Maluko 7 - I CILAGANE CIPYA 1991

I myoto ye wasetu

¹ Iwafalisayo wanji hamonga ne wejizi wo Wulajilize, wono wali wazize kulawa ku Yelusalemi, wakekongholela hamwande ya Yesu.

² Wakawona vyono iwejizwa wakwe wanji, walizaga mikate ne miwoko yono yitipiye, yono simizuguzwe.

³ (Hambi Iwafalisayo ne Wayahudi wanji wose, nha webate imyoto ye wasewo: siwalizaga cinji, hono wakali sinezuguza miwoko yawo vyono yinojeye.

⁴ Kanyhi, siwalizaga cinji co cose cono ciguligwe ku sokoni, sunga wamule wacizuguze. Kanyhi hoyili myoto yinji yono wayibocela kulawa katali, kotya kukwema vikombe, nyungu ne viya vye vyuma vizelu.)

⁵ Holeka Iwafalisayo ne wejizi wo Wulajilize wakamuwuza Yesu, wakutya, “Alu so cici Iwejizwa wako siwakuyicelelela imyoto yono cayibocela kulawa ku wasetu, langa wene walizaga zindigwa ne miwoko yono yitipiye?”

⁶ Nayo Yesu yakawapitula yakawatya, “Nye nyo wakoci! Umuwizi Isaya yamuwililenyi ze mbeka lono yandika yakutya: ‘U Mulungu yakutya, I wanhu wawa wanumbaga kwe milomo yawo du, ninga mu zinhumbula zawo wali kutali nane.

⁷ No wuhembi wawo wakuliʼne hamba si wukwiliye cinji, hambi zinghani zono wejizaga, nha malajilizo ga cimunhu munhu du.’

⁸ “Anye mukulileka lilajilizo lya Mulungu no kwibata imalajilizo ge wanhu.”

⁹ Nayo Yesu yakajendelela kutya, “Anye nha mumanyile kwilega ko wusugu ililajilizo lyo Mulungu, ho muyityatye imyoto yenyu!

¹⁰ Hambi Musa nha yakalajiliza yakatya, ‘Uwogopaje Usogo no Nyina yako,’ na Mono yakulonga vibi kuli sogwe hamba kuli nyina, yimunojeye yuyo yafwe.’

¹¹ Ninga anye mukwijiza vyono, ‘Hono munhu yena icinhu cono yali yadahile kuwataziza usogwe hamba unyina yakwe, ninga kanyhi ho yatye, icinhu cico yo Kolubani (nhunizo yayo cilavywe kuli Mulungu),

¹² ati holeka si yimunojeye kanyhi yawataze i walezi wakwe.’

¹³ Holeka nha vivyo vyo mukuyibedegala inghani yo Mulungu so imejizo genyu gono mukwibocezana. Kanyhi mukwituma makani ganji menji gono genha gago.”

I Vinhu vyono vikumuhondanga munhu

¹⁴ Yesu kanyhi yakalicema i lipuga lye wanhu, yakalilonjela yakutya, “Muhulicizaje wose, kanyhi mwizuce.

¹⁵ Hasina cinji cono cikwinjila mugati yo munhu cono cikulawa munze cono cosuma kumuhodanga munhu. Langa cono cilawaga mugati yo munhu co cikuwa kumuhodanga munhu. [

¹⁶ Ale hulicenyi hono mwina makutu!]”

¹⁷ Yaza kulileka i lipuga lye wanhu no kwinjila mu kaya, iwejizwa wakwe wakamuwuza inhunizo ye cihwanicizo cico.

¹⁸ Nayo yakawatya, “Alu, hamba na nyenye simukwizuka hongo? Alu simukwizuka vyono i cinhu cono cikulawa munze no kwinjila mugati yo munhu si cosuma kumuhodanga munhu yaye,

¹⁹ hambi nha sicikumwinjila mu nhumbula yakwe, langa cikwinjila munda yakwe du na hanyuma yayo cilawanizaga kunze ku coloni?” (Na lono yalongaga zizo, Yesu yakazinoza ndigwa zose, swanu ku wulye.)

²⁰ Yesu yakajendelela kutya, “Cono cilawaga mugati yo munhu co cimuhodangaga munhu.

²¹ Hambi mugati, mu zinhumbula ze wanhu nha mo galawaga mahweso mabi, gono gakuleta wusenyha, wuhizi, wuwulaji,

²² wusulumizi, wutili, wubugu, wubi, wukoci, wusisi, maligo, wiwoni no wulele.

²³ Imabi gaga gose, go galawaga mugati yo munhu, nago go gakuwa kumuhodanga munhu.”

U wihuwilo wo mudala yunji

²⁴ Nayo Yesu yakawuka baho, yakabita ku yisi ya Tulo. Na kuko yakenjila mu kaya yinji yono siyasaka munhu yunji yamanye, ninga hamba nha vivyo, hamba siyasuma kwihundika.

²⁵ Na baho mucekulu yunji mono u muhinza wakwe yali yena icisi yakazihulika zinghani za Yesu. Hodu yakawa kuza, yakagwa hasi hamwande yemagulu ga Yesu.

²⁶ Nayo umudala yuyo yali Mugiliki, we mbeyu ye Wasilofoyinike. Ale, yakamulomba Yesu yalilavye licisi lyavu muli muhinza wakwe.

²⁷ Nayo Yesu yakamutya, “Ulece ta wana wamule kwiguta, hambi nha si viswanu kusola zindigwa ze wana, kuwa kuzigumilila zimbwa.”

²⁸ Ninga umudala yuyo yakatya, “Heya gwe Muwaha, ninga hamba ne zimbwa zono zili he vungu lye meza ye zindigwa, zilizaga i vidodo dodo vyono vikulagazwa ne wana.”

²⁹ Nayo Yesu yakamutya, “Ku so wulonje wuwo, ale, wubite. Ilicisi lyakondya kulawila mo muhinza wako!”

³⁰ Nayo yakabita ku kaya yakwe, yakamwagana umuhinza wakwe yagonile mu citanda, ne licisi lyakondya kumulawa.

Yesu yakumuponya mono yali cibwibwi kanyhi yali ciziwi

³¹ Hanyuma yayo Yesu yakawuka muʼsi ya Tulo, yakakolela mu Sidoni, yakafika kwilenga lya Galilaya, yakakolela muʼsi ya Dekapoli.

³² Ale, wakamuletela munhu mono yali cibwibwi kanyhi yali ciziwi, wakamunena yamuwicile miwoko.

³³ Nayo Yesu yakamutezeza ha mhelo ye lipuga lye wanhu, yakenjiza vidole vyakwe mu makutu, yakafunya mate no kumupamiza mu lulimi lwakwe.

³⁴ Hanyuma yayo yakagalamila kucanyha ku wulanga, yakangʼula, yakamutya, “Efata,” wo wutya “Diguka.”

³⁵ Lo lulolulo imakutu gakwe gakadiguka no wuwopwe wo lulimi lwakwe lukahogoha, yakanza kulonga viswanu.

³⁶ Yesu yakawalajiliza walece kumulonjela munhu ze litumo lilyo. Ninga mu nghango vyono yacila kuwalemeza, yo nghango yono nawo wakacila muno kuyitandaza i nghani yiyo.

³⁷ I wanhu wakezina muno muno, wakatya, “Kanoza zose viswanu, yakuwanoza we ciziwi wahulice, na we cibwibwi walonje!”