Luka 7 - I CILAGANE CIPYA 1991

Yesu yakumuponya mwitumami wo muwaha yunji we wasilikale

¹ Yaza kukondya kulonga zinghani zakwe zose hali wanhu, Yesu yakabita ku Kapelanawumi.

² Kuko kwali na muwaha we wasilikale igana, Mulumi, mono yali yena mwitumami wakwe mono yali yamwendile muno. Mwitumami yuyu yali yatamigwe yeza yali behi no kufwa.

³ Nayo yaza hulika za Yesu, yakamutumila i walongola wanji we Wayahudi, wabite wakamulombe Yesu ho yaze yamuponye mwitumami wakwe.

⁴ Nawo wazafika kuli Yesu, wakamunena muno, wakutya “Ayu yanojeye umutendele nghani yiyi,

⁵ hambi nha yawendile wanhu wetu, nayo yo mwene mono yacizenjela ne nhangʼanilo yetu yo Wuhembelo.”

⁶ Yesu yakabitana nawo. Na lono yali yasejelela behi ne kaya, yuyo muwaha we Wasilikale igana yakamutumila wendece wakwe wamulonjele Yesu. “Muwaha wulece kwigaza, hambi ne nha si nghwiliye agwe winjile mu kaya yangu.

⁷ Kanyhi nane nghwiwona vyono si nghwiliye kuza kuli gwegwe; ninga ulonje du, no mwitumami wangu kopona.

⁸ Hambi nane nha nili hasi yo Wulajilize we wawaha, nina wasilikale wangu. Nane nghumutya ayu ‘Bita’ nayo yakubita, nghumutya yunji, ‘Wuze’ nayo yakuza, na hono nimutye mwitumami wangu, ‘Wunoze nhavi,’ nayo yakunoza.”

⁹ Yesu yaza kuhulika zizi, yakamwizina no kumukumya yuyulya u muwaha we wasilikale. Hanyuma yakawapitucila we lipuga lye wanhu wono wamutyatyaga, yakawatya. “Nghali nawona wihuwilo wuwaha nha wuwu, hamba mu Isilayeli.”

¹⁰ Nawo wono watumwa waza kuwuya kukaya, wakamwagana yuyulya mwitumami yanoga.

Yesu yakumuzukula mwana wo mucekulu mufwile

¹¹ Hanyuma hadodo, Yesu yakabita kwitumbi lyono litezagwa Nayini, Wejizwa wakwe hamonga na wanhu wenji, wakabitana nayo.

¹² Ale yaza sejelela he lilango liwaha lyo kwinjilila mwikaya, yakawona wanhu wadinghuye muzelelo mono yafwiye, mwana we ciwene wo mucekulu mufwile. Wanhu wenji wa mwikaya lilyo, wali hamonga no mucekulu yuyo.

¹³ No Muwaha yaza kumuwona mucekulu yuyo, yakamuwonela lusungu, yakamutya, “Ulece kulila.”

¹⁴ Yakasejelela behi, yakacipamiza citanda cono wali wamudinghuliye mono yali yafwiye, nawo wono wali wamudinghuye wakema. Nayo Yesu yakatya, “Muzelelo, nghukulonjela, Winuce.”

¹⁵ Yuyo mono yali yafwiye, yakenuka yakekala, no kwamula kulonga. Na Yesu yakamupelo nyina.

¹⁶ Wanhu wose wakebatwa no woga, wakamulumbo u Mulungu, wakutya, “Muwizi muwaha kalawila mwetu; no Mulungu kaza kuwakomboza wanhu wakwe.”

¹⁷ Ne nghani yakwe yiyi yikamanyika mu Wuyahudi mose, na mu yisi yose yono yipilime.

Wono watumwa kulawa kwa Yohana u Mubaputizi

¹⁸ I wejizwa wa Yohana, wakamuganulila Yohana zizo zose, Yohana yakawacema wejete wayagwe ne wejizwa wakwe,

¹⁹ yakawatuma wabite kuli Muwaha wakamuwuze “Alu agwe! yo yulya mono yakuza, hamba cimulanjilile yunji?”

²⁰ Wejizwa wawo wejete waza kumubitila Yesu, wakatya, “Yohana u Mubaputizi kacituma kwako cikuwuze: ‘Ati! Yo gwegwe mono yakuza, hamba cimulanjilile yunji?’ ”

²¹ Mu cipango cico, Yesu yakawaponya wenji mu zinhamwa no wugazwe ne macisi, ne wabofu wenji yakawapela wuwone.

²² Yesu yakawapitula yakawatya, “Mubite mukamulonjele Yohana zono muwene na zono muhulice; i wabofu wakuwona, wono wali citewe wakujenda viswanu, wono watamigwe wukoma wakukwemwa, ne waciwa wakuganulilwa u Luganuzi Luswanu.

²³ Yo mumoti mono si yakuwona cikobazo kuli nene.”

²⁴ Waza kutuluka wono watumwa na Yohana, Yesu yakanza kuwalonjela mapuga ge wanhu, za Yohana. “Mwene mwabitaga kunyika kulanga cici?” Mwasakaga kuwona lihanze lyono lyayumvyagwa ne mbeho?

²⁵ Ninga mwabitaga kulanga cici? Mwabitaga kumuwona munhu mono yavwalile vivwalo vye cimalidadi? Lanjenyi, wono wena vivwalo vyo lukumyo, no kwikala mu mikalile yo wumote wa za mononze, wekalaga mu zinyumba ze watemi!

²⁶ Ta munonjelaje, mwalawa kulanga cici, Mwabitaga kumuwona muwizi lo? Heya, mbeka mono yamucizize no muwizi.

²⁷ Yuyu Yohana yo yakulongwa mu Mandiko Gono Gelile, “Langa ta, nghumutuma mutumwa wangu, yakutyo Muwaha, nghumutuma yakulongolele no kukunozelezeza nzila.”

²⁸ Yesu yakatya, “Mu wana wose we wanhu, hasina mono yamucizize Yohana u Mubaputizi. Hamba nha vivyo, u mudodo muno mu wutemi wo Mulungu yo muwaha si nho mwene.”

²⁹ Wanhu wose ne watoweza kodi waza hulika wakawukumya u wuswanu wo Mulungu, wawo wo wawo wono wali wakondya kubaputizwa mu wubaputizo wa Yohana.

³⁰ Ninga Wafalisayo ne wejizi wo Wulajilize wakalema wuhile wo Mulungu wono wali wuwanojeye, wakalema sunga no kubaputizwa na Yohana.

³¹ Yesu yakajendelela kutya: “Holeka nowehwananiza wanhu we ndelo yiyi na cinhuci? Wo wanhu wono wenha wule?

³² Wenha wana wadodo wono wekaye mu Sokoni, wono welonjelaga awa na walya; wakutya, Cimutowelenyi zifilimbi, nanye hamba kuvina ngʼo, calila citalo nanye hamba kulila ngʼo.

³³ Hambi Yohana u Mubaputizi nha yaza si yalizaga ndigwa, hamba si yangʼwezaga divayi nanye mukatya, Yena lukwale.

³⁴ U Mwana wo Munhu nha yaza yakulya no kungʼwa, nanye mukatya, Langa ta munhu yu mubuguci, na mungʼwa divayi mwendece we watoweza kodi na wanyo wubi!

³⁵ Hamba nhavivyo, I mahala go Mulungu gejela vyono maswanu kuli wose wono wakugavumila.”

Yesu yali mukaya ya Simoni Mufalisayo

³⁶ Mufalisayo yunji yakamusaka Yesu yalye ndigwa kwakwe. Nayo yakenjila mu nyumba ya yuyo Mufalisayo yakekala yalye ndigwa.

³⁷ Na mwitumbi lilyo mwali moyuli mucekulu yunji mono yali yena mikalile mibi. Nayo yaza kumanya vyono Yesu yali yekaye yakulya mu kaya yo Mufalisayo, yakaleta supa ya mafuta ge mhunjile swanu,

³⁸ yakema behi na Yesu, yakulila, ne mahozi gakwe gakamusululila Yesu mu magulu. U Mucekulu yuyo yakayipata migulu ya Yesu kwe zimvili zakwe. Yakamunonela muno magulu, yakagabaka i magulu ne mafuta gagalya.

³⁹ U Mufalisayo yuyo mono yamucema Yesu, yaza kuziwona zizo, yakatya mu nhumbula yakwe, “Munhu ayu yali yawe muwizi, yali yamutanje mucekulu yuyu vyono yenha na vyono mubi.”

⁴⁰ Yesu yakamutya yuyo Mufalisayo “Simoni nina nghani yo kukulonjela.” Nayo Simoni yakatya, “Lonje Mwijizi.”

⁴¹ Yesu yakatya “Kwali na wanhu wejete wono wali wamukopile munhu yumonga mapesa. Yunji yali yakopile silinje magana mahano, no muyagwe, silinje makumi mahano.

⁴² Waza kuwa wasina co kulipa, yuyo munhu yakawanenela wose vyono wejete. Ale, wa hayi muli wawa wejete mono kocila kumwenda yuyo munhu mono yawakopesa zipesa?”

⁴³ Simoni yakapitula yakatya, na lunji, yuyo mono yaneneywe nayo mugawa muwaha, yo komwenda muno yuyo munhu. Yesu yakamutya “Kulonga sawa.”

⁴⁴ Hanyuma yakamupitucilo mucekulu, no kumutya Simoni, “Kumuwona ta mucekulu yuyu? Ane ninjila mu nyumba yako, malenga go kuzuguza magulu gangu, si umheye ngʼo. Ninga mucekulu ayu, kasuluziza mahozi gakwe mu magulu gangu no kugapata kwe zimvili zakwe.

⁴⁵ Agwe si wunoneye; ninga ayu neza kwinjila, si yalecile kunonela muno magulu gangu.

⁴⁶ Agwe si wumbacile mafuta mu mutwe: ninga ayu kambaka mafuta mu magulu gangu.

⁴⁷ Holeka nghukutya, wendo wakwe wukulajila vyono, hamba yawe yali yena wubi winji, kanenelwa. Ninga wowose mono kanenelagwa nghani ndodo yo kendaga hadodo.”

⁴⁸ Yesu yakamutya u mucekulu, “Kunenelwa wubi wako.”

⁴⁹ Na walya wono wali wekaye nayo ha ndigwa, wakanza kutya mu zinhumbula zawo “Yuyu yo nani mwene, mono yakusuma kunenela wubi?”

⁵⁰ Nayo Yesu yakamutya u mucekulu, “Wihuwilo wako wukuponya; ubite upolile.”