Walumi 4 - I CILAGANE CIPYA 1991

Cihwani ca Abulahamu

¹ Alu colonga cici kuli za Abulahamu u sogo yetu?

² Hono yiwe Abulahamu yanozwa lingʼani so metumo gakwe, yena zo kwilumbila. Ninga si kosuma kwilumba kuli Mulungu.

³ Hambi i Mandiko Gono Gelile gakutya wule? “Abulahamu yamwihuwilo Mulungu, Nayo Mulungu yakamuvumila kuwa we lingʼani.”

⁴ Mono yakwituma, kalipagwa musahala, no musahala wuwo si cipegwa, langa yo lingʼani yakwe.

⁵ Ninga kuli munhu mono si yakwitumbila imetumo gakwe mweneco, langa yamwihuwiye u Mulungu mono kawanenelaga iwabi, u Mulungu nayo kawulumbilizaga u wihuwilo wo munhu yuyo, no kumunoza yavumilwe hali mwene.

⁶ Na kuli ze nyemo yo munhu yuyo, mono u Mulungu yakumunoza ho yavumilwe nayo, hamba kulanga ze metumo gakwe, Dawudi yakutya,

⁷ “Wamoti wono waneneywe masutya gawo no wubi wawo wufunicizwe.

⁸ Yo mumoti munhu mono u Muwaha si yakuwukumbucila u wubi wakwe.”

⁹ Alu wumoti wuwu wuli muli wono walame du, hamba sunga na muli wono si walame? Ninga wuli sunga na kuli wono si walame nha vivilya. Hambi nha cikutya, “Abulahamu yehuwila, nayo u Mulungu yakamuvumila no kumutya yali lingʼani.”

¹⁰ Alu Abulahamu yavumilwa lono yali yakali si nalama, hamba lono yali yakondya kwalama? Yavumilwa lono yali yakali si nalama, hamba si lono yali yakondya kwalama ngʼo.

¹¹ Abulahamu yalama hanyuma yayo, na mu walame wuwo, cali citanjilo cono cakangazaga vyono, u Mulungu yali yamuvumila vyono yali lingʼani, ku soko yo wihuwilo wakwe wono yali yena nawo, sunga na lono yali yakali si nalama. Holeka Abulahamu yaweza Sogo ya wose wono, hamba wawe si walame, ninga wamwihuwiye u Mulungu no kunozwa lingʼani.

¹² Nha vivyo kanyhi u mwene, yo sogo wa wose wono walame, ninga si vyono walame du, langa vyono wakuyityatya inzila yiyilya yo wihuwilo, yono no Sogo yetu Abulahamu yayityatya lono yali yakali si nalama.

U wihuwizo wo Mulungu wubocelelagwa mu wihuwilo

¹³ U Mulungu yamwihuwiza Abulahamu ne zindelo zakwe, vyono yo kolowa muhala yinze. No wihuwizo wuwo, si wanozwa vyono Abulahamu yawitumaga u Wulajilize, ngʼo, langa vyono yehuwila, yakavumilwa kuwa lingʼani.

¹⁴ Hambi hono yiwe wono wopegwa u wihuwizo wo Mulungu wo wawo du wono wakuwituma u Wulajilize, alu haco u wihuwilo waweza wusina cambuzi co cose, hamba no wihuwizo wo Mulungu, waweza si cinji kanyhi.

¹⁵ Hambi u Wulajilize nha wukozaga yikuwo, ninga hono hawe hasina u Wulajilize, hasina kanyhi hamba wusutye.

¹⁶ Ku soko yiyo holeka, inghani yiyi yili mu wihuwilo, na holeka no wihuwizo wuwo wuli so wanhu wose, si kuli walya du wono wakuwitumo Wulajilize, langa wuli na kuli walya wono wakuwumipa so wihuwilo nha vyono Abulahamu. U mwene yo sogo yetu sese wose.

¹⁷ Nha vyono Mandiko Gono Gelile gakulonga, “Nghuwika ho wuwe sogwe we zinghungugo nyinji.” No wihuwizo wuwo wo we mbeka hali Mulungu mono Abulahamu yamwihuwila. U Mulungu mono yakuwawumifya i wafu, na kanyhi kavitambulaga i vinhu vyono vili hasina, navyo vikuwa.

¹⁸ Ninga Abulahamu yehuwila kanyhi yaketumbila, kuli zono zali nghamu ku witumbile, nayo holeka yakawa sogwe we makungugo menji, nha vyono gakutya i Mandiko Gono Gelile, “U lulelo lwako, wowa wenji kotya zinyelezi.”

¹⁹ Yali mukombi mono yali yaficile kotya nha myaka igana limonga, ninga u wihuwilo wakwe hamba si wacepuka, hamba yawe yali yamanyile vyono, u muwili wakwe wali kotya nha wufwiye, no mugolece wakwe Sala nayo yali mugumba.

²⁰ Ninga Abulahamu yali yasina wukangamyanje ku so wihuwizo wo Mulungu, ninga yakatuga vilungo ku soko yo wihuwilo, nayo yakamukumyo u Mulungu.

²¹ Yali yamanyiye lukulu vyono, u Mulungu kosuma kuzifisiliza zono yehuwiza.

²² Holeka nayo Mulungu yakamuvumila vyono yali lingʼani.

²³ Na lono yikulongwa vyono “Yamuvumila,” si yikulongwa kuli mweneco du.

²⁴ Ne nghani yiyi yili na kuli sese nha vivyo mono camwihuwila u Mulungu mono yamuzukula Yesu, u Mutwa wetu, muli wafu.

²⁵ U mwene yalavywa ho yawulagwe ku soko yo wubi wetu, kanyhi yakazukulwa, ase ho cisume kuvumilwa hali Mulungu.