Wahebelaniya 9 - I CILAGANE CIPYA 1991

U wuhembi wa mononze na wa ku wulanga

¹ I cilagane cilongozi cali cina u wityatye wayo wo wuhembi ne hanhu hono helile ha wuhembelo hono hali hazenjigwe ne wanhu.

² Hali holili lihema linozwe lyono hanze yayo lyali Tina hanhu hono hacemagwa i “Hanhu Hono Helile.” Na baho ho hali no wuwiko we tala, ne meza ne mikate yono yali cilavya kuli Mulungu.

³ Na hanyuma ye libupa lye kejete, hali na lihema lyono lyacemagwa i “Hanhu Hono Helile kuciza muno.”

⁴ Mumo mo mwali cifusizo ca zahabu so kufusiza wuvumba ne lisanduku lye cilagane, nalyo lyali ibace zahabu mbavu zose, na mugati yalyo, mwali na ciya ca zahabu cono cali cina mana, ne nghome ya Haluni yono yali yitulile mahamha, hamonga na azilya i zimbawo zi nyejete zono zali zandicigwe i cilagane.

⁵ Na mucanyha ya lilyo lisanduku mwali na viwumbwa vyono vyalajilaga vyono u Mulungu yali baho, ne mabawa gavyo gali gacitile mubeho hanhu hono u wubi wukuwusizwa. Ninga alu si cosuma kulonga monga monga muli zinghani zizo.

⁶ I mipango yiyo yikafisilizwa, nawo wukawa wo moto kuli wakohani wo kwinjlia nhondo zose mwihema lilongozi lya kunze wakwituma u witumami wawo.

⁷ Ninga mwihema lye kejete, u Mukohani Muwaha du, yo yenjliaga yali wene, nayo yanozaga nha vivyo kwa mwaka kamonga du. Na lono yakwinjila mugati yategulizaga ne sakami ho yamulavizye u Mulungu ku soko yakwe mweneco na ku soko yo wubi wono wanhu wetumiye mu wuwula kumanya weneco.

⁸ Na ku wulawa mu wityatye wuwo, u Muhe Mono Yelile yakwijiza calinze vyono, mu cipango cico lono lihema lilongozi lya kudeha likali limile, ne nzila yo kwinjliila i Hanhu Hono Helile nayo yikali si yinadigulwa.

⁹ Ne nghani yiyi yo hwani ye vidaha vya lulu. Yikulajila vyono vilavya ne makumbiko vyono vikulavywa kuli Mulungu si vyosuma kuzinoza zinhumbula za wono wakuhemba ziwe zikwilaniciye,

¹⁰ hambi zizi zose zono zili mu zindigwa, no wungʼwe na mu wityatye wunji wunji wo wihovuji. Vyose vivyo go malajilizo ga munze du; ne vilungo vyayo vyoficila ku mudumo wayo kolo u Mulungu yakuvinoza wupya i vinhu vyose.

¹¹ Ninga Kilisito lono yaza, u Mukohani Muwaha we ziswanu zose zono aluno zakondya kuza. U Mwene yakwituma u mulimo wakwe mwihema liswanu na lyono likwilaniciye muno, lyono si yinozwe ne miwoko ye wanhu, nha cinji lyono si lya mononze yiyi yono yawumbwa.

¹² U Mwene yenjila i Hanhu Hono Helile kamonga du, kanyhi hamba si yasoleleza ne sakami ye mhene, hamba ya ngʼombe, langa yenjila so sakami yakwe mweneco, yakaciletela u wukombozi we cibitilila.

¹³ I wanhu wono wali wetipiza ku ci dini wasumaga kwezwa no kuwa welile, lono wamizizwa i sakami ye mhene na ye ngʼombe, hamonga ne mavu ge ndama.

¹⁴ Ninga mu sakami ya Kilisito zitumagwa nghani mbaha kuciza! Vyono mu vilungo vyo Muhe we cibitilila, Kilisito yelavya mweneco ho yawe ikumbiko lyono likwilaniciye kuli Mulungu. I sakami yakwe yocikwema i viselinji vyetu mu metumo gono gakuleta u wufwe, ho cimwitumamile u Mulungu u mumi.

¹⁵ Holeka Kilisito yo munoza i cilagane cipya i wawalya wono wacemwa no Mulungu ho wawubocele wihuwizo wono wehuwizwa wo wuhazi we cibitilila. Wo wutuga, vyono i lifwa nha lyaza lyono likuwakomboza wanhu mu wulawa mu masutya gagalya gono wasutya mwidaha li lilya lye cilagane cilongozi.

¹⁶ Hambi nha vyo yinha, i zinghani ze ndumilizo zono kalajilizaga munhu, nha zikuwa kuvumilwa du lono u wufwe wo munhu yuyo mono yawulavivye u wulajilize wuwo wakondya kukangazwa.

¹⁷ U wulajilize si wosuma kufisilizwa sunga langa i lifwa liwe lyakondya kwijela, vyono u wulajilize wusina nhunizo hono mono yawulavizye yakali mumi.

¹⁸ Si holeka sunga ne cilagane cicilya i cilongozi si casuma kuwikwa hono hasina sakami.

¹⁹ U lulongozi Musa yawanziza wanhu wose ze malajilizo gose nha vyono yali mu Wulajilize, hanyuma yakasola i sakami ye ndama hamonga ne malenga, yaketumamila mahamha go mubici wono wukucemwa hisopo, hamonga no wuhamba wudunghu, yakacimiziza i citabu cicilya co wulajilize hamonga ne wanhu wose.

²⁰ Musa yakatya, “Ayi yo sakami yono yikukangaza i cilagane cono yamulajilizenyi u Mulungu, holeka mucihulikaje.”

²¹ Musa yakalimiziza sakami lililya lihema nha vivilya hamonga ne viya vyo witumami.

²² Holeka nha vyono winha u wulajilize, i vinhu vyose vyosuma kwezwa ne sakami, holeka no wubi nawo wukuwuswa du lono sakami yetika.

I cilavya ca Kilisito ciwusaga u wubi we wanhu

²³ Ale i vinhu vivi vyono yo hwani du ya vye mbeka vya ku wulanga, vikawa vinojeye navyo vyezwe mu nzila yiyo. Ninga alu vya ku wulanga vikusaka ikumbiko liswanu lyono licizize.

²⁴ Hambi Kilisito nha si yenjila i hanhu Hono Helile hono hazenjigwe ne miwoko ye wanhu, hono henha hwani du ya acilya ce mbeka. Langa u Mwene yenjila ku wulanga du kweneco kono aluno yemile hali u Mulungu ku soko yetu.

²⁵ U Mukohani Muwaha we Wayahudi kenjilaga i Hanhu Hono Helile mwaka na mwaka akuno yadinghuye ne sakami ye zi mitugo; ninga Kilisito si yenjila mumo ko kwilavya mweneco kali kenji,

²⁶ hambi nha hono yali yiwe nha vivyo, nha yali yimunojele Kilisito yagazwe kali kenji ku wulawa mu mwamulizo wo wuwumbwe we yinze. Ninga alu vipango avi lono vikusejelela ku mudumo wayo, u mwene yejela kamonga du, ho yawuwuse u wubi mu wilavya mweneco kuwa ikumbiko.

²⁷ Ale nha vyono wanhu wose wafwizaga kamonga du, na lono wakondya kufwa wakwima ha mwande yo wulingʼanizwe wo Mulungu,

²⁸ nha vivyo nayo Kilisito yelavya i kumbiko lwa kamonga du ho yawuwuse u wubi wa wenji. Nayo yalaza kuza lwe kejete ho yalece kuziza so wihoma no wubi, langa so kuwakomboza wawo wono wakumulindila.