Luka 4 - I CILAGANE CIPYA 1991

Yesu yakujelwa

¹ Ale Yesu yawuyaga yakulawa kwikolongo lya Yoludani, yamemilo Muhe Mono Yelile, yakatongwa no Muhe yabite ku nyika.

² Yekala kuko ku nyika vilo makumi mane yakujelwa na Setani. Nayo si yalizaga cinji mu vilo vivyo vyose, navyo vyaza puluta, yakadabuka.

³ Holeka Setani yakamutya, “Hono yo gwegwe Mwana wo Mulungu, ulonje libwe lili liwe mukate.”

⁴ Yesu yakamupitula, yandikwa “Munhu si ko kwikala mumi so ndigwa du.”

⁵ Hanyuma Setani yakamutegula hacanyha, hanhu hono hali henucile, yakamulajila matemi gose ga kononze lwa kamonga. Setani yakamutya,

⁶ “Nokupela gwegwe vilungo vivi vyose, ne zinhojo zayo; hambi nha nakombolelwa nene, na muli wose mono nyendile, nghumupela.

⁷ Ale hono ufugame hali nene, vivi vyose vyowa vyako.”

⁸ Nayo Yesu yakapitula yakamutya, “I Mandiko gakutya; ‘komuhemba Mulungu wako, no komwitumamila mweneco yali wene du.’ ”

⁹ Setani yakamutegula ku Yelusalemi, yakamuwika mucanyha ye litembe lye Nyumba yo Mulungu, yakamutya, “Hono yo gwegwe mwana wo Mulungu, wilugaje baha sunga ho hasi,

¹⁰ hambi nha yandikwa ‘Kokulajiliziza Wamalayika wakwe wakukamise,’

¹¹ kanyhi, ‘Wokwambilila mu mawoko gawo. Ho wulece kwikobala mugulu wako mwibwe.’ ”

¹² Yesu yakapitula yakamutya, “Yandikwa, ‘Wulece kumujelo Muwaha Mulungu wako.’ ”

¹³ Nayo Setani yaza kukondya majelo gose, yakawa kumuleka hadodo.

Yesu yakwamula mulimo wakwe mu Galilaya

¹⁴ Baho Yesu yakawuya ku Galilaya kuno yamemile vilungo vyo Muhe Mono Yelile. Ne zinghani zakwe zikatandala mu yisi yose yono yipilime.

¹⁵ Nayo yejizaga wanhu mu matangʼanilo gawo go wuhembelo akuno yakulumbwa na wose.

Yesu yakulemwa mu Nazaleti

¹⁶ Yesu yakabita ku Nazaleti kono yawilucila, yakenjila mu nhangʼanilo yo wuhembelo mwizuwa lye Sabato nha vyono yali yazoweye, yakema yasome Mandiko Gono Gelile.

¹⁷ Yakapegwa citabu co muwizi Isaya, yakacigubula hanhu hono hali handicigwe nhavi,

¹⁸ “U Muhe wo Muwaha wuli muli nene Kasiwanula, ho niwaganulile waciwa Luganuzi Luswanu, Kanhuma niwalonjele wono wafunjigwe, nha vyono wowopolelwa, Ne wabofu, vyono wowona kanyhi,

¹⁹ Kanhuma ho niwakomboze wono wakwiwonelwa, no kuwalonjela i cipango cono u Mulungu kowakomboza wanhu wakwe.”

²⁰ Yaza kukondya kusoma, yakacigubika icitabu, yakamupela u mwitumami, yakekala, ne meso ga wose wono wali wali mu nhangʼanilo yo wuhembelo gakawa gamulanjile.

²¹ Nayo yakamula kuwatya, “Izuwa lili nha vyono muhulice lwandiko lulu lukusomwa, lwakondya kufisilizwa.”

²² Wose wakendezwa nayo, wakezina so zinghani ziswanu zono yalonga, wakatya, “Yuyu si yo mwana we cilume wa Yusufu?”

²³ Yakawatya, na lunji mononjela nghani yiyi, “Go muganga, wilagule go mweneco,” na kanyhi motya, “Muli zose zono cahulika wukwituma ku Kapelanawumi, uzitumaje na baha kanyhi mwitumbi lyako.”

²⁴ Yakawatya, “Mbeka nghumutyenyi, hasina muwizi mono kavumilagwa mu yisi yakwe mweneco.

²⁵ Ninga mbeka nghumuyeyi, kwali kowali wafwile wenji mu Isilayeli mu vilo vya Eliya, lono wulanga wukadindwa myaka midatu na myezi mutandatu, kukawa na nzala mbaha mu yisi yose.

²⁶ Hamba nhavivyo, Eliya si yatumwa kuli yunji wowose, langa yatumwa kuli mucekulu mufwile du wa ku Saleputa mu yisi ya Sidoni.

²⁷ Kanyhi mu yisi ya Isilayeli, mu cipango ca Eliya muwizi, kwali kowali watamwa wenji wo wukoma, hamba nhavivyo hasina wowose mono yakwemwa, langa hono si Namani du munhu wa Suliya.”

²⁸ Na wose wono wali wali mu nhangʼanilo yo wuhembelo, waza kuzihulika zizo, wakakolwa nelikuwo,

²⁹ wakenuka, wakamulavyaniza Yesu kunze ye likaya lyawo, lyono lyali lizenjigwe mucanyha ye cigongo, wakamutegula sunga ku nhenenhuko ye cigongo cico, ho wamugumile hasi.

³⁰ Ninga Yesu yakakolela haciligati yawo yakawa kubita.

U Munhu we licisi

³¹ Hanyuma Yesu yakabita kwitumbi lya Kapelanawumi, mu yisi ya Galilaya yakawa kuwejiza mwizuwa lye Sabato.

³² Wakezina so Wulajilize wono yali yena nawo mu wijize wakwe.

³³ Mumo mu nhangʼanilo yo wuhembelo mwali moyuli munhu mono yali yena muhe we licisi lyavu, yakabalaluka ne lizi iwaha, yakutya.

³⁴ “Gwe Yesu wa Nazaleti, cina nghanici nagwe? Alo kuza ucongomeze? Nghumanyile gwegwe yo nani, yo Gwegwe Mono welile wo Mulungu.”

³⁵ Ninga Yesu yakalitacila yakutya, “Nyamale, uwuce muli munhu yuyo.” Ne licisi lyaza kumubamiliza hasi, haciligati yawo, likawa kuwuka muli munhu yuyo, hamba kumutamisa yaye.

³⁶ Wose wakezina, wakawa kulongana weneco wose, wakutya, “Ayi yo nghani yo wizine, hambi nha ko wusume no Wulajilize, yakugalajiliza i macisi gawuce, nago gakuwuka.”

³⁷ Ne zinghani za Yesu zikatandala hanhu hose mu yisi yiyo.

Yesu yakuwaponya wanhu wenji

³⁸ Yesu yakawuka mu nhangʼanilo yiyo yo wuhembelo, yakenjila mu nyumba ya Simoni, u mukwewe we cicekulu wa Simoni, yali yebatwe na mhungo mbaha, wakamulomba yamuponye,

³⁹ Yesu yakema behi nayo, yakayitacila mhungo, nayo yikamuleka. Ho baho yakawa kwinuka no kuwetumamila.

⁴⁰ Lono lizuwa lyali lyeza behi no kugwila, wose wono wali wena watamwa we matamwa ge hayo hayo, wakawaleta kuli mwene, nayo yakawawicila miwoko yakwe wose, yakawaponya.

⁴¹ Ne macisi gakalawa muli wenji, gakubalaluka, gakutya, “Yo gwegwe Mwana wo Mulungu.” Ninga Yesu yakagatacila, hamba si yagaleka galonje, hambi nha gali gamumanyile vyono yo Kilisito.

Yesu yakuganula mu Yudiya

⁴² Ale waza kwela, Yesu yakabita hanhu hono hasina wanhu, ne wanhu wakawa kumulondola, na waza muwona, wakahila kumugoma yalece kuwuka kwawo.

⁴³ Ninga mwene yakawatya, “Yinojeye nganule Luganuzi Luswanu lo wutemi wo Mulungu na mu matumbi ganji, hambi nha co caleka nghatumwa.”

⁴⁴ Yakawa kuganula mu matangʼanilo go wuhembelo ga ku Yudiya.