Matayo 14 - I CILAGANE CIPYA 1991

I lifwa lya Yohana u Mubaputizi

¹ Na mwipango lilyo, u Mutemi Helode, yakawa yazihulika za Yesu.

² Yakawa kuwatya i wetumami wakwe, “Alu u munhu yuyu, yo Yohana u Mubaputizi, alo kazuka mu wafu, holeka i vilungo vye metumo go wizine vikwitumilwa muli mwene.”

³ Helode yuyu yo yamwibata Yohana, yakamuwopa ne minyolo no kumulajila mu jela, kusoko ya Helodiya, u mugolece wo mwanakwawe Filipo. Ne soko yayo yeneco yali yili nhavi,

⁴ vyono u mwene Yohana yamulonjela Helode, vyono “Yili mwiko kuliʼgwe kwikalana na yuyo u mugolece wa Filipo!”

⁵ Holeka Helode yasakaga yamuwulaje Yohana, ninga hamba nha vivyo yawogopaga wanhu, vyono i wanhu wose, kuli wene Yohana yali muwizi.

⁶ Na mwizuwa lye sikukuu yo wulelwe wakwe Helode, u mwana we cicekulu wa Helodiya, yakavina viswanu muno ha mwande ye wajenzi. Sunga na Helode mweneco yakendezwa muno muno,

⁷ sunga yakawa kwihuwiza ko kwilahiza, vyono kosuma kumupela yuyo u muhinza, co cose cono kosaka.

⁸ Nayo u muhinza, vyono yafundwa no nyina, yakabita yakalomba yakutya, “Ane nghulomba wumhelaje lulu baha du, u mutwe wa Yohana u Mubaputizi, unhajilile amuno mu ciya.”

⁹ U Mutemi yakakalala muno muno, ninga ku soko yo wilahize wakwe wono yali yelahiza, kanyhi na ku soko ye wajenzi wono wali wali baho ha zindigwa, hodu yalajiliza du yapegwa.

¹⁰ Hodu ho baho Helode yakamutuma munhu, yakawa kubita ku jela, yakawa kumudumula Yohana u mutwe.

¹¹ No mutwe wa Yohana wukaletwa wuli mu ciya, wakamupela yuyulya u muhinza, nayo muhinza yakamutegulila nyina.

¹² Nawo i wejizwa wa Yohana wakaza, wakawusola u muwili wakwe wakawuzika. Hanyuma wakabita kumulonjela Yesu.

Yesu yakuwapela ndigwa i wanhu wacizize elufu yihano

¹³ Nayo Yesu yali zihulika zizo, yakawuka i hanhu baho, yakatulucila mu ngalawa, yakabita hanhu hanji hono hali helejehile ho yatule yali wene. Ninga i wanhu waza kumanya, wakamutyatya, wakujenda kwe migulu, wakulawilila mu makaya gawo.

¹⁴ Nayo yaza kutima kwi sangha, yakawona i lipuga iwaha lye wanhu, baho yakawawonela lusungu, yakawaponya i watamwa wawo.

¹⁵ Yaza kuwa cinyamihe, i wejizwa wakwe wakamubitila, wakamutya, “Alu ahano nha nyika, ne lizuwa alu lyaswa. Holeka wuwelagaje i wanhu, ho wasume kubita wakegulile ndigwa ku vitumbi.”

¹⁶ Ninga Yesu yakawatya, “Hasina soko ya wene yo kubitila kuko, langa, muwapelaje nyenye ndigwa.”

¹⁷ Ninga i wene nawo wakamutya, “Ase ahano cisina cinhu co cose, langa cina mikate mihano du, na somba nyejete.”

¹⁸ Yesu yakawatya, “Ale ndetelenyi vivyo hano.”

¹⁹ Yakawalajiliza i wanhu wekale hasi mu mahanze, Mwene yakayisola yiyilya i mikate mihano, hamonga ne zisomba vyono nyejete, yakagalamila ku wulanga, yakamulumbo Mulungu. Hanyuma yakayibegula yiyo i mikate yakawapela i wejizwa wakwe, nawo wakawapela wanhu.

²⁰ Ne wanhu wose wakatya, wakeguta. Hanyuma i wejizwa wakatondoleza i vibegulwa vyono vyasigala, wakamyemya nhoto ikumi na nyejete.

²¹ Na wono watya wali waficile nha wanhu elufu yihano walume du, ninga i wacekulu ne wana wadodo wose wono wali walibaho, wo si wawalilizwa mwiwalo lilyo.

Yesu yakujenda mucanyha ye malenga

²² Hobaho du Yesu yakawalajiliza i wejizwa wakwe wenjile mu ngalawa, wamulongolele ku nhumbi nzagwe ye lilenga, lono mwene yali yakali yakuwelaga i wanhu.

²³ Na lono yali yakondya kuwelaga wanhu, yakabita kwitunda yali wene, ho yasume kulomba. Na lono lizuwa lyali lyaswa, ha cinyamihe, u mwene yali yali kuko yali wene,

²⁴ na mwipango lilyo ingalawa nayo yali yakondya kufika behi na ha ciligati ye lilenga, ninga akuno yikugazwa ne mawingo ge lilenga, vyono vyali vidomile ne mbeho.

²⁵ Ne cilo lono kwali kweza behi no kudandawuka, Yesu yakawabitila i wejizwa, akuno yakujenda mucanyha ye malenga,

²⁶ I wejizwa wakwe waza muwona yakujendela mucanyha ye malenga. Oo! wakogopa muno muno, wakatya, “Nye, Isoce.” Baho wakazoza muno muno so woga.

²⁷ Baho baho du nayo Yesu yakalongana nawo, yakawatya, “Nye wendece, mutule, nha yo nene. Mulece kogopa!”

²⁸ Nayo Petelo yakamutya, “Muwaha, hono mbeka yo gwegwe, wunhezaje nane, njende mucanyha mu malenga nize kwako.”

²⁹ Yesu yakatya, “Ale, wuze.” Hobaho Petelo yakawa kutima mu ngalawa, yakawa kujenda mucanyha ye malenga, yakumubitila Yesu.

³⁰ Ninga mwene Petelo vyaza kwitangʼanila ne mbeho yono yakukunzaga muno, yakawa kwinjilwa na woga, hobaho du yakawa kwanza kudodomela, baho yakalila kwa yizi yiwaha, akuno yakutya, “Gwe Muwaha, wumhonye!”

³¹ Hobaho nayo Yesu yakawugolola muwoko wakwe, yakamwibata, akuno yakumutya, “Lanje ta gwe, mono wina u wihuwilo wudodo! So cici lo wukwihwelela?”

³² Hobaho wakawa kwinjila mu ngalawa, ne mbeho nayo hodu yikawa kunyamala.

³³ Na wose wono wali wali mu ngalawa, wakamuhemba, wakatya, “Mbeka agwe yo gwegwe go Mwana wo Mulungu.”

Yesu yakuwaponya i watamwa ku Genesaleti

³⁴ Nawo wakalilowoka lilenga, wakafika ku yisi ya Genesaleti.

³⁵ Ne wanhu wa kuko wali weza kumumanya vyono yo Yesu, hodu wakawa kwanza kuzitandaza i zinghani zakwe mu yisi yiyo yose. Hobaho wakamuletela Yesu, i watamwa wose ku wulawa mu yisi yiyilya yose,

³⁶ nawo wakamulomba yawakombole watamwa, ho wapamize du hambe limhembo lye civwalo cakwe, nawo wose wono wamupamiza, wakapona.