Luka 8 - I CILAGANE CIPYA 1991

I Wacekulu wono wetyatya na Yesu

¹ Hanyuma ya zizo, Yesu yakakola mu makaya na mu vitumbi, yakulonga no kuganula Luganuzi Luswanu lwo wutemi wo Mulungu. Na awalya we likumi na wejete wali hamonga nayo.

² Hamonga ne wacekulu wanji wono Yesu yawaponya macisi ne zinhamwa zinji, nawo wali hamonga nayo. Wawo wo wa Malyamu mono (yacemagwa Magadalena,) muli yuyo galawa macisi mupunghati.

³ Na Yowana u mugolece wa Cuza u mwitumami mulongola wa Helode, na Susana, na wanji wenji. Wacekulu wawo wawetumamilaga Yesu ne wejizwa wakwe mu sawo yawo weneco.

I Cihwanicizo co Mumiza mbeyu

⁴ Ipuga iwaha lye wanhu, wekongholaga, na wanhu wenji wakawa kumuziza Yesu wakulawa mu matumbi gose. Nayo yakawalonjela cihwanicizo cici,

⁵ “U mumiza mbeyu yalawila kumiza mbeyu yakwe na lono yamizaga, zinji zikalagala mu nzila; wakola nzila wakazikanyanjila, zindeje zikazilya.

⁶ Zinji zikalagala hono hogali mabwe, zazakota zikanyala, vyono zali zisina malenga.

⁷ Zinji zikalagala mu mabici ge mamivya, zikawilukana hamonga ne mamivya, gakazititiliza.

⁸ Zimbeyu zinji zikalagala mu muhangha muswanu, zikawiluka, zikalela mhece igana.” Yaza kukondya kulonga zizo, yakalonga na izi iwaha, yakatya “Holeka muhulice, hono mwina makutu.”

I Soko yo kwijiziza mu vihwanicizo

⁹ Ne wejizwa wakwe wakamuwuza Yesu nhunizo ye cihwanicizo cico.

¹⁰ Yakawatya, “Anye mupegwa kumanya zono zihundicigwe zo wutemi wo Mulungu, ninga kuli wanji, vyo si yinha. Langa wene walonjelagwa mu vihwanicizo, hono wakuwona, ho walece kuwona, na hono wakuhulika, ho walece kwizuka.”

Yesu yakulolosa nhunizo ye cihwanicizo co Mumiza mbeyu

¹¹ Ale, ne nhunizo ye cihwanicizo cici nha yoyi. I mbeyu yo nghani yo Mulungu.

¹² Zono zalagala mu nzila, zikulajila iwanhu wono wakuyihulika nghani hanyuma Setani yakuza yakuyiwusa yiyo nghani mu zinhumbula zawo, ho walece kwihuwila no kupona.

¹³ Azilya zono zalagala hono hogali mabwe, zikulajila iwanhu wono wakuyihulika nghani no kuyibocela na nyemo. Ninga hamba nha vyono zinha zimbeyu zizo, iwanhu wawo wakuwa wasina milela, wono wehuwilaga kwa cidaha du, na kolo wakujelwa, wakuwuya ne nyuma.

¹⁴ Na zono zalagala mu mabici ge mamivya, co cihwanicizo ce wanhu wono wakuyihulika nghani, ninga mu wujendelele wawo, wakuzinjilizwa ne mahwele ne zisawo, no wiyendeze we mikalile yiyi, nawo siwakulela mikalo yono yikangaye.

¹⁵ Nazo zono zalagala mu muhangha muswanu wo wanhu wono wakuyihulika nghani, no kuyikamisa kwa nhumbula swanu na ye cihuliko. Nawo wakuleta mikalo mu wukangalile.

I Tala yono yigubicizwe mu nhoto

¹⁶ “Wanhu si wakolezaga tala no kuyigubiciza, hamba kuyiwika mwivungu lye citanda; langa wayiwikaga ha wuwiko wayo, wanhu wono wakwinjila mugati, wawone wuzelu wayo.

¹⁷ Nghani yo yose yono hundikwe yolokwanzalikwa, na ze cinyele zolomanyika, no kulawila kuzelu.

¹⁸ Holeka mwiyihenje vyono mukuhulika. Hambi mono yena, nha kopegwa; na mono yasina, kosolelwa sunga na cono yakutya yena naco.”

U Nyina ne wanduguze wa Yesu

¹⁹ Baho, u nyina ne wanduguze wa Yesu wakamuziza, ninga si wasuma kwiwona nayo so winji we wanhu.

²⁰ Yesu yakulonjelwa, vyono u nyina ne wanduguze wali kunze, wakusaka kumuwona.

²¹ Ninga Yesu yakawalonjela wanhu wose, “Yaya ne wandugu zangu, wo walya wono wakuyihulika nghani yo Mulungu no kuyitumama.”

Yesu yakuyitacila mbeho ne lilenga vinyamale

²² Kukawa mwizuwa linji, Yesu yakenjila mu ngalawa mwene ne Wejizwa wakwe; yakawatya, “Cilowoce ku nhumbi nzagwe ye lilamba.” Wakatuluka.

²³ Ninga lono wajendelelaga mu ngalawa mwene Yesu yakebatwa na nhongo, yakagona. Likatima ikukunzo yiwaha lye mbeho mwilamba: malenga gakawa kwanza kwinjila mu ngalawa, wakawa wali mu mbali mbaha.

²⁴ Wejizwa wawalya wakamubitila Yesu, wakamusinhusa wakutya “Muwaha, Muwaha, ceza kufwa!” Yesu yakasinhuka, yakavitacila imbeho ne mawingo mawaha ge malenga, gakatula, hakanyamala twii.

²⁵ Yakawatya i wejizwa wakwe “Wihuwilo wenyu wuli hayi mbi? Ninga wene wakezina no kogopa, wakeyitya, Alo munhu ci yuyu, sunga i mbeho ne malenga yakulonjela, vinyamale, navyo vikumuhulika!”

Yesu yakumuponya munhu mono yali yena macisi

²⁶ Yesu ne wejizwa wakwe wakajendelela no muhinzo wakafika mu yisi ya Wagelasene, yono vidomile na Galilaya ku nhumbi ye lilamba.

²⁷ Nayo Yesu yaza kutima muʼsi viketangʼanila na munhu monga mono yali yena macisi, yakulawa mwikaya, u munhu yuyo mu vilo vinji si yavwalaga myenda, hamba si yekalaga mu kaya, langa yekalaga mu vitenjelo.

²⁸ Yaza kumuwona Yesu, yakazoza, yakagwa hali mwene, yakabalaluka na lizi yiwaha yakatya, “Alo wina nghanici nase, Yesu go Mwana wo Mulungu Mono Yalawiliciye Muli Vyose? Nghukunena wulece kungaza”

²⁹ Hambi nha yalilajiliza licisi lilawanize muli munhu. Hambi nha lyamwibataga kenji. Hamba yiwe wanhu wamuwikaga mugati no kumuwopa ne vyuma; ninga yavidumulaga viwopelo kali kenji, ne licisi lilyo lyamuwinjilaga ku nyika.

³⁰ Yesu yakamuwuza, itagwa lyako gwegwe nani? Yakatya itagwa lyangu nene “Itewa,” vyono macisi menji gali gamwinjiye munhu yuyo.

³¹ Gago macisi gakamunena Yesu yalece kugalajiliza gawuce no kwajilila mwikombo lyono lisina mudumo.

³² Kwali na itewa lya nguhi nyinji, likudima ha mwejelele we litunda. Ale gago macisi gakamunena Yesu yagakombole genjile muli zene. Nayo Yesu yakagakombola.

³³ Imacisi gakalawa muli munhu, gakenjila mu zingubi, nazo zingubi zikavulumucila mwilamba, zikafwila mumo mu malenga.

³⁴ I wadimi waza kuziwona zono ziweye, wakatiza wakabita kuwalonjela wanhu wa mwikaya na muʼsi.

³⁵ Wanhu wakaza wazilanje zono ziweye; wakafika kuli Yesu, wakamuwona munhu mono yali yalavywa macisi, yavwalile myenda, yena ne mahala gakwe; yekaye ha magulu ga Yesu, wakogopa muno.

³⁶ Nawo wono waziwona zizo, wakawaloloseza wanhu wawo vyono munhu yuyo yaponyigwe.

³⁷ Ne wanhu wose we yisi ya Wagelasene wakebatwa na woga wuwaha, holeka wakamunena Yesu yawuce, yabite. Nayo Yesu yakenjila mu ngalawa, yakawuka.

³⁸ Ninga u munhu mono yalavywa macisi yakamunena viwezane nayo, ninga Yesu si yamulumba, langa yakamutya.

³⁹ “Uwuye kwenyu, ukalolose zimbaha zono Mulungu yakutendeye.” Yakabita, yakaganula hanhu hose mwikaya lilyo, zimbaha zono yatendelwa na Yesu.

Mwana we cicekulu wa Yayilo no mucekulu yunji, wakuponywa

⁴⁰ Nayo Yesu yaza kuwuya ku nhumbi nzagwe ye lilamba, wanhu wenji wakamubocela na nyemo, hambi nha wamulindilaga wose.

⁴¹ Baho yakaza munhu, itagwa lyakwe Yayilo, nayo yali muwaha we nhangʼanilo yo wuhembelo, yakagwa ha magulu ga Yesu, yakamunena yaze kwakwe;

⁴² hambi nha yali yena mwana wa cicekulu we ciwene, kotya wa myaka ikumi na myejete, nayo yali yeza behi no kufwa. Ninga Yesu lono yabitaga wanhu wenji wakamumemela.

⁴³ Na mumo mwipuga lye wanhu, mwali na mucekulu yunji mono yali yena wutamwa wo wuzaze we sakami kwa myaka ikumi na myejete, nayo hamba yawe yali yetumamila sawo yakwe yose mu Waganga, ninga hasina hamba yumonga mono yasuma kumuponya.

⁴⁴ U mucekulu yuyo, yakaziza ku mugongo wa Yesu, yakapamiza limhembo lye civwalo cakwe, na hobaho du, u wuzaze wakwe we sakami wukaduma kamonga.

⁴⁵ Yesu yakawuza, “Alo nani mono yamhamize?” Wakakana wose. Nayo Petelo yakatya, “Muwaha, wanhu wenji wakupilime no kukonyeceza.”

⁴⁶ Ninga Yesu yakatya, “Ho yuli munhu mono yamhamize, hambi nha manyile vilungo vilawa muli nene.”

⁴⁷ No mucekulu yaza wona vyono si kosuma kwihundika, yakelajila akuno yakucicima so woga, yakagwa hali Yesu, yakalolosa hali wanhu wose cono cilecile yakumupamiza Yesu, na vyono yakondya kuponywa kamonga.

⁴⁸ Yesu yakamutya, “Go muhinza, wihuwilo wako wukuponya, ubite upolile.”

⁴⁹ Na lono Yesu yali yakali kulonga, Yayilo yakaletelwa nghani kulawa kukaya kwakwe, vyono, “U mwanago yakondya kufwa, ulece kumugaza Mwijizi.”

⁵⁰ Ninga Yesu yaza kuhulika zizo, yakamulonjela Yayilo yakatya, “Ulece kogopa. Wihuwile du, nayo mwanago kopona.”

⁵¹ Yaza kufika kukaya ya Yayilo si yamukombola yunji wenjilane nayo, langa Petelo, na Yohana, na Yakobo, ne walezi wo muhinza yuyo du.

⁵² Wanhu wose, walilaga citalo, ku soko yo mwana yuyo. Ninga Yesu yakawatya, “Mulece kulila, hambi mwana nha siyafwiye, langa yagonile nhongo du.”

⁵³ Nawo wakamuseka, hambi nha wali wamanyile vyono yafwiye.

⁵⁴ Ninga Yesu yakamwibata muwoko, yakacema yakutya “Go muhinza winuce.”

⁵⁵ Muhe wo muhinza wukawuya, yakenuka kamonga, Yesu yakalajiliza wamupele ndigwa.

⁵⁶ Walezi wakwe wakezina, ninga Yesu yakawalajiliza, walece kumulonjela munhu kuli zizo zono zijeye.