina wucehe wo wose ku misi na ku cilo.

¹² Na ku soko yiyo, wanhu wo Mulungu wono wakakamisa malajliizo go Mulungu no kumwihuwlia Yesu, yiwanojeye waweze no wukangalile.

¹³ Nghahulika kanyhi lizi kulawa ku wulanga likutya, “Wandice nhavi! Wo wamoti wanhu wono ku wulawa lulu, wakufwa akuno welunzize no Muwaha.” Nayo Muhe yakutya, “Heya! Woceha mu wulawa mu magazo gawo, hambi metumo ge nhuguti yawo nha gowatyatya.”

¹⁴ Nane naza langa, kumbe baho hakawa ne vunde yizelu. Na mucanyha ye livunde lilyo mwali mocili ciwumbwa cono cali cihwanile munhu. Yali yavwalile mukumbo wa zahabu mu mutwe wakwe akuno yebate ne hengo nghali mu muwoko wakwe.

¹⁵ Hanyuma malayika yunji nayo yakalawa mu wuhembelo nayo yakamulonjela kweʼzi iwaha yu yulya mono yali yekaye mwivunde yakutya, “Dedede, wuyitumamilaje hengo yako, wududule, hambi cipango ce ndudula nha cafika, i nhwanga ye yinze, yakondya kupya yaciziliza.”

¹⁶ Ale, ayulya mono yali yena hengo, mono yali yekaye mwivunde, yakayigumila hengo yakwe kononze, ne nhwanga ye yinze yikadudulwa.

¹⁷ Malayika yunji nayo yakalawa mu wuhembelo ku wulanga, nayo yena hengo nghali muno.

¹⁸ Yakaza malayika yunji nayo yakulawa mu cikumbicilo, mono yo mulanjilizi muwaha wo moto. Nayo yakamulonjela kweʼzi ʼwaha yu yulya mono yene hengo nghali muno, yakumutya, “Ale nagwe wubite wukayitumamile yiyo hengo yako inghali muno, wukadudule mavunda ge zabibu ye yinze, hambi zizabibu zayo nha zakondya kupya!”

¹⁹ Ale, nayo malayika yuyo, yakawa kuyigumila hengo yakwe kononze, yakazidudule zizabibu ze yinze yakazitajila mu ciya ciwaha co kukobonjela zizabibu, i ciya ce likuwo lyo Mulungu.

²⁰ Zizabibu zikawa kuminyilwa mu ciya cico co kukobonjela zizabibu, cono cali kunze ye likaya, sakami yikalawila mu ciya cico, musululuzi mutali wukafika nha kilometa magana madatu, no wutali wokubita hasi nha kilometa magana mejete.