Wahebelaniya 12 - I CILAGANE CIPYA 1991

U Muwaha yakucijiza ceze no wunhu wuswanu

¹ Ase cina ipuga iwaha lye wahomelezi wono wali hawande yetu. Holeka ku soko yiyo ciyilegaje muli vimizi vyose vyono vikucimila, hamonga no wubi wono wucinamatiye muno muno. Kanyhi cimanyhe ko wukangalizi mu witije wono wuli hamwande yetu.

² Akuno cikumulanga Yesu u mwamulizo u wihuwilo wetu, no kuwukwiza. Mono ku soko i nyemo yono yali yawiciywe u mwene yakangalila u wufwe wa mu musalaba, hamba kulanga ze cevu cakwe, alu yekaye ku lubavu lo kulume lwe ligoda lyo lukumyo lyo Mulungu.

³ Ale, mwihwesaje ta, kuli zono zamwagana Yesu, nha vyono yakangalila u wiwanganile wuwaha nha wuwu kuli wanhu wanyo wubi. Holeka mulece kutukuwika mitima yenyu hamba kukatala.

⁴ Hambi nha mukali si nehoma mukwisumaniza no wubi, sunga muficile ku wita sakami yenyu.

⁵ Wulenyi, alu mwazisemwa i zinghani zono u Mulungu yakulonga nanye nha wanagwe? “Mwanangu, wulece kubedegala i mafundo go Muwaha, Hamba wulece kutukuwika u mutima wako kolo yakukukalipila.

⁶ Hambi u Muwaha nha kamufundaga wo wose mono yamwendile Kanyhi kawatowaga iwana wose wono yakuwabocela.”

⁷ Holeka muwukangalililaje u wutowe, hambi nha wo wufundwe; u Mulungu yakumutendelenyi anye nha wanagwe. Hambi yo mwanaci mono si kafundagwa no sogwe?

⁸ Ninga hono mulece kufundwa nhe wana wanji, ale kumbe si muli wanagwe, langa muli wana watumulwa.

⁹ Ninga hamba nha vivyo, ase ciwogopile walezi wetu wono wacilela hamba na hono wakucifunda. Holeka yicinojeye cimuhulice muno muno u Sogo yetu we cimuhe ho ciwumipe.

¹⁰ I walezi wetu wa baha hono yinze wacifunda kwa cipango du nha vyono wawonaga viswanu weneco, ninga u Mulungu yakucifunda ku so cambuzi cetu sese co weneco, ho cihanje u wele wakwe.

¹¹ No wufundwe wo wose si cinhu ca nyemo, langa co cinhu ca kukalaza. Ninga awalya wono wafundwa no kuwa no wunhu wuswanu, i ndumilizo nha wodudula wuhumbilizwe wo mulamu wono wukulawa mu mikalile yo wilingʼano!

I mejizo no wusugule

¹² Holeka muyinulaje i miwoko yenyu yono yidejepe, no kugasikamya mafugamilo genyu gono gatimbile.

¹³ Mujendelele kujendela mu nzila yono yigoloce, u mugulu wono wulemaye ho wulece kutamiswa, langa wuponywe.

¹⁴ Muweze no wuhile wo kuwa na mulamu ne wanhu wose. Mwikalaje mu mikalile yono yelile, ku soko vyono hasina u munhu mono kosuma kumuwona u Muwaha hono yawe yayisina mikalile yono yinha yiyo.

¹⁵ Muhidimbale muno muno, ho yunji yalece kuyajiliza i lihewa lyo Mulungu. Mwilanjililaje, ho lisina lyo wusungu lilece kutula muli nyenye no kuwawulaga wanhu wenji ko wusungu walyo.

¹⁶ Muhidimbale ho halece kuwa muli nyenye na munhu yunji musenyha hamba munhu mono si yakumogopo Mulungu nha vyono Esawu, mono yawuguza u wilingʼano wakwe wo kuwa u mulelwa u mulongozi ku soko yo wulye wa kamonga.

¹⁷ Nanye mumanyile nha vyono sunga na lono yasakaga kuwutuga kanyhi wuwulya u wulugutwe wono wali wakwe, yakalemwa, hambi nha si yacituga kanyhi cilejeho co kunena, hamba yiwe yacilondola muno akuno ne mahozi.

¹⁸ Hambi nha simuficile kwitunda lya Sinayi, lyono lyosuma kwibatika nha vyono wanoza wanhu wa Isilayeli, kanyhi mukali nafika kono kowuli moto wono wakaga, ha wutitu, ne citi, na ha mukukunzo,

¹⁹ no mulizo we ndulele ne lizi lye zinghani. Wawo wono walihulika lizi lilyo, wakanena walece kuyihulika kanyhi nghani yinji,

²⁰ hambi nha si wasuma kulikangalilila lilajilizo lyono walajilizwa. “Mono kolipamiza litunda lili hamba wuwe mutugo, kopondangwa ne mabwe sunga yafwe.”

²¹ Na zizi zose zikejela nha nghani za kogofya muno, sunga na Musa yakatya, “Ane nghogopa muno no kucicima.”

²² Ninga anye muficile mwitunda lya Suyuni, ku kaya yo Mulungu mumi. Muficile Yelusalemi, ilikaya lya ku wulanga, kono wekonghoye wa malayika maelufu menji si wakuwala.

²³ Mwaficila ku wutangʼano wuwaha we walelwa iwalongozi wo Mulungu, wono matagwa gawo gandicigwe ku wulanga. Mwimile hali Mulungu yo mulingʼanizi wa wose, na hamwande ye myuhe ye wanhu we lingʼani wono wanozwa wakwilaniciye.

²⁴ Muficile kuli Yesu u munoza i Cilagane Cipya mono i sakami yakwe yamwajika yikulonga ziswanu muno si nha ya Habeli.

²⁵ Holeka mulanjilile, mulece kulema kumuhuliciza mono yakulongana nanye. Nha vyono awalya wono walema kumuhuliciza ayulya mono yawasugula hono yinze si wapona yaye. Alu ase cosuma kupona wule hono cileme kumuhuliciza ayulya mono yakucisugula mono yalawa ku wulanga?

²⁶ Mwipango lilyo lizi lyoyisinjisa yinze, ninga alu yehuwiza yakutya, “Noyisinjisa yinze, kanyhi hamba si yinze du langa sunga no wulanga nha vivyo.”

²⁷ I nghani yiyi kanyhi yikucilajila vyono i vinhu vyose vyono vyawumbwa vyosinjiswa no kuwuswa, ho visigale avilya vyono si vikusinjiswa.

²⁸ Holeka ase yicinojeye cilumbe muno, vyono cikuwubocela u wutemi wono si wukusinjisika. Ciweze ne lilumbo no kumuhemba u Mulungu mu nzila yono yikumwendeza, hamonga no winenenyhezi ne cogopo;

²⁹ hambi u Mulungu wetu mbeka nha moto mukali wono wukutakamiza.