Metumo ge Watumwa 4 - I CILAGANE CIPYA 1991

Petelo na Yohana wakutegulwa kuli mahakama

¹ Petelo na Yohana lono wali wakali wakuwaganulila wanhu, Wakohani no muwaha we walindiliza Nyumba yo Mulungu hamonga ne Wasadukayo, wakawaziza;

² wakugazika muno mu zinhumbula, vyono wawo watumwa, wawaganulilaga wanhu vyono Yesu yazuka, inghani yono yikulajila cagalanze vyono iwafu wolozuka.

³ Wakawebata, na vyono cilo cali casejelela, wakawatajila mu jela, sunga imitondo yaco.

⁴ Ninga wenji wono wayihulika i nghani, wehuwila, na ku wuwale, wali waficile nha wanhu elufu yihano.

⁵ Kukawa waza kwela, iwawaha wawo ne Wanyamhala ne wejizi wo Wulajilize, wakekongholela ku Yelusalemi,

⁶ na Anasi u Mukohani Muwaha yali yali baho, na Kayafa, na Yohana, na Alekizanda, na wose wono wali we mhuga yo Mukohani Muwaha.

⁷ Waza kuwawika iwatumwa hamwande yawo, wakawawuza wakutya, “Alu nye, mukwitumila zizi mu vilungo vya hayi, na mwitagwa lya nani?”

⁸ Hobaho Petelo, yamemilo Muhe Mono Yelile, yakawatya, “Nye mo walongola we wanhu, na mo wanyamhala!

⁹ Hono yiwe mukuciwuza izuwali, zo witume wuswanu wono yatendeywe ayulya munhu mono yali yali citewe, na vyono yatujile yuyu wupone.

¹⁰ Ale, yimanyice kwenyu wose, na kuli wanhu wose wa Isilayeli, vyono, mwitagwa lya Yesu Kilisito wa Nazaleti, mono mwamutumbika nyenye, mono Mulungu yamuzukula muli wafu, mwitagwa lilyo, yuyu holeka yemile baha hali nyenye mutelevu.

¹¹ Yo mwene mono Mandiko Gono Gelile gakutya, Ilibwe lyono mwalilema anye nyo waze nji Lyanozwa kuwa yibwe yiwaha lyo musinji.

¹² “Hamba hasina mhonelo muli yunji wo wose, hamba itagwa linji nha hasina hono hasi yo wulanga, lyono wapegwa wanhu, lyono linojeye ciliponele.”

¹³ Wawo wanyamhala wo mukungʼano, wali wawamanyile wa Petelo na Yohana vyono wali wanhu du wono si wasomile, ninga wakawezina kuwawona wakulonga kwe vilungo wasina hamba woga. Wakawezuka, vyono wawezanaga na Yesu.

¹⁴ Nawo waza kumuwona munhu mono yaponywa vimane nawo, wakawa wasina ya kulonga.

¹⁵ Holeka wakawatya walawile kunze yo mukungʼano, wene ho watuje cilejeho co kwiheha.

¹⁶ Wakawa kwiwuza, “Alo ciwatende wule wanhu wawa? Hambi i nghani ye lipoto lili nha yimanyice kuli wanhu wose wa mono Yelusalemi, nha vyono linozwa na wene, hamba ase sicosuma kulikana.

¹⁷ Ninga hono cisace nghani yiyi yilece kutandala muli wanhu, ale ciwogofyaje, ho walece kujendelela kulonga kanyhi na munhu wo wose mwitagwa lya Yesu.”

¹⁸ Holeka wakawacema wenjile, wakawalonjela vyono walecele lukulu kuganula calinze, hamba kwijiza mwitagwa lya Yesu.

¹⁹ Ninga Petelo na Yohana wapitula wakawatya, “Ale mulonje, hono yo lingʼani hali Mulungu cimuhulicenyi nyenye si nho kumuhulika Mwene.

²⁰ Hambi nha si cosuma kuleka kuzilonga zono cawona no kuhulika.”

²¹ Nawo wawo iwanyamhala wo Mukungʼano waza cila kuwogofya, hanyuma wakawaleka. Hambi nha si wayiwona yo kuwatamisiza, hambi wanhu wose nha wamukumyago Mulungu, so nghani yiyo yono yanozeka.

²² Nayo u munhu yuyo mono yaponywa nha yali yaficile myaka makumi mane no musapu.

Wono wali wehuwiye wakumulomba u Mulungu yawasikamye

²³ Nawo wa Petelo na Yohana waza kukombolwa, wakabita kuli wayawo, wakawaganulila zose zono walonjelwa ne wakohani wawaha ne wanyamhala.

²⁴ Na wawo, waza hulika, wakenulila hamonga i mazi gawo kuli Mulungu, wakatya, “Gwe Muwaha, mono wanoza wulanga ne yinze ne lilenga, na vyose vyono vili mugati!

²⁵ Mono wamunoza sogo yetu Dawudi, mwitumami wako, yalonje kwe vilungo vyo Muhe Mono Yelile, yakutya: ‘So cici wanya makungugo wakalipe? Ne wanhu wehwesa gono gali musina?

²⁶ Iwatemi we yinze wakewikaniza, Ne wawaha wakekonghola hamonga, Ho wamuleme Muwaha na Kilisito wakwe.’

²⁷ “Kwaco mbeka, Helode na Pontiyo Pilato, wena ne Makungugo ne zimhuga za Isilayeli, nha wekongholela baha mu kaya yiyi ku soko yo mwitumami wako mono yelile, Yesu mono wamunoza yawe Kilisito.

²⁸ Heya, wetangʼanila ho wanoze zizilya, zono wetemezezya no kuziwikaniza kwe vilungo vyako, na ko wendo wako, kuwulawa mwamulizo.

²⁹ Alu Muwaha ulanje wogofye wawo. Ucipelaje vilungo co wetumami wako ho ciyiganule nghani yako cisina woga.

³⁰ Ugolole muwoko wako no kuwaponya wanhu. Mapoto ne mezino, ganozezwe mwitagwa lyo Mwitumami wako mono yelile, Yesu.”

³¹ Nawo waza kukondya kulomba, i hanhu baho hono wali wehangulizize, hakasinjisika, nawo wose wakamemywa u Muhe Mono Yelile. Nawo wose wakawa kwanza kuyiganula nghani yo Mulungu wasina woga.

Wakekala nha wanya ndugu monga

³² Ne mhuga yawo wose wono wehuwila, wali na nhumbula monga no mutima monga. Hasina hamba yunji mono yali yena cinji co cose, mono yatya, yo sawo yakwe mweneco, langa wali wahanjlie vyose.

³³ Na mu vilungo vinji, watumwa wakahomelela zo wuzuce wo Muwaha Yesu, nayo u Mulungu yakawapela kwa winji lihewa lyakwe.

³⁴ Hambi nha kwali kusina muyawo mono yali yanjiye cinji, hambi wose wono wali wena migunda, lunji nyumba, waviguzaga,

³⁵ no kuziwika zipesa zayo mu miwoko ye watumwa, wakagawilwa wose, vilingʼaniye munhu ne visakwa vyakwe.

³⁶ Hakawa na mulawi yumonga mulelelwa ku Kupulo, itagwa lyakwe Yusufu, mono watumwa wamucemaga Balanaba, (nhunizo yayo, “Mwana wo wutuzwe.”)

³⁷ Nayo yali yena mugunda wakwe, yakawuguza, yakazileta zipesa, no kuziwika mu miwoko ye watumwa.