Wahebelaniya 13 - I CILAGANE CIPYA 1991

Nha vyono yinojeye kumwendeza u Mulungu

¹ Mujendelele mu wendo we cindugu.

² Mulece kusemwa kuwacemela wajenzi; hambi mu wituma nha vivyo, wanji nha wawacemela i wamalayika wula kumanya.

³ Mweze kuwakumbucila wawopwa nanye muwe nha kotya muwopanwe nawo. Kanyhi mweze kotya mukugazika nha weneco.

⁴ U wutole wuweze ne cogopo kuli wanhu wose, i walume ne wacekulu yiwanojeye weze wehuwilwa kuli munhu na muyagwe. Hambi u Mulungu nha kowalingʼaniza i wanhu we mikalile mibi ne wasenyha.

⁵ Mulece kuwa muli wasulumizi ku zipesa, langa mweze muceye ne vinhu vyono mwina navyo. Hambi u Mulungu mweneco nha yatya, “Si nokulecela lukulu, hamba si nokutaga.”

⁶ Holeka cikulonga cisina woga: “U Muwaha yo mutazi wangu, si nokogopa. Hambi u munhu konoza cici?”

⁷ Mweze kuwakumbucila i walongola wenyu wono wamulonjelenyi i nghani yo Mulungu. Mwihwesaje ze njenda yawo, muwegaje u wihuwilo wawo.

⁸ Yesu Kilisito yo yuyo du igolo ne zuwali, na ku cibitilila.

⁹ Mulece kutyatya ze mafundo ganji ganji ge cijenzi. I lihewa lyo Mulungu lyo likucisikamya i zinhumbula zetu, hamba si myoto ya mu wulye; hambi i malajilizo nha si gamutaza hamba hadodo u munhu wo wose mono yagatyatya.

¹⁰ Ase cina cikumbicilo cono awalya wono wakwituma mwihema lye Wayahudi, wasina wukombolwe wo kulya vinhu vyayo.

¹¹ U Mukohani Muwaha we Ciyahudi kaletaga i sakami yo mutugo, mitugo nha zikuwa kuticimizizwa kunze ye nghambi.

¹² Yo soko, nayo Yesu yagazizwa kunze ye likaya sunga yakafwa, ho yaweze wanhu so sakami yakwe mweneco.

¹³ Ale nase cimubitile kuko kunze ye nghambi, akuno cidinghuye u wumondwe wakwe.

¹⁴ Hambi akuno kono yinze nha cisina likaya lyono likalaga; langa cikulilondola lyono likuza.

¹⁵ Ale nhondo mu nzila ya Yesu, cimulavizyaje u Mulungu likumbiko lyo lukumyo nhondo zose, wo wutya, u lukumyo lono lukuletwa ne wanhu wono wakulivumila litagwa lyakwe.

¹⁶ Mulece kusemwa kwituma i ziswanu no kwitaza nyenye wose, hambi zizo nha lye kumbiko lyono likumwendeza u Mulungu.

¹⁷ Muwahulikaje i walongola wenyu no kwibata zono wakulonga; hambi nha wakuzidima i zinhumbula zenyu mu cilo na mu misi, kanyhi si woleka kulolosa zo witumami wawo hali Mulungu. Na hono muwahulice nawo ho wokwituma i milimo yawo kwa nyemo, ninga hono yilece kuwa nha vivyo wokwituma no wukalale, na si yowa na cambuzi kuli nyenye.

¹⁸ Mucilombelaje na sese. Cimanyiye lukulu vyono cina ciselinji ciswanu, hambi nha cendile kwituma yono yili lingʼani nhondo zose.

¹⁹ Nghumunenenyi muno muno munombelaje, ho Mulungu yangomole u kwenyu mbela mbela nha vyono yosumika.

Ilombo

²⁰ U Mulungu yamuzukula u Muwaha wetu Yesu Kilisito mono yo Mudimi wetu Muwaha we zingholo, ku soko wumwaje we sakami yakwe yono yakangaza i cilagane ce cibitilila.

²¹ U Mulungu wo mulamu yamukwilanicizenyi mu ziswanu zose, ho mwitume wuhile wakwe; nayo yetume muli sese zono zikumwendeza mweneco mu nzila ya Kilisito. Kuli mwene lweze lukumyo cibitilila ne cibitilila. Heya.

I zinghani ze ndumilizo

²² Holeka nghumunenenyi wandugu zangu, muyihulicizaje mutulile i nghani yiyi yo wulanjizwe. Hambi ayi nha baluwa fupi du yono nimwandicilenyi.

²³ Nyendile kumumanyizenyi nha vyono u ndugu yetu Timoteyo yakondya kudigulilwa kulawa mu jela. Na hono yeyandile kuza akuno, ale nolokuzana nayo kolo nghuza u kwenyu.

²⁴ Ale muwalamusaje i walongola wenyu wose hamonga ne wanhu wo Mulungu! I wandugu zetu wanya akuno ku Italiya, wakumulamusenyi.

²⁵ Lihewa lyo Mulungu liwezane nanye wose.