Wagalatiya 3 - I CILAGANE CIPYA 1991

U wihuwilo hamba u Wulajilize

¹ Anye mo Wagalatiya, mbeka mweza muli walele! alo mono yamukulujenyi nani? Hambi inghani yo wutumbikwe wa Yesu Kilisito, nha mwanzalicilwa ha meso genyu.

² Alu nghusaka kumanya nghani monga du kuliʼnye. Alu mwamubocela u Muhe wo Mulungu ho musume kwituma i metumo go Wulajilize, hamba ku soko ho muluhulice no kulwihuwila u Luganuzi Luswanu?

³ Alo nha wule muli walele nha vivi? Mwamuliziza zose mu wutazi wo Muhe wo Mulungu, alu mukuhila kumaliliziza mu vilungo vyenyu mo weneco?

⁴ Alo wo wutya, i zinghani zose zilya zono zamutujenyi zawa za bwete? Si yosumika yaye!

⁵ Ma, u Mulungu, yakawa kumupelenyi u Muhe kanyhi no kwituma mapoto muli nyenye, vyono mukuzifisiliza za mu Wulajilize hongo, hamba vyono mukuluhulika u Luganuzi Luswanu no kulwihuwila?

⁶ Ta, cilanje za Abulahamu; u mwene yamwihuwila u Mulungu, nayo u Mulungu yakamuvumila no kumuwona yali lingʼani.

⁷ Holeka mumanye vyono i wanhu wono wakumwihuwila, wawo wo wana wa Abulahamu.

⁸ I Mandiko Gono Gelile gakulajila vyono u Mulungu kowanoza i wanhu we makungugo ganji ho wavumilwe hali mwene mu nzila yo wihuwilo. Holeka i Mandiko Gono Gelile galongola kumulonjela Abulahamu u Luganuzi Luswanu gakutya, “I zinghungugo zose zolomotesezwa muli gwegwe.”

⁹ Holeka wawo wono wena u wihuwilo, wolugulizwa nha vyono Abulahamu yalugutizwa vyono yali yehuwiye.

¹⁰ Holeka wose wono wetumbiye kufisiliza za mu Wulajilize du, wali mu wulijitwe, hambi i Mandiko Gono Gelile nha gakutya, “Muli wose mono si yakwibata no kufisiliza zose zono zandikwe mu citabu co Wulajilize, mulijitwe.”

¹¹ Nha yanzalikwe, vyono u Wulajilize si wosuma kumunoza munhu ho yavumilwe hali Mulungu, hambi i Mandiko nha gakutya, “Mono yakuvumilwa hali Mulungu ku so wihuwilo, yuyo kowumipa.”

¹² Hambi u Wulajilize no wihuwilo, siyo cinhu cimonga yaye, langa i Mandiko gakutya, “Mono kozifisiliza zose zono zikusakwa mu Wulajilize, yuyo kowumipa.”

¹³ Kilisito yacikomboza mu wulijitwe wo Wulajilize, hambi nha yawusola u wulijitwe wuwo ku soko yetu, vyono i Mandiko gakulonga, “Muli wose mono kotumbikwa mu musalaba, yuyo mulijitwe.”

¹⁴ Nghani yiyi yanozwa ho wulugutwe awulya wono yapegwa Abulahamu, wusume kuwaziza i wanhu we makungugo ganji mu nzila ya Yesu Kilisito, na mu nzila yo wihuwilo, cisume kuwubocela u Muhe yulya mono u Mulungu yacihuwiziza.

U Wulajilize ne cilagane

¹⁵ Wandugu zangu, nomulonjelenyi i cihwanicizo ca mu mikalile yetu ye nhondo zose. Mwihwesaje ta muli ze cilagane ca Wanhu wejete. I cilagane cila kuwa cawikwa cakondya, hamonga no kutajilwa sayini, hasina munhu mono kacidelengulaga, hamba kuconjeleza cinji.

¹⁶ Ale Abulahamu nayo yapegwa cilagane mweneco hamonga no lulelo lwakwe. Ne Mandiko si gakutya “Ne zindelo zakwe.” Nha kotya wenji, langa gakutya “No lulelo lwakwe” nha kotya yumonga du nayo yo Kilisito.

¹⁷ Na cono nghusaka kucilonga nha coci, u Mulungu yanoza i cilagane cakwe kanyhi yakacikangaza, holeka u Wulajilize wono waza lono yali yakondya kupuluta myaka magana mane na makumi madatu, si wosuma kucidelengula i cilagane hamba kucinoza ciwe nha nghani ya bwete.

¹⁸ Hambi i cipegwa co Mulungu hono ciwe cikwitumbila u Wulajilize, i cipegwa cico si cosuma kwitumbila kanyhi i cilagane co Mulungu. Ninga u Mulungu yamupela Abulahamu ku soko ye cilagane.

¹⁹ Alu u Wulajilize waci? Wonjelezwa ho wuwulajile u wuhodanji co cici, sunga kolo yakuza ayulya wo lulelo lwa Abulahamu mono yalaganizwa. U Wulajilize waletwa na malayika ko muwoko wo mulamuzi.

²⁰ Yene yili mbeka vyono u mulamuzi si kasakagwa hono nghani yiwe kuli munhu monga, langa u Mulungu yo yumonga.

I soko yo wuwikwe wo Wulajilize

²¹ Alo u Wulajilize vikusutana ne vilagane vyo Mulungu? Ngʼo si nha vivyo yaye! Hambi hono wali wulavywe Wulajilize wono wosuma kuwapela wanhu wumi, baho cali cisume kuvumilwa hali Mulungu mu nzila yo Wulajilize.

²² Ninga si nhavivyo i Mandiko Gono Gelile gakondya kulonga nha vyono i yinze yose yili mu vilungo vyo wubi, wono wehuwiye ho wapegwe i cilagane so wihuwilo muli Yesu Kilisito.

²³ Na lono cali cikali si napegwa wuwo u wihuwilo, u Wulajilize wali wuciwopile, sunga wugubulwe u wihuwilo wuwo wono wazaga.

²⁴ Holeka u Wulajilize wuwo wali nha mwijizi wetu sunga Kilisito yakaza, ho cisume kuvumilwa hali Mulungu mu nzila yo wihuwilo.

²⁵ Ninga alu vyono u wihuwilo waza, hodu u Wulajilize wawa si mwijizi wetu kanyhi.

²⁶ Na mu nzila yo wihuwilo, anye wose mwawa wana wo Mulungu muli Kilisito.

²⁷ Nanye wose mono mwabaputizwa, mukelunza na Kilisito, alu mwamuvwala Kilisito.

²⁸ Holeka hasina kanyhi wisimajile wa muli Muyahudi no Mugilila, hamba muwanda no munhu mulelele, mucekulu hamba mulume. Hambi anye wose nha mwaweza cinhu cimonga muli Kilisito Yesu.

²⁹ Holeka anye hono muwe muli wakwe Kilisito, ale muli mbeyu ya Abulahamu, kanyhi mozibocela zizo ze cilagane co Mulungu.