Wagalatiya 2 - I CILAGANE CIPYA 1991

Pawulo ne watumwa wanji

¹ Hanyuma yaza kupuluta myaka ikumi na mine, nghawuyajila kanyhi kubita ku Yelusalemi cina hamonga na Balanaba, nghamusola na Tito cikabitana nayo.

² No wubite wangu walawilila mu wugubule wono yangubulila Mulungu. Na muwihangulize we cinyele, nghasuma kuwaloloseza wawo iwalongola ze nghani yo Luganuzi Luswanu lono naluganula kuli wanhu we makungugo. Nanoza nha vivyo ho mulimo wangu wono nali nakondya kuwituma, sunga na wono nali nghali kuwituma, wulece kuwa nha nghani ya bwete.

³ Ninga sunga no muyangu Tito mono cali cina nayo mono yali Mugiliki, si yadindimizwa kwalama,

⁴ hamba yiwe hali howali wandugu wo wulambi wono wali wahijiliye Tito yalame. I wanhu wawa weyinjiza ko wusugu, wakawa kuwulondola u welecele wetu wono cina nawo muli Kilisito Yesu, ho wacinjize mu wuwanda.

⁵ Nase si celumbaniza nawo hamba hadodo, i mbeka yo Luganuzi Luswanu ho yikale muli nyenye nhondo zose.

⁶ Ninga i wanhu wawa wono wakutegwa wo walongola, hono mbeka vyo wali wenha, hamba yiwe si nha vivyo, kwangu si nghani yaye, hambi u Mulungu nha siyakuwa kulingʼaniza so wulanga za kunze, ne wanhu wawa wali wasina cinji cono wali wadahile konjeleza mu Luganuzi lulu Luswanu nha vyono ane nghuluganula no mweneco.

⁷ Hamba nha vivyo, wali wamanyile vyono u Mulungu yo yanhuma kuluganula u Luganuzi Luswanu kuli wanhu we makungugo ganji, nha vyono Petelo yali yatumigwe kuwaganulila i Wayahudi.

⁸ Ku soko vyono yuyo mono yamupela Petelo i vilungo vyo kuwela mutumwa kuli Wayahudi, yo yuyo kanyhi mono yamhela nane i vilungo vyo kuwela mutumwa kuli wanhu we makungugo ganji.

⁹ Holeka wa Yakobo na Kefa hamonga na Yohana, wono wakwijela nha wo walongola wawaha, wali wamanyile vyono u Mulungu yo yamhela lihewa lilyo, holeka wakawa kucilamusa ane na Balanaba kwe miwoko yawo, wakulajila i citanjilo co wuhangane hamonga. Na yikawa yicinojeye ase ciketume u mulimo kuli wanhu we makungugo ganji, wene nawo kuli Wayahudi.

¹⁰ Ninga hamba nha vivyo, wacilomba ase cinhu cimonga, nha cinji ciwakumbucile wanhu waciwa, na yo nghani yono nghuhidimbala muno kuyituma.

Pawulo yakumukalipila Petelo

¹¹ Ninga Kefa yaza kuza ku Antiyokiya, namwimila cagalanze hamwande ya wose, kusoko yali yasutizye.

¹² Ku soko vyono ha mwamulizo i wanhu wanji wono watumwa na Yakobo lono wali Wakali si nafika baho, Petelo vyalizanaga hamonga ne wanhu we makungugo ganji. Ninga waza kufika wanhu wawo, hodu Petelo yakawa kulecela lukulu kulizana ne wanhu we makungugo ganji, ku soko vyono yawogopa i wanhu wawo wono wahilaga i wanhu we makungugo ganji walame.

¹³ Sunga ne wandugu wanji we Ciyahudi wakevumila hamonga na Petelo mwitumo lilyo lyo wukoci, sunga na Balanaba yakenjizwa nayo mu wukoci wawo.

¹⁴ Holeka nane naza kuwuwona u wuwe wawo wa mu mbeka yo Luganuzi Luswanu vyono si wuli mu nzila yono yili mu mbeka, hobaho nghawa kumulonjela Kefa hali wose, nghamutya, “Hamba wuwe agwe wuli Muyahudi, ninga wukwikala mu mikalile nha vyono wekaye wanhu we makungugo ganji, hamba si wikaye kotya Muyahudi! alu kosuma nhawule kujela kuwadindimiza i wanhu we makungugo ganji wekale mu mikalile ye Wayahudi?”

I Wayahudi ne wanhu we makungugo ganji wose wakuponela mu nzila yo wihuwilo

¹⁵ Heya mbeka, ase kulawa katali cili Wayahudi, hamba si cili wanhu we makungugo ganji, wawo i wahodanji!

¹⁶ Ninga cimanyiye lukulu vyono u munhu si kosuma kuvumilwa hali Mulungu ku soko yo kuwibata u Wulajilize, langa so kumwihuwila Yesu Kilisito du. Na sese cimwihuwiye Yesu Kilisito nha vivyo ho cisume kuvumilwa hali Mulungu mu nzila yo wihuwilo wetu kuli Kilisito, hamba si so wibate wo Wulajilize.

¹⁷ Alu hono yiwe mu wulondola wuvumilwe hali Mulungu muli Kilisito, cikwijela cili wabi nha vyono wenha i wanhu we makungugo ganji, wule! nghani yiyo yowa yina nhunizo yo wutya Kilisito yakutaza muwituma wubi? Aa, ngʼo!

¹⁸ Langa hono niwe nghuzenga kanyhi cicilya cono nakondya kucikumula, baho langa nghwilajila vyono nili muhodanji.

¹⁹ Ku soko ane nakondya kufwa mu Wulajilize wuwo, u Wulajilize weneco wo wambulaga, ho niwe nili mumi muli Mulungu. Ane nawulagwa hamonga na Kilisito mu musalaba,

²⁰ ninga nghuwumipa, ninga yo si nene kanyhi, langa Kilisito yo yakuwumipa muli nene. No wumi wuwu wono nina nawo lulu, nghuwumipila u wihuwilo, u wihuwilo wa muli Mwana wo Mulungu mono yanyenda sunga yakelavya wumi wakwe ku soko yangu.

²¹ Si nghwenda kulema lihewa lyo Mulungu. Hono yiwe munhu kanozagwa lingʼani hali Mulungu mu nzila yo Wulajilize, kumbe Kilisito yafwa bwete.