Metumo ge Watumwa 2 - I CILAGANE CIPYA 1991

U Muhe Mono Yelile yakuwatimila wono wehuwiye

¹ Lizuwa lye Pentekote lyaza fika, wose wono wali wehuwiye, wali wekongholeye wose hamonga.

² Hobaho kukaza nhinicizo cihumbi cikulawa ku Wulanga nha ca mbeho mbaha yikukukunza, cikamema mu nyumba yose mono wali wekaye.

³ Hobaho zikawalawila zinimi zikegawa nha malambi go moto ako na ako, zikawatimila yumonga yumonga.

⁴ Wose wakamemywa Muhe Mono Yelile, wakanza kulonga milonjele hayo hayo, nha vyono Muhe yawapela vilungo mu wulonje.

⁵ Ale ku Yelusalemi ko wali wekaye Wayahudi, wanhu wogopa Mulungu, wa mu zinghungugo zose ze wanhu wa kononze.

⁶ Cihumbi cico caza kuhulikwa, ne lipuga liwaha lye wanhu wakekonghola, likawa kwizina muno, vyono wanhu wose wawahulika wawo wakulonga mu milonjele yawo.

⁷ Wakatinuka wose, wakezina, wakutya, “Ati, wawa wose wono wakulonga si Wagalilaya?

⁸ Alu yiwa wule, ase cikuwahulika wose wakulonga, munhu ne milonjele ya cinyo kwetu kono calelelwa?

⁹ Muliʼse, wanji Wapaliti na Wamedi na Welamiti, na wanji wanya ku Mesopotamiya, ku Wuyahudi, na Kapadokiya, Ponto, na Asiya,

¹⁰ ku Felugiya na Pamufuliya, ku Misili na ku mbavu za Libiya behi na Kilene; wanji muli ʼse wajenzi wakulawa ku Lumi,

¹¹ Wayahudi, ne wanhu wono wapituciye mu dini ye Ciyahudi, wanji walawa ku Kilete na ku Alabiya. Ase wose cikuwahulika wawa, wakulonga mu nonga zetu co weneco, ze metumo mawaha go Mulungu.”

¹² Wose wakezina no kugazika akuno wakwiwuza, “Alu nye, cici co cici?”

¹³ Ninga wanji wakazwajiza wakatya, “Nye, wanhu awa wagalile divayi mhya.”

U wuganule wa Petelo

¹⁴ Ninga Petelo, yakema hamonga ne wayagwe we likumi na monga, yakenula lizi lyakwe muno muno, yakawa kwanza kuwaganulila wanhu yakutya, “Nye wandugu zangu Wayahudi, nanye wose mono mwikaye mu Yelusalemi, muhulicize zono nghulonga.”

¹⁵ “Wanhu awa nha si wagalile vyono mukuganiciza nyenye, hambi alu nha yikali saa tatu du ya hakali mitondo?

¹⁶ I mbeka, wo wutya nghani ayi, yo nghani ayilya yono yalongwa no muwizi Yoweli yono yatya,

¹⁷ ‘Ku vilo vye ndumilizo vyo yolowa, yakutya Mulungu, Nolowetila iwanhu wose Muhe wangu. Ne wana wenyu, we cilume na we cicekulu woloziganula izinghani zangu, Ne wazelelo wenyu, wolowona wupumulilwe, Ne wakombi wenyu, wololota zindoto.

¹⁸ Heya, sunga ne wetumami wangu we cilume na we cicekulu, Nolowetila zo Muhe wangu mu vilo vivyo, Nawo woloyiganula inghani yangu.

¹⁹ Kanyhi nololajila imezino ku wulanga kucanyha, Ne vitanjilo kononze hono hasi, kolowa na sakami, no moto ne nghungulyosi yizito.

²⁰ Lizuwa lyolopituswa liwe citi, No mwezi wolopituswa wuwe sakami, Lono lyowa likali si naza ilizuwa Iyo Muwaha, Lizuwa liwaha litambule,

²¹ Baho, muli wose mono kololomba mwitagwa lyo Muwaha yo kolopona.’

²² “Nye mo wa Isilayeli, muhulicize zinghani zizi! Yesu wa Nazaleti, munhu mono yahomelelwa no Mulungu kwenyu, mu metumo mawaha ne mezino, ne vitanjilo, vyono Mulungu yavinozeza muli mwene hali nyenye, vyono mumanyile mo weneco,

²³ na mu wutemezwe no wumanye we katali wo Mulungu, yali yakondya kudumula nghani, vyono Yesu kowikwa mu miwoko yenyu, nanye mukamuwulaga mu nzila yo kuwalecela iwanhu wabi, wamutumbice mu musalaba

²⁴ Ninga u Mulungu yamuzukula, yakamuponya mu wusungu we lifwa, ku soko si yali yisumice hamba hadodo lifwa limwibate.

²⁵ Hambi Dawudi nha yakulonga zo mwene nhavi, ‘Namuwonaga Muwaha ha mwande yangu nhondo zose, Hambi nha yali hamonga nane ku lubavu lwangu lo kulume, holeka sinosinjisika.

²⁶ Ku soko yiyo nhumbula yangu yikasecelela, nane nghatowa lucenze lo wusangalale. No muwili wangu wokwikala mu witumbilo,

²⁷ Hambi nha si koyileka inhumbula yangu mu wuninyina, Hamba si komukombola Mono Yelile wako yawolele mu citenjelo.

²⁸ Wangubulila zinzila zo wumi, Wuwe wako, wo kuwa wuli baho, wukumhela nyemo!’

²⁹ “Nye wandugu zangu, nyendile kumulonjelenyi cagalanze, zo setu muwaha Dawudi. U mwene yafwa, yakazikwa, ne citenjelo cakwe cili baha hono hetu sunga ne nzuwayi.

³⁰ Ninga Dawudi vyono yali muwizi, yali yamanyile vyono u Mulungu yamwilahila ko wilahe, vyono mu lulelo lwakwe, kolomwikaza yunji mwigoda lyakwe;

³¹ mwene Dawudi vyono yamula kumanya zizo, holeka yawulonga wuzuce wakwe Kilisito, lono yatya, ‘Inhumbula yakwe si yalekwa mu wuninyina, hamba u muwili wakwe si wawolela mu citenjelo.’

³² Yuyo Yesu, Mulungu yamuzukula, nase wose cili wahomelezi we nghani yiyo.

³³ Yesu yananuswa kucanyha, sunga ku lubavu lo kulume lo Mulungu, yakabocela kuli Sogwe cicilya cipegwa cono yehuwiza, co Muhe Mono Yelile; holeka azi zono mukuwona alu no kuhulika, wo witice wa yuyo Muhe.

³⁴ Hambi Dawudi mweneco, nha si yananuka sunga ku wulanga, ninga umwene yakutya: ‘U Muwaha yamutya Muwaha wangu, Wikale kulubavu lwangu lwo kulume,

³⁵ Sunga niwawice walugu wako wawe nha cibawo co wukanyago we magulu gako.’

³⁶ “Ne mhuga yose ya Isilayeli yiwanojeye wamanye manyi manyi, nha vyono, u Mulungu yamunoza yuyo, kuwa yo Muwaha kanyhi yo Kilisito, yuyo Yesu mono mwamutumbika nyenye.”

³⁷ Iwanhu waza hulika zizi, wakahomeka mu nhumbula zawo, wakamutya Petelo ne watumwa wayagwe, wakatya, “Alo citende wule wandugu zetu.”

³⁸ Petelo yakawatya, “Nenenyi no kubaputizwa wose, mwitagwa lya Yesu Kilisito, ho mutuje wunenelwe wo wubi wenyu; no kubocela acilya icipegwa co Muhe Mono Yelile.

³⁹ Hambi wihuwizo wuwo nha wehuwizwa ku soko yenyu, na ku soko ye wana wenyu, na ku soko ya wose wono wali kutali, na ku soko ya wo wose walya wono Muwaha Mulungu kowacemela kwakwe.”

⁴⁰ Petelo yakawahomelela kwa nghani zinji nyinji; yakawakangaziza no kuwakongʼonheza iwanhu yakutya, “Mwiponye mu lulelo lulu ulubi.”

⁴¹ Wenji mwizuwa lilyo, wakayibocela nghani yakwe, no kubaputizwa. Wakonjelezeka wanhu nha elufu yidatu wono wehuwila.

⁴² Na wawa wose wakajendelela kwiyijiza kulawa kuli watumwa imikalile ye cindugu, mu wubegule wo mukate ne malombo.

Imikalile ye nhondo zose ya walya wono wehuwiye

⁴³ Mapoto menji ne vitanjilo vinji vikanozwa ne watumwa, sunga wanhu wose wakenjilwa no woga.

⁴⁴ Na wose wono wali wehuwila wakajendelela kuwa cinhu cimonga, wakawa wahanjiye vyose;

⁴⁵ wakaguza sawo zawo, ne vitumbilwa vyawo, wakawa kugawana zipesa wose, munhu nha vyono yasakaga.

⁴⁶ Nawo wakajendelela kwitangʼanila mu Nyumba yo Mulungu na wuhile wumonga vilo vyose. Langa mwidaha lyo wubegule wo mukate, wetangʼanililaga mu zinyumba zawo, no kuhanga wose ndigwa yiyo ne nyemo na nhumbula nzelu,

⁴⁷ wakumulumba Mulungu, wakendwa ne wanhu wose. U Muwaha yakawa kuwonjelezeza nhondo zose iwanhu wono yawaponyaga.